Мемлекет басшысының 31 қазандағы Жарлығына сәйкес Президент Байрағына жаңа өзгерістер енгізілген болатын.
1 желтоқсан — Тұңғыш Президент күніне орай Астанада Қазақстан Республикасы Президентінің жаңа Байрағын көтеру салтанатты рәсімі өтпекші. Бұл туралы кеше ҚР Президенті жанындағы Орталық коммуникациялар қызметінің ресми өкілі Алтай Әбибуллаев хабарлады.
Ресми өкілдің айтуынша, Астанада осы аптада өтетін іс-шаралардың дені тұңғыш Президент күніне орайластырылғалы отыр.
28 қарашада Парламент Мәжілісі «Қазақстан Республикасының Тұңғыш Президенті, Ұлт Көшбасшысы Нұрсұлтан Назарбаевтың Қазақстан Республикасы парламентаризмінің қалыптасуындағы рөлі» атты конференция өткізеді. Жиынға белгілі саясаткерлер, депутаттар мен қоғам қайраткерлері қатыспақшы. Осы үнқатысу алаңында Елбасының Қазақстандағы заңнамалық органның қалыптасуы мен дамуындағы айрықша рөлі талқыланатын болады.
Өткен аптада аймақтарды аралауға аттанған Парламент Сенаты мен Мәжілісінің депутаттары Мемлекет басшысының Жолдауы мен «Қазақстанның әлеуметтік жаңғыртылуы: Жалпыға ортақ Еңбек қоғамына қарай жиырма қадам» атты бағдарламалық мақаласын халыққа түсіндіру жұмыстарын жалғастыратын болады.
30 қарашада «Ұлы Жібек жолы» Халықаралық жастар бірлестігі мүшелерінің алғашқы Кеңесі өткізіледі деп жоспарланып отыр. Кеңесте Азия, Африка және Еуропаның 25 мемлекетінің өкілдері мәдени-гуманитарлық интеграцияны кеңейту, мәдениетаралық үнқатысуды дамыту мен нығайту мүмкіндіктерін қарастырмақшы.
Аптаны айшықтайтын тағы бір айтулы шара – «Тәуелсіз Қазақстанның қалыптасуындағы президенттік институт» атты халықаралық конференция болғалы отыр.
Конференцияға қатысушылар президенттік институтты жетілдіру, сондай-ақ, мемлекеттік дамудағы Президенттің көшбасшылығы тақырыбы төңірегінде ой-пікірлерін ортаға салады.
30 қарашада Мемлекет басшысы еліміздің бас шыршасының шамдарын жағады.
Елбасының қатысуымен өтетін Қазақстанның барлық деңгейдегі әкімдерінің кеңейтілген мәжілісі де осы аптада өтпек. Отырыс барысында аймақтарды дамыту, индустриялық-инновациялық жобаларды іске асыру, әлеуметтік-экономикалық міндеттер, сондай-ақ, мемлекеттік бағдарламаларды жүзеге асыру мәселелері кеңінен талқыланады.
Шынар ДОСАН
