Сәкентану ілімі жаңа еңбектермен толықты. Қазақстанның еңбек сіңірген әртісі, өнертанушы Серік Оспанов ҚР Ұлттық мұрағатында «Сәкен Сейфуллиннің музыкалық мұрасы» кітабы мен «Сыр сандық» атты Сәкен әндерінің СD үнтаспасының тұсаукесерін өткізіп, үлкен тұлғаның 120 жылдық мерейтойына тамаша тарту жасады.
Жарық көрген туындылар, автордың айтуынша, бес жылғы ізденістің жемісі. Ұлтымызда «Аманатқа қиянат жүрмейді» деген сөз бар. Сол ұлтымыздың жоғалып бара жатқан талай ән-күйін қараңғы қапастан жарық күнге алып шыққан, әдебиет, өнер туралы сөйлесе, төгілте жөнелетін қара сөздің жорғасы, марқұм Ақселеу Сейдімбек Серік інісін Сәкеннің музыкалық мұрасын зерттеуге бағыттады. Жазыла бастаған еңбектің қолжазбаларын өзі оқып, ақыл қосып отырды. Алайда, көпке ұзамай дүниеден өтіп кетті. «Осыдан кейін бастаған жұмысты қалай тастайсың? Оны аяқтау парызым деп санадым. Оның үстіне Ақселеу ағамның аманаты ретінде қабылдап, құлшына түстім» дейді Серік Оспановтың өзі бұл жөнінде.
Іргелі істің басында Ақселеу тұрғаннан соң оның баянды аяқталмауы тиіс емес еді. «Сәкеннің музыкалық мұрасы» кітабының алғысөзінде сәкентанудың бастауларында тұрған әдебиеттанушы ғалым Тұрсынбек Кәкішев бұл туралы: «Жинақ, әсіресе, өнерсүйер қауым үшін таптырмас олжа және бұл еңбек көптен күткен сәкентану ғылымына қосылған тың, сүбелі үлес деп бағалаймын» дейді. Ал, Қазақстанның Халық әртісі, қазақ ән өнерінің білгірі Қайрат Байбосынов: «Сәкен Сейфуллин туралы жазылған еңбектер ұшан-теңіз. Алайда, бұл еңбектің ерекшелігі – тың деректерге толы және қазақ өнерінде бірінші рет барлық әндері нотаға түсіріліп тұрғандығында» деп баға береді.
Шындығында да Сәкеннің ел арасында «Тау ішінде», «Біздің жақта», «Көкшетау», «Ақсақ киік», «Сыр сандық» сынды көп болса бес-алты әні ғана айтылып жүр. Ал, кітаптың авторы оның өзге де әндерін тауып, оннан асырды. Және айтамын деген музыкалық сауаты бар әншілер лезде үйренуі үшін дәулескер күйші, Қазақ ұлттық өнер университетінің оқытушысы Жанғали Жүзбай мен дәстүрлі әнші Қайрат Айтбаевқа нотаға түсіртіп, тайға таңба басқандай етіп кітабына енгізді.
Сәкен өз жанынан ән шығарып қана қоймай, қазақ өнерінің үлкен жанашыры болды. Мәселен, Халық комиссарлары кеңесінің төрағасы қызметін атқарып жүргенінде өнер зерттеуші, этнограф Александр Затаевичке «Қазақтың 1000 әні» жинағын шығару үшін 2480 рубль қаражат бөлгізді. Жарыссөзге шыққандардың: «Онсыз да жеткіліксіз республика бюджетін Орынбордағы шеберханаларды жаңғыртуға, қызыл әскерді қаржыландыруға бөлінсін» дегендеріне қарамады. Өзі де А.Затаевичке екі күй, төрт ән орындап беріп, жаздырады.
Осы күндері Серік Оспановтың өзі, әнімен елді тамсандыратын Бекболат Тілеухан және жас әншілер орындап жүрген «Ақтамбердінің толғауы» сынды озық туынды да Сәкеннің арқасында елге жетті. Өз заманында қазақ өнерінің талай марғасқаларымен аралас-құралас болған Сәкен мұны Шашубай Қошқарбайұлынан жазып алған екен.
Тәуелсіздігімізді алған тұсымыздан атаулы мерекелерде алыстағы аудан мен шалғайдағы ауылдарға өнер шашу әрі медициналық қызмет көрсету мақсатында тоқтайтын мәдениет пойыздары да жайдан-жай ойластырған дүние емес екен. Оның «арғы атасы» кезінде Сәкен ұйымдастырған «Қызыл керуен» болып шықты.
«Сәкеннің музыкалық мұрасы» еңбегінен осындай және өзге де көптеген жаза берсең таусылмас тың деректерді табуға болады.
«Сыр сандық» СD үнтаспасына келсек, онда тұңғыш рет Сәкеннің елге белгісіз болып келген әндері техникалық өңдеуден өтіп, бірізділеніп үнтаспаға түсірілді. Және бір құндылығы – аға буынға жақсы таныс, алайда, жас ұрпақ дауыстары түгілі аттарын білмейтін Суат Әбусейітов, Майра Жүрсінова, Игілік Омаров, Гүлбаршын Ақпанова сынды әншілердің орындауындағы әндер таспаланған. Мұнда тағы Сәкен «ақтардың» қолына түсті дегенде әкесі Сейфолла күңіреніп шығарған «Қосбар» күйі мен анасы Жамал сүйіп орындаған «Кидім камзол» халық әні де енгізілген.
Екі еңбектің де жарық көруіне мемлекет және қоғам қайраткері Оралбай Әбдікәрімов қолдау көрсетті. «Игі іс дегенде көмектерін аямаған осы және өзге де көптеген азаматтарға Алланың нұры жаусын!» дейді автор.
