Рауза Кәкенова – «Астана Теплотранзит АҚ-да ұзақ жылдардан бері жұмыс істейді. Қолына алған кез келген шаруаны дөңгелетіп әкететін, ұйымдастырушылық қабілеті жоғары маманды кәсіпорын ұжымы «Астан таңдауы» байқауына ұсынуды жөн көріпті.
Рауза Жүніспекқызы – елорданың байырғы тұрғыны. Осындағы Инженерлік-құрылыс институтын бітірген ол алғашқы еңбек жолын «Қазэнергоналадка» кәсіпорнында инженер болып бастайды. Кейін «Ақмола жылу желілері» АҚ-да абоненттік бөлімнің, «Астанаэнергосервисте» өткізу қызметінің басшысы міндетін атқарады. Ал, 2005 жылдан бері «Астана-теплотранзит» АҚ- жөндеу қызметін басқарып келеді.
Жалпы, әр үйге жылу сыйлайтын мамандардың жұмысы оңай емес. Әсіресе, Рауза Жүніспекқызына жүктелген жауапкершілік үлкен. Өйткені, кәсіпорындағы жөндеу жұмыстары ешқашан толастамайды. Жылу берілмейтін жаз айларының өзінде тұрғындарға жылу жеткізілетін желілер мен тораптарды тексеруден өткізіп, олардың күтімді болуы үнемі қадағалауда болады. Қайта осы кезеңде жұмыс көбейеді. Көптеген жылу тораптарына күрделі жөндеу жұмыстары жүргізіледі, қайтадан жаңартылатындары да бар. Осындай шаруалардың бел ортасында Рауза Кәкенова жүреді. Жылумен қамтамасыз ету жүйесінде қолайлы режим қалыптастыру, жылу беру маусымы басталған сәтте әр үйдің осы маңызды кезеңге дайын болуын қадағалау, тұрғын үйлердің қысқа әзірлік паспорттарын дер кезінде алуы, жылу энергиясын есептегіш құрылғы мен автоматтандырылған реттегіш жүйесінің орнатылуын бақылау, «Астана-теплотранзит» нысандары мен тұрғын үйлерде энергия үнемдейтін тиімді тәсілдерді енгізу сынды жұмыстар осы маманның мойнында.
Жалпы, энергетика саласының майда-шүйдесіне дейін жетік меңгерген әйелдер санаулы. Нәзік жандылар көп жолай қоймайтын бұл салада Рауза Жүніспекқызы ұзақ жылдар бойы үздіксіз жұмыс істеп келеді. «Рауза Кәкенованың жұмысынан бір мін таппайсыз. Ол жылу желілеріндегі технологиялық процестерді бүге-шігесіне дейін біледі. Оның ер мінезділігі, жауапкершілікті сезіне білетін талапшылдығы арқасында қала тұрғындарына жылу жеткізетін тораптарда үлкен қиындықтар туындаған емес», – дейді әріптестері.
Роза Кәкенованың басшылығымен «Астана – Тепло-Транзит» АҚ-да жылу беру маусымына дайындық жөніндегі кешенді іс-шаралар жоспары бекітіліп, жылу беру маусымын сапалы өткізудің ережесі қабылданған екен. Жылу энергиясын дұрыс пайдаланудың және оны есепке алудың ережесі де Рауза Жүніспекқызының бастамасымен әзірленген.
Елорда тұрғындарын жылумен қамтамасыз ету жолында тер төгіп, энергетика саласын дамытуға үлес қосып келе жатқан Рауза Кәкенова көптеген марапаттардың иесі. Ол – «ҚР Құрметті энергетигі». 2011 жылы «Энергетика саласының ардагері» атанды. Өз ұжымында сыйлы маман «Ең үздік бөлім бастығы» атына да ие болды. «Әр үйде жылу мен жайлылық болу керек» деген қағидатты ұстанатын Рауза Кәкенованың еңбегіне біз де сәттілік тілейміз.
Қымбат НҰРҒАЛИ
