Апта айнасы
АПТА ҮЗДІГІ
Осы аптада қазақтың танымал музыканты, скрипкашы Марат Бисенғалиев әйгілі ағылшын композиторы Эдвард Элгардың шығармашылығын зерттеуге қосқан үлесі үшін «Элгар Фаундэйшн» америкалық қорының алтын дискісімен марапатталды
Франция астанасы Парижде өткен бұл шараға мәдениет қайраткерлері, ҚР Сыртқы істер министрлігінің және бизнестің өкілдері қатысты.
Атақты музыкантқа кеш барысында алтын дискімен қоса австралиялық суретші Ральф Лиллифордтың Эдвард Элгарды бейнелеген портреті тарту етілді.
АПТА АНЫҒЫ
Осы аптада «Қазақстан Республикасының мемлекеттік қызмет мәселелерi бойынша кейбір заңнамалық актілеріне өзгерiстер мен толықтырулар енгiзу туралы» Қазақстан Республикасының Заңы өз күшіне енді. Заңға сәйкес, бұдан былай еліміздегі мемлекеттік қызмет тізімінен «бастық» сөзі алынып тасталды.
«Бастық» сөзі тек «ҚР Президенті кеңсесінің бастығы» лауазымында, құқық қорғау жүйесінде, Қорғаныс министрлігінде сақталып қалады.
«Себебі, бұл жүйелерде мемлекеттік қызметшілер мен басшылар арасындағы қарым-қатынас басқа қағидаларға негізделген» дейді ҚР Мемлекеттік қызмет істері жөніндегі агенттіктің төрағасы Әлихан Бәйменов. Сондай-ақ, оның айтуынша, «бастық» сөзі теріс ұғымға айналып кеткен. Сол себептен мемлекеттік қызметші лауазымындағы жаңа тізілімнен алынып тасталған.
АПТА ҰСЫНЫСЫ
Тұрсынбек ӨМІРЗАҚОВ, Мәжіліс депутаты
«Қазақстандықтардың 70 пайызы дәрігерлердің жұмысына наразы. Оның үстіне, соңғы кездері науқас пен дәрігер арасындағы кикілжіңдер күрт көбейіп кетті. Қай тараптың айтқаны дұрыс болса да, қолдарында дәлелі жоқ. Егер мемлекеттік мекемелерде бейнебақылау орнатар болсақ, біріншіден, жұмыстың тиімділігін арттырамыз, екіншіден, қоғамдағы көптеген түсініспеушілікті шешеміз. Ресей мұндай жүйені бекітіп, қазір қолданысқа жіберді, нәтижесі де жаман емес. Тіпті, жеке басымнан өтті, дәрігердің өз ісіне салғырттығы салдарынан жақын туысымды жоғалттым. Ақыры дәлелдей алмай, әуре-сарсаңға түстік. Бұл тек бір ғана мысал, шын мәнінде, бұл мысалдың мыңдаған екені жасырын емес».
(«Алаш айнасы» газеті)
АПТА ЖАҢАЛЫҒЫ
Осы аптада Ұлттық банк 2000 теңгелік жаңа банкнотаны айналымға шығарды
Өлшемі 139х73 мм болатын жаңа 2000 теңгеліктің дизайны да өзгерген. Қою және ашық жасыл түсті банкноттың оң жағында «Қазақ Елi» монументі, ортада ұшып жүрген кептердің бейнесі орналасқан. Төменгі бөлігінде киіктің, жоғары бөлігінде Қазақстан Республикасының мемлекеттік нышандары елтаңба және ту бейнеленген. Сол жақ төменде және жоғары жақта номиналдың цифрлық белгіленуі басылған, сол жақта ортада номиналдың мемлекеттік тілдегі әріптік белгіленуі жазылған. Ал, сыртқы бетінде Ертіс өзені бейнеленген Қазақстан картасының сұлбасы көлденеңінен орналасқан. Оң жағында киіз үй және мемлекеттік тудың бейнелері бар ені 13 мм голографиялық жолақ орналасқан.
Аптаның есеп-қисабы
Астана қаласы Статистика департаментінің осы аптада таратқан мәліметі бойынша, Астанада наурыз айында күнбағыс майы, май, қант, құс еті, қарақұмық сияқты әлеуметтік тағамдар мен бірқатар көкөністердің бағасы біршама төмендеген.
Нақтырақ айтқанда, қарақұмық – 2,7 пайызға, күнбағыс майы – 1,4 пайызға, қант – 1,3 пайызға, тауық еті 0,6 пайызға арзандапты.
Сондай-ақ, макарон өнімдері 2,4 пайыз, тұз бен шай 2,2 пайыз, жұмыртқа 1,4 пайыз, айран 0,4 пайыз арзан бағаға сатылған.
Көкөніс өнімдерінің бағасы да қарапайым халық үшін қолжетімді бағада болды. Өйткені, пияз алдыңғы айлармен салыстырғанда 5,8 пайызға, картоп 2,2 пайызға, орамжапырақ пен сәбіз 2,1 пайызға төмендетілді.
Естеріңізде болса, Статистика департаменті биылғы ақпан айында ет бағасының да айтарлықтай төмендегенін хабарлаған болатын.
АПТА АҚПАРЫ
4 сәуірден бастап Парламент Мәжілісінің депутаттары ел өңірлерін аралауға шығады.
Осы аптада «Нұр Отан» ХДП фракциясының мүшелері бас қосып, маңызды сапар қарсаңында алдағы жұмыстың көкейкесті мәселелерін талқылады.
Мәжіліс Төрағасы, «Нұр Отан» фракциясының жетекшісі Нұрлан Нығматулин депутаттарға айналысып жатқан жұмысынан алшақ кетпеуі тиіс екендігін атап көрсетті. «Әрбір заң жобасы бірінші кезекте адамдар өмірін жақсартуға бағытталуы шарт» деді ол.
Депутаттар аймақтарда 13 сәуірге дейін болады. Ал кездесулер тікелей еңбек ұжымдарында, өндірістерде, сондай-ақ, әлеуметтік нысандарда өткізіледі деп жоспарланып отыр.
АПТА ЗЕРТТЕУІ
ҚР Ұлттық банкінің мәліметінше, Қазақстанда бір банкоматқа – 1860, 1 терминалға 483 адамнан келеді екен.
Ал, Ресейдегі жағдаймен салыстыратын болсақ, онда 2012 жылдың басында 1 терминалға – 270, ал бір банкоматқа 1007 адамнан келіпті.
Еліміздегі бүгінгі күні 33 мың 318 POS-терминал бар болса, оның 27 мың 325-і сауда және қызмет көрсету орындарында орнатылған. Сондай-ақ, 8 мың 652 банкоматтың 1040-ында ақша қабылдау қызметі қарастырылған.
АПТАНЫҢ «КЕРЕКТЕРІ»
Шәкір ЫБЫРАЕВ,
Түркі академиясының президенті:
«Наурыз мерекесінің түпкі атрибуттары мен ғұрыптық рәсімдерін жүйелі жолға қойып, ол үшін «Наурызнама» ма, басқа ма, әйтеуір, мемлекеттік деңгейдегі мәдени бағдарлама қабылдау керек»;
Сейітқазы МАТАЕВ,
Қазақстан Журналистер одағының басқарма төрағасы:
«Бұқаралық ақпарат құралдарының өкілдеріне салынатын айыппұл көлемін азайту керек»;
Азат ПЕРУАШЕВ,
ҚР Парламенті Мәжілісінің депутаты:
«Кез келген зейнетақы қоры банкротқа ұшыраса, онда салымшылар қаражатынан айырылады. Сондықтан, бірыңғай зейнетақы жүйесін құру керек».
Шынар ДОСАН