Амангелді Сыздықов, Астана қаласы Ардагерлер кеңесінің төрағасы
Кеше Елбасы Нұрсұлтан Назарбаев еліміздің Тәуелсіздік күніне арналған салтанатты жиында Тәуелсіздіктің ұлы рухы баршамызды жебейтінін, біріктіретінін, бойымызға қуат беріп, келешекке деген сенімімізді нығайтатынын тебіреніп айтты. Шын мәнінде біз бүгінде бейбітшілік бесігінде өмір сүріп келеміз. Құдайға шүкір, қазіргі кезеңде Қазақстанды бүкіл әлем танып-біліп отыр.
Ұлтымыздың көшбасшысы, мемлекеттің қолбасшысы болып отырған Нұрсұлтан Әбішұлы Тәуелсіздік күні мерекесі әрбір қазақстандық азаматтың жүрегінде, әр шаңырақтың төрінде, қалалар мен ауылдарда салтанат құрады деп атап өткені жүрегіме майдай жақты. Ақиқаты сол – тәуелсіздік бұрынғы ата-бабаларымыздың орындалмай кеткен арманы еді. Ал бүгін біздің ұрпақ сол асыл арманды жүзеге асырып, бақытты заманды бастан кешіп отыр.
Елбасымыз Отанымыз – Қазақстанның көк байрағын нық ұстаймыз, асқақтатып желбірете береміз, бұл біздің мәңгілік ұстанымымыз деп айтты. Бұл сөз баршамызға бағытталған сөз деп түйсінемін. Демек, елдің бірлігі үшін, берекесі үшін бәріміз бір жеңнен қол, бір жағадан бас шығарып еңбек етейік. Тәуелсіздіктің бір талабы да осында жатса керек.
Еліміз аман, жұртымыз тыныш болғай деп тілеймін.
