АНАЛАРҒА АРНАЛҒАН АЙЛЫҚ
Астанада педиатриялық қызметті жетілдіру мақсатында жүкті әйелдер, жас аналар мен олардың балалары үшін «Дені сау ана – дені сау сәби» атты айлық басталды.
Айлық аясында қалалық медицина мекемелерінде жоғары білікті мамандар тегін кеңестер беретін болады. Сонымен қатар, практикалық сабақтар өткізіледі. Оның барысында жас аналарға бала емізу принциптері баланы бағып-күту, аналардың дұрыс тамақтануы мен балаларды шынықтыру, сондай-ақ, механикалық асфиксия мен травматизмнің алдын алу туралы дәрістер оқылады. Отбасылық қарым-қатынас, бала тууға дайындық және серіктеспен бірге босанудың ерекшеліктері тақырыбында арнайы интерактивті оқыту сабақтары, әңгімелесу мен тренингтер ұйымдастырылады.
Шара барлық қалалық емханаларда, «Демеу» оқыту-практикалық отбасылық медицина орталығында, №1 және №2 перинаталдық орталықтарда, №1 және №2 балалар ауруханаларында және қалалық перзентханада өтеді. Айлық 16 маусымға дейін жалғасады.