قازىرگى ءدىن باسىندا وتىرعاندارعا تىم قيىن-اۋ. بىلاي دەسە «سالافيت», «ۋاحابيست» دەيمىز, بىلاي دەسە «سوپى» دەپ كۇستانالاپ جاتامىز. شىن مانىندە «سوپىلىق» ەكىنىڭ ءبىرىنىڭ قولى جەتە بەرمەيتىن, ەكىنىڭ ءبىرى تۇسە المايتىن جول ەدى. ونىڭ دا بيىگىنە جەتپەي, بىلىمسىزدىگىمىزدەن اياقاستى ەتتىك.
جارايدى, قازاقتىڭ ءبارى سوپى بولعان جوق, بىراق سول سوپىلاردىڭ جالعاسى يشانعا قول بەرىپ, جۇرەگىن تازالاپ, جولىن تۇزەپ, باعىتىن ايقىنداۋشى ەدى. ودان دا ايىرىلىپ قالدىق. وعان دا كونىپ, مۇمكىن زامانىنا قاراي كەلگەن امالى شىعار دەپ جۇرگەنبىز. الايدا مىنا وقيعادان كەيىن ايتپاسقا امالىمىز قالمادى. وسىدان بىرنەشە كۇن بۇرىن باس ءمۇفتيىمىز باتاگويلەردى جيناپتى. «حان ايتقاندى قارا ايتادى, اۋزىنىڭ جوق دۋاسى» دەگەن دە بار. جارىسقا تۇسكەن باتاگويلەردىڭ دۇعاسى دا اۋزى دا قانشالىقتى دۋالى ەكەنىن بىلمەيمىز, بىراق باتانىڭ كوركى بولعان «ارۋاق قولداسىن!» دەگەن سوزگە تىيىم سالعانى بولماعان ەكەن. قاپ-اي, قازاعىمنىڭ باتاسىنىڭ «ءبىسسمىللاسى» بولعان مىنا شۋماقتى باتا كۇتكەن جۇرت ەستىمەگەن ەكەن-اۋ دەپ قالدىق.
«مەدينەدە – مۇحاممەد, تۇركىستاندا – قوجا احمەت, ماڭعىستاۋدا – ءپىر بەكەت. ۋا, جاراتقان, حاق اللا, تىلەگىمدى قابىل ەت!». «تۇركىستاندا – تۇمەن باپ, وتىراردا – وتىز باپ, سايرامدا – بار سانسىز باپ, باپتاردىڭ بابى – ارسلان باپ!» تا باتادان ءتۇسىپ قالىپتى.
جاڭاقورعان وڭىرىندەگى اقتاس مەشىتىندە كوپ جىل ازانشى بولعان دوسجان دەگەن ءوتىپتى. سول كىسىنىڭ ماتكارىم دەگەن بالاسى بار ەكەن. سول ماتكارىم سوعىسقا بارعالى جاتقاندا وڭىرگە بەلگىلى ايقوجا يشان ۇرپاعى ءاززام يشان مەن ءبىر باتا بەرىپ كەتەيىن دەي كەلىپتى. باتاسىن بەرىپ كەتەدى. ايتايىن دەگەنىم, اللانىڭ شەبەرلىگىن قاراساڭىزشى, ماتكارىم مايدانعا بارىپ قازاقستاندا وسكەن, قازاقتىڭ جاقسىلىعىن كورگەن كومانديردىڭ قول استىنا تۇسەدى. 17 جاسىندا اسكەرگە بارعان بوزبالانى ءبىر جىلداي شتابتا ۇستاپتى. 18-گە تولعاننان كەيىن ارتيللەريادا, كەيىننەن تانكىگە وتىرادى. شايقاس كۇندەرىندە ەكيپاج ءبىر جەردە تاماقتانىپ وتىرعاندا, مۇنى ماحوركا الىپ كەل دەپ جۇمسايدى. ماتكارىم تانكىدە قالعان تەمەكىنى الماققا ۇمتىلعاندا سناريادتىڭ داۋىسىن ەستىپ, تانكىنى قۇشاقتاپ جاتا قالعان. سوندا سنارياد اناداي جەردە وتىرعان ەكيپاجدىڭ ۇستىنەن ءتۇسىپ, ۇشەۋى بىردەي ءتىل تارتپاي كەتىپتى. باسىن كوتەرسە, گيمناستەركاسىنىڭ يىعىنان باستاپ جەڭىنە دەيىن سناريادتىڭ جارىقشاعى ءتىلىپ وتكەن. بىراق دەنەسىنە جەتپەگەن. سوعىستان امان كەلگەن مايدانگەر «اۋەلى اللا, سوسىن ءاززام يشاننىڭ باتاسىنان قالدىم-اۋ» دەيدى ەكەن.
جالپى, «اق ساقالدان باتا العان, قۇدايدىڭ راحمەتىنە جولىعار» دەگەن حالىق «قۇداي ۇرعان وڭالار, ارۋاق اتقان وڭالماس» دەپ تە ايتادى. ارۋاقتار نەدەن جازىقتى بولدى, تۇسىنبەدىك.
