Әлияның «ән гәккуі»
Ұлыстың ұлы күні қарсаңында «Қазақстан» орталық концерт залында жас әнші Әлия Әбікен «Ән гәккуі» атты мерекелік концертін өткізеді. Қазақ эстрадасында халық әндерін нақышына келтіріп орындайтын оның репертуарындағы туындылардың көбі сөзі мен әуені үйлесім тапқан халық әндері. Шығармашылық талғамы жоғары әншінің мерекелік бағдарламасы жайлы осы концертті ұйымдастырушы, Қазақстанның Еңбек сіңірген әртісі Майра Ілиясовамен әңгімелескен едік.
– Майра апай, Әлияның концертін ұйымдастырып жүрген өнердегі жанашыр әпкесі боласыз. Астана төрінде өтетін концертке дайындықтарыңыз қалай?
– Бүгінде дайындық жұмыстары жүріп жатыр. Қала әкімдігінің қолдауымен 22 наурыз күні елордалықтарға қазақтың тамаша дәстүрлі әндерінен шашу шашып, мерекелік бағдарламамызды ұсынамыз. Талғамы биік, тыңдарманы көп әншінің елорда төрінде Наурыз тойы қарсаңында өнер көрсетуі – қазақтың әніне берілген үлкен баға деп білемін.
– Бүгінгі қазақ эстрадасында халық әндерін әдемі орындайтын әншілер саусақпен санарлық. Бұл ретте Әлияның шығармашылығы туралы не айтасыз?
– Әлияның өнерін алғаш Мақпал Жүнісованың есеп беру кешінде көрдім. Оның бойындағы қазақ қызына тән қасиеттері, сахнада өзін-өзі ұстауы, ешкімге ұқсамайтын сахналық киім үлгісі маған қатты ұнады. Талантты әншіге Мақпал Жүнісова қолдау көрсеткен. Одан кейін өзімнің «Жан анам», «Сағындырған әндер-ай» жобаларыма қатыстырдым. «Қасымда болып, маған көмектессеңіз» деп қолқа салған соң, Әлиямен бірге ел аралап, шығармашылық кештерін өткізіп жатырмыз. Халық өз бағасын берді.
Астанада өтетін кеште әнші «Бүлдірген», «Есіл дүние-ай», «Бұлбұлым» «Алақаннан ұшқан аққуым» сынды халықтық туындылармен қатар «Өкініш тамшылары», «Өмірге сауал» сынды философиялық мағынасы терең әндерін орындайды. Екі сағатқа созылатын әдемі кеште халық әндері ғана шырқалады.
– Кеш қонақтары кімдер?
– Концертте өзім ән саламын. Дәстүрлі әнші Ләззат Жоламанова, «Сазген» ансамблі, сонымен қатар Мейрамбек Бесбаевтың «Тарту» тобы өнер көрсетеді. Одан бөлек әжелеріміз, сарбаздарымыз және мың бұралған бишілеріміз де бар.
– Әңгімеңізге рахмет!
Гүлмира Аймағанбет