ӘР БАЛАНЫҢ БІР БАҚЫТЫ БАР
Н.БАЙЫРБЕК: Бала десе ет-жүрегі елжіремейтін адам кемде-кем. Біз солай ойлаймыз. Әйтсе де, баланы әркім әрқалай сүйеді екен.
Кейіпкеріміз, екі бірдей мүгедек баланы мәпелеп өсіріп отырған жас ана Әйгерім Асанованы тыңдап көрелік.
Ә.АСАНОВА: Менің екі балам бар. Бірақ, екеуін босанған кезде де денсаулығында кемістіктер болып туылды. Бірінші балам дүниеге келісімен, екі күннен кейін оның «қасқырауыз» екені анықталды. Яғни, ауыз қуысындағы үстіңгі таңдайы жоқ екен. Дәрігерлер тексерді, генетикалық жағынан ешқандай кілтипан таба алмады. Сөйтіп, жолдасымыз екеуміздің қанымыз сәйкес келмейді деп айтты. Оны да тексерттік. Бірақ, кейін ол да расталған жоқ. Сонымен, тағдырдың жазғаны шығар деп, көңілдегі кірбіңді елемеуге тырыстық. Баламыздың аузына ота жасату үшін жүгірдік. Сөйтіп үлкен қызымыз он бір айлық болғанда бірінші рет Ана мен бала орталығында ота жасаттық. Хирург дәрігер ота жасатып жатқан ата-аналардың бәрі пәленбай доллардан тастап кететінін айтып, бізге емеурін танытумен болды. Шамамызға қарай біз де ақша бердік. Квотамен барған болсақ та. Алайда, арада бірнеше ай өткенде ота жасап, тіккен ауыз қуысындағы таңдай еті қайтадан жыртылып кетті. Ота сәтсіз болды. Сөйтіп, бір жылдан кейін қайтадан ота жасатуға тура келді… Бұл уақытта мен екінші балаға жүкті болатынмын. Оны алдырғым келген жоқ. Өйткені, сәбиді Алланың берген бір сыйы деп қабылдадым. Ол бала жеті айлығында дүниеге келді. Яғни, шала туылды. Өкінішке қарай, екінші қызымның да дамуы ойдағыдай болмай шықты. Дәрігерлер сәби туылғанға дейін ештеңе анықтап, ештеңе айтпаған соң бұл мен үшін күтпеген жағдай еді. Баланы көргенде өзім шошып кеттім. Өйткені, оның оң қолында төрт саусақ, ал аяқтарында тағы да солай бірігіп біткен саусақтар болды. Екі аяғында да сондай кемістіктер бар. Дәрігерлер шала туғандықтан, қызымды жан сақтау бөліміне алып кетті. Кейін оны көруге барғанда ауыр күйге түстім. Бөлімдегі бас педиатр мені кабинетіне шақырып, отырғызып қойып, жекіре сөйледі. «Бірінші балаң ауру бола тұра екінші баланы неге көтердің? Бірінші балаң да, екінші балаң да ауру. Ертең өскен соң олар сені кінәлайтын болады. Алды-артыңды неге ойламадың? Енді сен жағдайды ушықтырма, баладан бас тарту қағазын жаз да, осында қалдырып кет. Ол ертең адам болмайды. Тіпті, тірі болса да, не жүре алмай, не сөйлей алмай, миы дамымай, мүгедек болып қалады» деді. Мен қорыққанымнан анама телефон шалдым. Жағдайды айттым. Анамның бір құрбысы болатын, мүгедек қызы бар еді. Жасы он төртке келсе де, әлі күнге төсекте жататын. Ми жағынан дамымай қалған. Не жүрмейді, не сөйлемейді. Сол бала үшін күйеуі отбасын тастап кеткен. Анам сол әйелді есіме салып, өзінің мен үшін алаңдайтынын айтты. Сөйтіп: «егер дәрігерлер баланы тастап кет десе, тастап кет. Мен сенің өмір бойы мүгедек баламен арпалысып өткеніңді көре алмаймын. Мен де анамын, сен баланы ойласаң, мен сені ойлаймын», – деді анам. Бұдан соң ұзақ ойландым. Бір жағынан қатты қорықтым. Баланың болашағы жоқ болса, онда несіне оны алып кетіп, бауыр басып, өзімді қинауым керек дедім. Сәбидің өмір сүретініне сенген жоқпын. Сөйтіп, баланы шынымен қалдырып кетуге бел будым… Екі-үш күн шыдадым. Баламды көруге бармай қойдым. Үшінші күні жан сақтау бөлімінің бас педиатры маған келді де, баладан бас тарту қағазын жаз деді. Мен қайтадан ойландым. Сол сәт анаммен ғана сөйлесіп отырғанмын. Бірақ та соңғы сәтте анам да өз ойын жасырмады. Қаншама жетім балалардың шетелдіктерге беріліп жатқанын, ауру балалардың донорлық мақсатта пайдаланылуы мүмкін екенін айтып, жылады. Мен сол сәтте баламды соңғы рет көріп қалайыншы деп, реанимациядағы сәби жатқан шынының қасында жылап тұрғанмын. Шала туылған сәби өте кішкентай еді. Бірақ дем алып, ұйықтап жатты. Шынымен баламды өсіріп, органдарын алып саудаға салып жатса, не болады деген ой менің жүрегімді ұшырды. Қанша дегенмен, іштен шыққан балам емес пе, өзімнің қалай қатыгез ойларға беріліп кеткеніме өкініп, тағы да жылап алдым. Сөйтіп, баламды қалдырғым келген жоқ. Дәрігердің әкеліп қалдырған қағазын жыртып тастадым да, баламды алып кететінімді айттым…
Р.ЖҰМАБЕКОВА: Қазір жолдасыңызбен бірге тұрасыз ба?
Ә.АСАНОВА: Иә.
Р.ЖҰМАБЕКОВА: Кішкентайыңыз қазір нешеде?
Ә.АСАНОВА: Үш жарым жаста.
Р.ЖҰМАБЕКОВА: Бала сөйлей ме?
Ә.АСАНОВА: Аллаға шүкір, сөйлейді. Екі жасынан бастап жүрді. Бірақ, екі жасқа дейін баланың өздігінен жүре алмай жатқанын көріп, мүгедектікке шығаруға талпынғанымда көптеген қиындықтарға тап болдым. Дәрігерлер баланы мүгедекке жатпайды деп, бет бақтырмады. Бірақ оның аяғының кемістігі бір бөлек, қолында төрт саусақ қана бар, өз бетінше не қасық, не қалам ұстай алмайды ғой. Осыны айтып, қанша жүгірсем де, еңбекке жарамдылық жағдайын тексеретін сарапшы-дәрігерлер баланы мүгедектер қатарына жатқызған жоқ. Ол кезде мен тіпті қызымның жүріп кететініне де көзім жетпейтін еді. Бір аяғы қысқалау. Сөйтіп, анда жүгіріп, мында жүгіріп, амалсыз сол кездегі Үкімет басшысы Кәрім Мәсімовке хат жаздым. Екі баламның жағдайын айтып, екеуін де мүгедектер қатарына қоспай отырғанын айтып, шағындым. Содан кейін ғана әлгі орталықтың сарапшы дәрігерлері хабарласып, екі баламды да мүгедектікке шығарып берді.
Жалпы мен үлкен қызыма екінші рет ота жасатқанда, Аллаға шүкір сәтті өтті. Қазір қызым бес жасқа таяды. Соңғы жылдары әйтеуір сөздерін түсіне бастадық. Өзгелер түсінбесе де, әкесі екеуміз ұғамыз. Сондықтан, ол баланы мүгедектіктен шығарған. Ал екінші қызыма әлі ота жасатқан жоқпыз. Өйткені, аяғын басып, енді ғана жүріп жүрген соң, қорқып отырмын. Отадан соң қайтадан жатып қала ма деп қауіптенемін.
Р.ЖҰМАБЕКОВА: Негізінде, халықтың ғасырлар бойғы жинаған тәжірибесі бойынша, сіздікі дұрыс. Бала бес жасқа дейін өсіп-өніп, тәрбие алып, алғашқы қалыптасу кезеңінен өтуі керек екен. Сондықтан, әлгіндей үлкен отаға бес жастан соң апарған дұрыс та шығар.
Өздеріңіз қай жақтан келдіңіздер?
Ә.АСАНОВА: Көбісі бізге «Семей жақтан келген жоқсыңдар ма?» деп жатады. Бірақ, біз ол аймақтан емеспіз. Мен оңтүстіктенмін. Жолдасым Қарағандыдан. Бірақ біз бәрінен сұрастырып жүрміз, ата-бабаларымызда мұндай кемістіктер болған емес. Туыстарымыздың арасында да ондай жоқ.
Р.ЖҰМАБЕКОВА: Рас, экологияның салдарынан деп тапса, бәрі Семей жақты ойлайды. Бірақ Семейден де басқа жерлерде экологиялық проблема көп.
Н.БАЙЫРБЕК: Рысты Мағауияқызы, сізге бір сұрақ. Әйгерім Мәсімовке хат жазғанға дейін баланы мүгедектікке шығара алмай келдім деп отыр. Оның аяқ-қолындағы кемістіктерге қарамай, тексеруден кейін дәрігерлер сау адамның қатарына жатқызып отырған. Яғни, кемістікпен туылған баланың кілтипансыз дамитынына сенім білдірген. Осы қаншалықты заңды?
Р.ЖҰМАБЕКОВА: Бұл жерде, сөз жоқ, баланың құқы бұзылған. Неге десеңіз, оның туа бітті кемістіктерін көзбен көре отырып сарапшы дәрігерлердің мүгедектікті растамағаны дұрыс болмаған.
Л.ҚОЙШИЕВА: Әрине, құқы бұзылған. Ал мүгедектікке шығарса, ол баланы асыраушы адамға аз да болса әлеуметтік көмек болар еді ғой.
Н.БАЙЫРБЕК: Жалпы мүгедектікке шығару мәселесінде осындай қисынсыздық көп болып тұратынын білеміз. Ал балаларға қатысты мұндай құқық бұзушылық бізде, Астана қаласында қаншалықты жиі орын алады?
Р.ЖҰМАБЕКОВА: Мен оны нақты айта алмаймын. Неге десеңіз, бізге шағымданған немесе осындай оқиғаның тіркелген кезі болған жоқ. Бірақ, бұл баланың құқы мүлдем бұзылмайды дегенді білдірмейді. Менің ойымша, әсіресе баланы мүгедектікке өткізу мәселесінде алдымен баланың әлеуметтік жағдайын ойлау керек. Әлеуметтік жағдайын жасау деген – ол баланың құқын қорғау деген сөз. Яғни, ол денсаулығына ғана қатысты мәселе емес. Сол себепті де, қазір медицина саласына әлеуметтік жағдай деген ұғым енгізіліп жатыр.
Екіншіден айтқым келетіні, көп жағдайда біздегі ата-аналар баланың құқына тым селқос қарайды. Көбінесе келмейді, мәселені айтпайды. Мынадай жағдайда да, кеңес өкіметінен келе жатқан ұғым болса керек, мемлекеттік мекеме айтса болды, соған сеніп, бас шұлғып жүре береміз. Дұрысы, Әйгерім секілді, баланың құқын талап етіп, тиісті орындарға хат жазып, жүгіру керек. Әркім қай жерде болса да баласының құқын қорғай білуі қажет.
Бұл жерде, мысалы, Әйгерімнің екі баласынан да бас тартпай, мәпелеп, өсіріп отырғаны – өзгелерге үлгі болатын жағдай.
Л.ҚОЙШИЕВА: Бұл – үлкен ерлік.
Р.ЖҰМАБЕКОВА: Иә, ерлік. Негізінде, баланың құқын қорғау деген отбасынан басталады. Тіпті, сәби ананың құрсағында жатқан кезден бастап оның болашағын ойлап, бала бақыты үшін күресті бастау қажет.
Л.ҚОЙШИЕВА: Бізде осындай кемістігі бар балаларды гимнастикамен немесе басқа да шаралар арқылы дамытуға, олармен жұмыс істеуге арналған орталықтар бар ма? Олар тегін жұмыс істей ме?
Р.ЖҰМАБЕКОВА: Бар. Астанада балаларға арналған үш оңалту орталығы бар.
Л.ҚОЙШИЕВА: Ал Әйгерім, сондай тегін орталыққа балаларын апарып, игілігін көрді ме екен, соны сұрағым келіп отыр.
Ә.АСАНОВА: Мен кішкентай баламмен әлі барған жоқпын. Бірақ үлкен қызымды апарғанымда, онда сал ауруымен ауыратын балалар көп жататынын көрдім. Олардың миы дамымай қалған, сондықтан, аяқ-қолдарын игере алмайды. Қозғалуы қалыпсыз. Сондықтан, қызым ол балалардан шошып, жылады. Сөйтіп, барғысы келмеді. Сол себепті, біз де апармайтын болдық. Бірақ қазір логопедтік балабақшаға барады. Отадан кейін тілін түсіне бастадық деп отырмыз ғой, сол бақшада арнайы мамандардың айналысуы арқасында сөйлеуі дұрысталып келе жатыр. Өзі қазір беске таяды.
* * *
Н.БАЙЫРБЕК: Қаламыздағы Мамандандырылған балалар үйінде бір көзі көрмегені үшін ата-анасы бас тартқан балалар бар. Немесе бір қолы қысқа болғаны үшін, жүрегінде тесік болғаны үшін, жалпы осындай денсаулығындағы кемістігі үшін туған баласынан бас тартып жатқан аналар аз емес.
Ғ.ӘБРАЙЫМОВА: Иә, Мамандандырылған балалар үйінде сондай балалар көп. Менің ойымша, біздегі перзентханаларда жас аналармен сөйлесіп, оларға ақыл-кеңес беретін психологтардың, әлеуметтік педагогтардың болмауы – ең үлкен мәселелердің бірі. Әйтпесе, міне, біздің алдымызда Әйгерім өзінің жағдайын айтып отыр ғой. Бұл қызға психологиялық қолдау көрсетіп, дұрыс жол нұсқап, қайырлы нәрсені айтудың орнына ондағы педиатрлар баладан бас тарт деп үгіттеген. Меніңше, бұл дұрыс емес.
Н.БАЙЫРБЕК: Шетелдіктерге жетім балаларды асырауға беру мәселесі бізде он жылдан бері қозғалып келеді. Осы мәселе бойынша қызу пікірталас туындағанда ресми орындардың «шетелдіктерге ауру балаларды ғана беріп жатырмыз» деген уәж айтып келгені де жасырын емес. Ал, шын мәнінде ауырмайтын адам жоқ қой.
Р.ЖҰМАБЕКОВА: Жаңа туған балалардың 80 пайызының денсаулығынан әйтеуір бір ауру табылатыны рас.
Ә.АСАНОВА: Сау болып туылып, бірнеше жылдан кейін ауруы білініп, жатып қалып жатқан балалар да аз емес қой. Сонда біз өзіміз туған баланың бір жері ауырғаны үшін тастап кете беретін болсақ, онда кім болғанымыз? Мен де осыны түсінбеймін. Теледидардан ата-анасы тастап кеткен мүгедек балаларды көрген кезде жүрегім ауырады. Ондай кезде, шынымды айтсам, отырып жылап аламын. Өйткені, өзімнің қызымды туған кездегі жағдай есіме түседі.
Менің ойымша, әрбір бала өмірге келгеннен кейін, оған Алланың нәсіп еткен бір бақыты болмауы мүмкін емес. Тіпті, баланың бір жері кеміс болып туса да, оның басқа бір сезімі, басқа бір қабілеті өзге балалардан артық болып туатынына өз басым күмәнданбаймын. Мысалы, менің балаларымның дене мүшелерінде кемістігі болғанымен, олардың ойлау қабілеті, миының дамуы жағынан кейбір балалардан әлдеқайда артық екенін өзім білемін. Олар өмірге құштар болып келеді. Өмірді сүйеді.
Р.ЖҰМАБЕКОВА: Әйгерімге қарап, мына бір нәрселер ойыма түсіп отыр. Балалардың құқын қорғау департаменті болғаннан кейін бізге неше түрлі жағдайдағы ата-аналар келеді. Кеше ғана кәмелетке толмаған балалардың құқын қорғау мәселесі бойынша комиссияның мәжілісі болып өтті. Жиынды Білім басқармасының басшысы Әсима Бимендина өзі жүргізді. Біз соның мүшесіміз. Сонда айтайын дегенім, соңғы үш-төрт жылда бізде баласынан бас тартып жатқан ата-аналар өте көп. Әйгерім өзінің туған баласының мүгедек болатынын, дене мүшелерінде кемістік барын біле тұра, оны жетімдер қатарында тастамай, алып кетіп, мәпелеп өсіріп отырса, былайғы өмірде сап-сау, әп-әдемі балаларын «мен мұны асырай алмаймын» деп тұрып, тастап кетіп жатқандар бар. Тіпті, он төртке келген, өсіп қалған баласын солай әкеліп, жетімдер үйіне өткізіп кеткендерді көріп жүрміз. Ондай ата-анаға неге өйттің деп, қаттырақ сөйлей бастасақ, «сендердің жұмыстарың болмасын, менің жағдайым жоқ, өзім ауырамын. Баланы асыраймын ба, жоқ па, өзім білемін» немесе «тұрғын үйім жоқ», «пәлен жоқ, түген жоқ» деп тұрып алады. Өкінішке қарай, солардың көбі – өзіміздің қаракөздер.
Осы мәселені қалай шешу керек, не істеу керек, Астанаға кілең күнін көре алмай жүрген, азып-тозған азаматтар келіп алып, баласынан бас тартып жатыр ма, әлде басқа себебі бар ма – осыны зерттеу керек болып тұр. Өйткені, басқа жақтарды білмеймін, дәл біздің Астанада осындай жағдайлар көп. Өткен 2012 жылдың өзінде Астана бойынша біз 17 ата-ананы құқынан айыруға мәжбүр болдық.
Н.БАЙЫРБЕК: Өз талаптары бойынша ма?
Р.ЖҰМАБЕКОВА: Өз талаптары бойынша.
Н.БАЙЫРБЕК: Расында да, бізде міндетсу, масылдық психология басым сияқты. Мамандандырылған балалар үйіне барғанымызда да, кейбір ата-аналардың жаңа туған сәбиін «Сендер мемлекеттік мекемесіңдер, баламды бағып беруге міндеттісіңдер»,- деп тұрып, сәбилерге уақытша қарайтын бөлімге әкеліп, баласын өткізетін көрінеді.
Р.ЖҰМАБЕКОВА: Иә, солай сөйлейді.
Н.БАЙЫРБЕК: Шын мәнінде, баланың бес жасқа дейінгі тәрбиесі оның бүкіл адамның болмысының негізін құрайтыны рас болса, осы сәби шағында оның бойына мейірім ұялатып, өзіміз балаға мейіріммен қарауымыз қажет емес пе. Ал «сен қара» деп, мемлекеттік мекемеге тасталған баланы кім туған баласындай өбектеп, аймалап отырады? Онда пәленбай бала бар. Ал қызметшілер – олар бәрібір жәй қызметші ғой. Бала күтіміне жұмысым деп қарайды. Ананың мейірімін олар бере алмайды. Бала мейірімге қанбайды. Ал сол баласын тастап кеткен ата-аналардың көбі балалар үйінің тәртібіне бағынғысы келмейді екен. Қалаған уақытта баланы келіп көріп, қызықтап кеткісі келеді. Баласы құдды зообақтағы бір ермек құралы секілді…
Жалпы, осы жағдай, балалардан бас тарту оқиғаларының көбейіп кеткені туралы психолог ретінде, Лимана апай, сіз не айтасыз?
Л.ҚОЙШИЕВА: Байқағаным, соңғы жылдары жағдайымыз жақсарғанымен, қоғамда қатыгездік, мейірімсіздік белең алып бара жатқан секілді. Бұл еліктеушіліктен бе, әлде адамдардың бойын өзімшілдік билеп алған ба – түсінбейсің. Бұрын қайта заман қиын кезде адамдар арасында мейірімділік, жылылық болатын… Бізде осы қоғамдық келеңсіздікке құрбан болып отырған отбасылар да аз емес. Психологиялық дағдарыс орталығы болған соң, бізге ондай азаматтар көп келеді. Балаларын ұрып соғып, азаптайтын жағдайлардың бар екеніне куә болдық. Мысалға, бір жас келіншек бізге жиі телефон соғатын. Біраз сөйлеседі де, тұтқаны қоя салады. Бірнеше рет осындай жағдай болды. Содан кейін «сен қалай да бізге келуің керек» дедім. Кейін ақыры жолын тауып, әлгі әйел келіп кетті. Сөйтсек, жолдасы осы қалада құқық қорғау органдарының бірінде жұмыс істейді екен. Ол үш жыл бойы келіншегі мен баласын үйінде қамап ұстаған. Бір күні түнде үйінің кілтін ұрлап алып, келіп отыр әлгі әйел. Өздерінің түрлерін көрсеңіз, тұтқында болған адам сияқты, баланың да, келіншектің де түрі боп-боз. Үш жыл бойы күн көрмеген. Одан бөлек баласын ұрып-соғып, аяғынан ұстап лақтырып, қабырғаға соғып, үтікпен қорқытып, білгенін жасап келген ата-аналар да бар екен. Әрине, олар көбірек айтқан сайын, осындай қатыгездікке қарсы шара қолданған сайын аяқ тарта бастайтын шығар деп ойлаймын. Бірақ мұндайды азаптаушының қоғамдағы беделіне, қызметіне қарамай, ашық айтып үйренуіміз қажет.
Н.БАЙЫРБЕК: Өзгені қинағаннан ләззат алатын, садизмге бой алдырған, былайша айтқанда қатыгездікпен ауыратын адамдар не үшін көбейіп кетті деп ойлайсыз?
Л.ҚОЙШИЕВА: Жалпы, ХХІ ғасырдың негізгі дерті – психологиялық дерт деп айтады. Мысалы, сіз қандай адамдарға жақын болып, кіммен көбірек сөйлесіп, кіммен аралассаңыз, сол адамның әсері тимей қоймайды. Бәріңіз де байқайтын шығарсыздар, кейбір адаммен әңгімелескенде жаныңыз рахаттанып, демалып қаласыздар, ал енді біреумен әңгімелескенде шаршап, тұла бойыңыздағы қуат бітіп қалғандай сезінесіздер ғой. Міне, осы – ХХІ ғасырдағы психологиялық қуаттың өте басымдыққа шығып бара жатқанының көрінісі. Бұл ғарыштық деңгейге де байланысты. Интернет секілді электрондық, техникалық құралдардың қолданысқа енуінің де әсері. Жалпы бұрын инфекциялық жұқпалы аурулар көп болған болса, қазір психологиялық ауру көп. Екінің бірінің жүйкесі ауырады. Екінің бірі депрессияда. Екінің бірі күйзеліске бейім. Бүкіл Еуропа осының шегіне жетіп отыр. Ал біз сол жағдайды енді сезіне бастадық. Сондықтан, әрбір мекемеде психологиялық орталық болуы қажет. Олардың халыққа ақысыз жұмыс істеуін қамтамасыз ету керек.
Р.ЖҰМАБЕКОВА: Осы әңгімеден кейін маған бір ой келіп отыр. Мен өзі жасымнан ата-әжемнің қолында өскен баласы едім. Сол кісілердің сөзі әлі күнге жадымда сақталып келеді. Енді өзім бір әулеттің анасы болып отырмын. Немерелерім бар, әжемін. Күнде кешкісін балалар да, бәріміз де жұмыстан шаршап ораламыз. Бірақ, кешкі дастархан басына отырарда ылғи да: «Стөлдің басына тек жақсылықты ойлап, жақсы көңіл-күймен келіңдер»,- деп отырамын. Жаман эмоция, өткен-кеткен – бәрі сыртта қалуы керек деймін. Өйткені, шынында да, адамдар бір-біріне әсер етеді.
Л.ҚОЙШИЕВА: Иә, нағыз тәрбиенің ұясы сол дастарханнан басталады ғой. Дастархан басында айтылған әңгімелер, жақсы сөздер баланың жадында жатталып қалады.
Р.ЖҰМАБЕКОВА: Өкінішке қарай, көбіміз жұмыспен жүріп, сыртта түрегеп жүріп тамақ ішіп, өз берекемізді өзіміз кетіреміз ғой. Оның ағзаға да қаншама зияны бар. Ал кешкі тамаққа үй іші түгел отырғанда дастарханның берекесін кіргізу керек қой. Дастархан басында, расында, өнегелі әңгіме айтылады. Ол өзі біріктіретін, ортақтастыратын бастау тәрізді.
Ж.ШӘКЕНҰЛЫ: Жалпы сіздер айтып отырған мәселелердің көбі – жаһандану дәуірінің, электронды ғасырдың бізге әкелген зұлматтары. Осының біреуі біздің ата-бабамыздан жалғасып келе жатқан имандылық әліппесінің үзіліп қалуы мен ұлтымыздан жалғасып келе жатқан тектіліктің сақталмауы салдарынан. Жетпіс жылдық бодандық әкесін, шешесін, атасын, апасын, әжесін билеп, құлдықтың қамытын кигізіп, арақ пен темекіге үйретіп, гендерін улап үлгерді. Оның асыл тұқымдарын саяси қуғын-сүргін жылдарында өлтірді, қырды. Осыдан соң имандылық, ұлттық құндылық азайды. Сәбиді келешекке дайындау, үлкен мақсаттарды ойлау мүлдем қалды. Шын мәнінде біз әрбір қыз балаға ұлттың анасы деп қарауымыз керек. Қызымызды қолымызға гүл ретінде ұстап, өзгелердің көзін қыздырып жүру үшін өсірмей, болашақ бір әулеттің, ұлттың анасы деп тәрбиелеуіміз қажет. Ол үшін баланы құрсаққа біткен күннен бастап оны тәрбиелеуді ойластырған абзал. Құрсақта жатып-ақ анасының, сырттағы адамдардың дауысын ести бастайтын сәби сол құрсақтан жақсы сөз естуі керек. Адал ас сіңіруі қажет.
Мен көп жағдайда ұялы телефонымды өшіріп қоямын. Неге? Өйткені, ол ойды бұзады. Мысалы, мен жарты сағат жұмыс істеп отырып, арасында бір телефон қоңырауына жауап беретін болсам, қайтадан жазуға отырғанда алдындағы ойдың жалғасын жоғалтып аламын. Бұның бір дәлелі, сіз, мысалы, екі-үш ұялы телефонды қойып, солардың арасына бір жұмыртқа мен бір жүгері, сосын тағы бірдеңені бір-біріне жалғап қойып қойыңыз. Телефон қоңырауы әлгі заттарды талқандап тастайды. Байланысын бұзады. Тіпті жұмыртқаның ішіндегі уыздарын да өзгертіп, талқандап жібереді. Ал осындай миы талқандалған ана мен әкеден туған бала ертең қандай болады? Бүгінгі балалар туа сала еңбектеп барып ұялы телефонға жабысады. Неге? Өйткені, біз тумай жатып оларды сол телефонға үйір етіп қойдық қой.
Н.БАЙЫРБЕК: Іште жатқаннан сондай ақпарат сіңдірдік дейсіз ғой?
Ж.ШӘКЕНҰЛЫ: Иә. Телефонды «сенің қажеттілігің мынау» деп, оған жеткізіп қойдық. Ал шын мәнінде оған құрсақта жатқанда берілуге тиіс ақпарат жаңағы имандылық болатын. Ата-бабамыздан қалған бекзадалық, тазалық, тектілік болатын.
Өткенде радиода сөйлеп жатқан имамға бір ана сұрақ қойып жатыр. «Осылай да осылай, мен балама барымды беріп өсіріп едім, төбесінен құс ұшырмап едім. Енді әбден өсіріп, тұғырына қондырып, рахатын көремін бе деп отырғанымда, мені мынау қарттар үйіне әкеліп тастады» деді. Сонда имам: «жарайды, сіз балаңызға ішкізген, жегізген шығарсыз. Бірақ сол баланы құрсаққа біткеннен, тым құрыса туғаннан бастап имандылыққа тәрбиелей алдыңыз ба?» деді… Міне, бұл мәселенің жауабы – осы. Біз баламызды харам тамақтармен ауыздандырып, тойдырып, жеткізген соң, оның бойына имандылық дарыта алмаған соң, әрине, ертең өзімізге тиісті жауабымызды аламыз.
Біз бүгін сол жағдайды бастан кешіп отырмыз. Кемтар балаларды аямайтынымыз, сап-сау баланың өзін тастап кете беретініміз содан.
Ал Әйгерім қызымыздың басындағы жағдайды Алланың сынағы деп қабылдау керек.. Жалпы бала кемтар болып туылып, қиыншылыққа тап болып жатсақ, бұның да артында үлкен бір нығмет, жақсылық болуы мүмкін.
* * *
Н.БАЙЫРБЕК: Кей аналар баласынан бас тартып, бар бақыттың қадірін біле алмай жатқанымен, қай қоғамда да бір баланың үніне зар болып жүрген азаматтар да аз емес. Осы орайда, елордамызда, қамқорсыз қалып, мемлекеттік мекемелердің қарауына алынған балаларға ата-ана іздестіру шаралары ұйымдастырылып тұратынын білеміз.
Ғ.ӘБРАЙЫМОВА: Иә, ондай жұмыстар әлі де жүріп жатыр. Бұл тұрғыда біз Балалардың құқын қорғау департаментімен бірлесіп құрған база бойынша жұмыс істейміз. Ол жерде барлық асырауға берілуі мүмкін балалар жайлы ақпараттар салынады. Балалардың суреттері, олардың қай жылы туғаны, денсаулық жағдайы – толық жарияланады. Ал бала асырап алғысы келетін ата-аналар арнайы сайтқа кіріп, балаларды көріп, өзінің мейірі түскен баланы сұрап, келіп жатады.
Республикалық база өз жемісін беріп келеді. Қазір қоңырау шалып, өз тілектерін білдіріп жатқан азаматтар көп. Бұл бағытта жұмыс жақсы жүріп жатыр.
Н.БАЙЫРБЕК: Соңғы жылдары бала асырауға өтініш білдіріп жүргендердің саны қанша?
Ғ.ӘБРАЙЫМОВА: 2012 жылы – 145 отбасы бала асырап алуды сұраған. Олардың ішінде 131 отбасылық жұп жаңа туған шағынан бастап төрт жасқа дейінгі балалардан алуға өтініш білдірсе, 14 отбасы төрт жастан үлкен, яғни балалар үйіндегі балалардың бірін алсам деп келді. Ал осы 2013 жылдың алғашқы төрт-бес айының өзінде 83 отбасы бала асырап алсам деп, өтініш жазып отыр.
Н.БАЙЫРБЕК: Бұл – бала сұрап, тіркелгендердің саны. Ал асырауға берілген балалардың саны қанша?
Ғ.ӘБРАЙЫМОВА: 2012 жылы 144 бала асырауға берілді. Оның ішіндегі 62 бала –Мамандандырылған балалар үйінің сәбиі. Яғни, төрт жасқа дейінгі балалар. Ал 82 бала отбасы ішіндегі жағдай бойынша, яғни өгей ата-анаға тіркеліп жазылды. Осы 2013 жылды айтар болсақ, қаңтар айынан бүгінге дейінгі уақытта 43 бала асырауға беріліп отыр. Олардың 21-і – балалар үйінен, ал 22-сі отбасы ішіндегі асырау жағдайлары.
Н.БАЙЫРБЕК: Бұл – Қазақстан азаматтарына берілген балалар ма?
Ғ.ӘБРАЙЫМОВА: Иә, Қазақстан азаматтарына берілгені.
Н.БАЙЫРБЕК: Ал шетелдіктерге беріліп жатқандар бар ма?
Ғ.ӘБРАЙЫМОВА: Соңғы жылдары шетел азаматтарының асырауына бала беріліп жатқан жоқ. Өйткені, мораторий жарияланған. Бұл мәселе әлі қарастырылуда.
Н.БАЙЫРБЕК: Бала асырап алғандарға жәрдемақы тағайындау керек деген мәселе көтерілгенін білеміз. Ол қалай жүріп жатыр?
Ғ.ӘБРАЙЫМОВА: Бұл мәселе әлі толық шешілген жоқ. Бала асырап алған жағдайда жөргекпұл секілді бір мерзімді жәрдемақы тағайындау қарастырылып жатыр. Заң әлі қабылданған жоқ.
Л.ҚОЙШИЕВА: Менің бір сұрағым бар. Егер бір азамат балалар үйінен бірнеше баланы асырап алып, баққысы келетін болса, оларға мемлекет тарапынан көмек бола ма?
Р.ЖҰМАБЕКОВА: Әрине, болады. Ол заңмен толық қарастырылған. Бала асырап алғысы келетін азамат тиісті құжаттарды дайындайды. Психологиялық жағынан, денсаулығы тұрғысынан, сол секілді әлеуметтік жағдайы бойынша біраз тексеруден өтеді. Ал құжаттарын дайындап, тиісті орындардың қолдауына ие болғаннан кейін баланы патронаттық тәрбиеге ала ма, әлде өз баласы етіп жаздырып ала ма – оны өзі біледі. Бала асырап алғандарға арнайы жәрдемақы төленеді. Мысалы, патронатқа алынатын әр бала үшін ай сайын – 30 мың шамасында, ал асырап алынған бала үшін 17 мың 310 теңге көлемінде жәрдемақы беріледі. Мұндай көмек 18 жасқа дейін қарастырылған.
Ж.ШӘКЕНҰЛЫ: Сонда 18 жастан кейін балаларды мемлекет қайда барсаң, онда бар деп жібере сала ма?
Р.ЖҰМАБЕКОВА: Бұрын, расында, 18-ге толғаннан кейін мемлекеттік мекемелер балаларды қарамағынан шығаратын. Олар оқуға бара ма, жұмыс істей ме – өз жолын тауып кетуі тиіс болатын. Ал, қазір әлеуметтік бақылау, қолдау бар. Ата-анасыз қалған бала қайда тәрбие алса да, 23 жасқа дейін олардың өмірін, әлеуметтік жағдайын мемлекет қадағалап, қорғауға алып отырады.
Н.БАЙЫРБЕК: Одан бөлек жетім балаларды өскен соң баспанамен қамтамасыз ету мәселесі де қазір Парламентте қаралып жатыр емес пе?
Р.ЖҰМАБЕКОВА: Иә, қараусыз қалған балалардың бәріне баспана тұрғысынан да қолдау көрсету қазір қарастырылып жатыр.
Ғ.ӘБРАЙЫМОВА: Бұл бағытта жұмыс қарқынды жүріп жатыр. Мектептердегі әлеуметтік педагогтармен әңгімелер жүргізіліп, сараптау жұмыстары жасалып жатыр. Балаларды қалада қалдырмау амалдары қарастырылуда.
Р.ЖҰМАБЕКОВА: Жақында бір қызық жағдай болды. Біз осыдан үш-төрт жыл бұрын Астана әкімі Иманғали Тасмағамбетов пәтер берген ата-анасыз балалардың жағдайы қазір қалай екен деп, аяқ астынан көріп кетуге барғанбыз. Таң қалып, риза болып қайттық. Ата-ананың қамқорынсыз қалған балалар баспанасы, жұмысы болса, өз беттерінше жақсы өмір сүріп кетеді екен. Соған көзіміз жетті. Мәселен, біз барған үйде бір отбасынан жетім қалған үш қыз тұратын. Үшеуі сондай тату, біріне-бірі бауырмал. Үлкені екі сіңлісіне бас-көз болып отыр. Үлкені жұмыс істесе, ортаншысы – оқуда, ал кішісі – мектепте оқиды. Әрқайсысы өз жауапкершілігін білетін, жап-жақсы балалардың отбасы қалыптасқан.
Н.БАЙЫРБЕК: Жалпы бізде ата-ананың қамқорынсыз қалған балаларға жағдай жасау жолға қойылған, иә. Заң жағынан да балаларды құқы толық қорғалған деуге болады.
Р.ЖҰМАБЕКОВА: Иә, бәрі ойластырылған. Балалардың құқын қорғау туралы заң да жан-жақты қамтылған деуге болады.
Ж.ШӘКЕНҰЛЫ: Заң жақсы болғанымен, оның кейде атқарылуы дұрыс болмай жатады ғой.
Р.ЖҰМАБЕКОВА: Иә, атқарушылар тарапынан көбінесе қателіктер кетіп жатады. Мысалы, балалармен жұмыс істейтін мекемені басқарып отырған адамның жүрегі тас болса, ешқандай жақсылық күтудің керегі жоқ. Көп нәрсе мамандарға, басшыларға байланысты.
Сосын ата-аналар да баласының құқына селқос қарауды қоюы қажет. Мысалы, бізге кейде көпбалалы аналар келіп, көмек сұрап жатады. Қарасаң, арасында он бестегі баласына құжатын дайындап бермеген ата-аналар да бар. Тіпті, туу туралы куәлігін дұрыстап алып, құжаттарын түгендеп отыруға шамасы келмеген. Бұлай болмайды ғой. Құжат дұрыс болмаған соң, ешқандай жеңілдікке де, басқаға да қол жеткізе алмайды. Сондықтан айтарым, балалардың жолын кеспеу керек. Әрбір ата-ана баласының бақытқа жетуі үшін жауапты екенін естен шығармауы қажет.
Ә.АСАНОВА: Жалпы бүгінгі әңгімеме қорытынды ретінде айтарым, мүгедек баласы бар отбасыларға мемлекет тарапынан жасалатын жеңілдіктер аз болып отыр. Себебі, мен өзім сол жағдайды бастан кешіп отырмын. Тұрғын үй жағынан мәселем шешілмеген. Екі баламның денсаулығы кеміс болса, соның біреуіне мүгедектігі үшін жәрдемақы аламын. Бала үшін және сол мүгедек баланы бағып отырғаным үшін маған ай сайын 37 мың теңге беріледі. Менің айтқым келетіні, баласы, әсіресе осындай мүгедек баласы бар азаматтардың, балалардың ақысын жеуге, олардың құқын таптауға жол берілмесе екен. Онсыз да баласының болашағын ойлап, қабырғасы қайысып жүрген аналарды табанынан тоздырып, кабинетте отырған мамандар кеудесінен итеріп, орынсыз дөрекілік көрсете бермесе екен деймін.
Л.ҚОЙШИЕВА: Бізде оңалту орталықтары бар дедік. Бірақ, Әйгерім айтқандай, миы зақымданған, сал ауруларын сана-сезімі дұрыс балалармен қатар жатқызып емдейміз деу – ақылға сыйымсыз нәрсе. Сондықтан, денесінде ғана кемістігі бар, мүгедек балаларды жатқызып, емдеп, олардың дамуы үшін арнайы мамандар қосымша жұмыс жүргізетін бөлек орталықтар болса игі. Еуропа елдерінде тренажер залдары барлық азаматтарға тегін қызмет етеді. Біз де сондай жағдайға жетсек деймін. Балаларымыздың аман-есен өсуі үшін, сауығуы үшін мемлекет барлық жағдайды жасай түссе екен деп тілеймін.
Ж.ШӘКЕНҰЛЫ: Бала тәрбиесінің бастауы ана тәрбиесінен басталатындықтан, қыз бала өсірудің қандай жауапкершілік екенін ұғынсақ екен деймін. Әрбір ұлт балаға – ұлттың әкесі, қыз балаға ұлттың анасы деп қарауға үйренсек екен. Одан кейін балабақшадағы, мектептегі ұстаздардың өресін тексеріп, олардың балаға қанша ықпал ететінін ескерсек дұрыс болар еді. Өйткені, елдің болашағы – осы балаларда. Оларды дұрыс қалыптастыру үшін отбасы, білім ошақтары, қоғам – бәрі жауапты екенін айта беру қажет.
Ғ.ӘБРАЙЫМОВА: Ата-анасы бас тартқан балалар аз болса біздің қоғамның бақыты да артар еді. Сол себепті де, ең бастысы, перзентханаларда аналарға баланың қандай бақыт екенін айтып түсіндіретін психологтар жұмыс істесе екен деймін.
Р.ЖҰМАБЕКОВА: Бұрынғы айтылатын ең жаман сөз – «жатырың жаман» деген сөз болатын. Бұл нені білдіреді? Жазушы ініміз айтып отырғандай, бәрінің әйелге байланысты екенін білдіреді. Сондықтан, қазақ қыздары, әйелдер, біз өзіміздің бойымызды, ойымызды түзеуіміз керек. Жалпы, қоғам болып, ел болып, іс-әрекетімізді түзеуіміз қажет. Одан кейін айтарым, бала өмірге келгеннен кейін олардың бәрінің құқы бірдей. Ешбір баланы ақ, сары, мүгедек, сау, ұл, қыз деп бөлуге болмайды. Біз мүгедек балаларға да мүсіркеп қараудан арылуымыз керек. Олардың заңмен бекітілген өз құқықтары бар. Соны сақтауға бәріміз міндеттіміз.
Ал өмірдегі ең қорқынышты нәрсе, адамның мүгедектігі, сыртқы жарымжандығы емес, ішкі жарымжандығы. Сондықтан, рухани дүниесі бай, иманды, есті ұрпақ тәрбиелеуді ойлауымыз қажет.
Үшінші айтарым, бүгінгі күні балалардың құқын қорғайтын заңдарымыз көп. Бәрі де халықаралық стандарттарға сай келеді. Сол заңды іске асыру кезінде мойнымызға қарыз алмауға, бәрін адал, әділ атқаруға тырысуымыз қажет. Ал, ата-аналар, тағы да айтамын, өз баласының құқын қорғау үшін, бала бақыты үшін күресе білгені дұрыс. Өйткені, бала – ата-анаға Алланың берген аманаты.
P.S. Әрбір сәби сүйдірген сайын Жаратушы ие әйел-ананы қайраттандыра түседі. Баланы берген соң, оған мәпелеп бағарлық мейірім, күш-қуат, сабыр, төзім қоса береді. Ендеше, баланы сүймеу, оған мейірленбеу мүмкін емес. Балалар – бәріміздің үмітіміз, көз қуанышымыз.
Дайындаған
Нәзира БАЙЫРБЕК