«AQMOL» – азық-түлік дүкені
Кеше елордада «Астана төңірегіндегі азық-түлік белдеуі» бағдарламасы аясында «Aqmol» сауда үйі желісінің тағы бір дүкені ашылды.
Азық-түлік дүкенінің ашылу салтанатына Астана қаласының әкімі Бақыт Сұлтанов пен Ақмола облысының әкімі Мәлік Мырзалин қатысты. Кәсіпорын мамандары қала және облыс басшысын шағын маркеттің жұмысымен таныстырды.
– Бұл дүкен сөрелеріндегі азық-түлік Ақмола облысының тауар өндірушілерінен делдалсыз тікелей тасымалданатындықтан, нарықтағы бағадан 20-45 пайызға дейін төмен болады. Әсіресе, базарға баруға уақыты бола бермейтін тұрғындар үшін бұл дүкен өте тиімді. Сондықтан Ақмола облысындағы серіктестерімізбен сауда саласындағы осы жобаны әрі қарай да дамытатын боламыз. Бұл, бір жағынан, табиғи әрі сапалы өнім өндіретін ақмолалық кәсіпорындарға да ыңғайлы болмақ, – деді қала әкімі Бақыт Сұлтанов тілшілерге берген сұхбатында.
Шағын маркетті аралап шыққан соң ең бірінші болып сауда жасаған қала басшысы дүкен жұмысына сәттілік тіледі.
Бұл – Ақмола облысының Астанада ашылып отырған бесінші шағын маркеті. «Aqmol» сауда желісінің елордадағы алғашқы дүкені өткен жылдың желтоқсанында ашылған. Қазіргі уақытта 118 компаниямен жұмыс жасайтын сауда желісіндегі 3500 тауардың 800-ін Ақмола облысының 30 кәсіпорны жеткізіп отыр.