Аллергияның әлегі көп
Жеделсөз
Бүгінде ең көп тараған аурулардың бірі — аллергия. Мамандардың айтуынша, орташа есеппен әрбір үшінші адам аллергиядан зардап шегеді екен. Аталмыш ауру туралы ҚР Президент ісі басқармасы медициналық орталығының аллерголог дәрігері Светлана ДАУТОВАҒА хабарласқан едік.
– Аллергияны емдеу жолдарын айтып берсеңіз…
– Аллергияның түрі өте көп. Ол – қандай да бір нәрсенің ағзаға жақпай, кері әсер беруінен туындайтын кесел. Дегенмен, ол әркімде әртүрлі ыңғайда өршиді. Біреулердің денесі қышыса, екіншілерінің мұрнынан су ағып, көзі жасаурап, қызарады немесе тыныс алуы ауырлап, демігеді. Ауру белгілі бір жыл маусымында күшейе түседі. Көктемде өсімдіктерден, шаң-тозаңнан өршісе, күз мезгілінде жерге түскен жапырақтардан қозатын аллергия бар. Сондай-ақ, күнделікті өмірдегі шаң-тозаң, үй жануарлары осы ауруға себепші болады. Науқастарға біз симптоматикалық, яғни, уақытша көмек береміз немесе АСИТ (Аллерген-спецефикалық имуннотерапия) арқылы емдейміз. Бұл аллергияға деген сезімталдықты төмендетеді. Ал, негізінен, бұл ауруды қыста емдеген жөн. Емдеу шараларының барлығы медициналық мекемеде әрі аллергологтардың бақылауымен өтуі тиіс.
– Аллергия екенін білмей жүре беретін адамдар бар. Қалай анықтауға болады?
– Аурудың әртүрлі белгілері болады. Аллергиясы бар адамдардың балалары да осы кеселге бейім келеді. Яғни, дерт тұқым қуалайды. Екінші фактор – экологиялық жағдай салдарынан жүре пайда болатын аллергия. Негізінен, адамға көз, мұрын, қолқа арқылы білінеді. Мұндай кезде адамдар дертіне өзі диагноз қойып, дәрілерді дәрігердің нұсқауынсыз алып, пайдалана береді. Бұл – дұрыс емес. Кеселдің өршіп кетуіне көбіне осы жағдай себеп болып жатады. Дер кезінде дәрігерге көрінбесе, ауру асқынып, демікпеге ұласуы мүмкін.
– Осы аурумен ауыратындарға қандай кеңес бересіз?
– Түрлі фаст-фудтар, қоспалар, бояғыш заттар, газды сусындар аллергияны қоздыра түседі. Керісінше, табиғи таза өнімдерді тұтыну керек. Пайдалы ботқалар, ет сияқты тағамдарды жеу керек. Бөлмені желдетіп, ауасын жиі тазартып тұрған дұрыс.
Еркежан СӘТІМБЕК