Астанада әбден тозығы жетiп, қабырғасы әне-мiне құлағалы тұрған үйлер жоқ емес. Бұйыртса, 2017 жылдың аяғына дейін апатты жағдайдағы 157 үй сүрілмек.
Жасыратыны жоқ, өткен ғасырдың 40-60-жылдары қамыстан салынған 2, 3, 4 қабатты үйлер жөндеуге мүлдем келмейдi. Халық арасында «хрущевка» және «ленинградтық» деп аталатын бес қабатты үйлердiң де пайдалану мерзiмi 30-50 жылмен шектеледi. Бас қаладағы тұрғын үй қорының техникалық жағдайын тексеру нәтижесi, сол кезеңдерде салынған үйлер 70 пайызға дейiн тозып кеткенін алға тартады. Оның үстіне конструктивтiк элементтерi апатты жағдайға душар болған үйлердi күрделi жөндеуден өткiзу экономикалық тұрғыдан өте тиiмсiз. Сондықтан апатты үйлердің жайы тек тұрғындардың ғана емес, билікті де алаңдатады.
Жалпы, осы мәселені шешуге арналған пилоттық жобаның бірінші кезеңін 2017 жылдың аяғына дейін жүзеге асыру жоспарланған. Осы уақыт аралығында ескі үйлердің орнына жаңа баспаналар бой көтермек. Қазірдің өзінде жоба аясында Астананың сол және оң жағалауында бірнеше тұрғын үй пайдалануға берілген. Ал, 2018-2020 жылдар аралығында апатты үйлерді бұзудың екінші кезеңі жүзеге асырылады.
Айта кету керек, қала әкiмдiгiне салмақ салатын ауқымды жұмыстардың бiрi – ескi қаланы жаңалау. Ол үшiн бiрнеше бағыттағы жұмыстар қарастырылмақ. Ескi және құлау алдында тұрған үйлердi бұзу, жаңа үйлердiң жобасын жасау және салу үшiн де жүйелi жоспар қажет. Инженерлiк-коммуникациялық инфрақұрылымды жобалау және салу көп уақыт алатын болса, керісінше апатты үйлердің тұрғындары жаңа пәтерлерге тезірек көшуді қалайды.
Егер бұл шаралар өз кезеңiмен жүзеге асып, апатты үйлер азайса, елорданың сәулеттiк келбетi жақсаратыны сөзсіз.
Гүлмира АЙМАҒАНБЕТ
