كەشە ەلوردادا كورنەكتى عالىم, بەلگىلى حيرۋرگ, استانا قالاسىنىڭ قۇرمەتتى ازاماتى گيلەن تسويدىڭ 100 جىلدىعىنا وراي ەسكەرتكىش تاقتا اشىلدى.
سالتاناتتى راسىمگە ونىڭ تۋىستارى, دوستارى مەن شاكىرتتەرى, دەنساۋلىق ساقتاۋ مينيسترلىگىنىڭ باسشىلىعى, اكادەميكتەر, عالىمدار مەن قوعام قايراتكەرلەرى قاتىستى. ودان ءارى «حيرۋرگيا جانە مەديتسينالىق ءبىلىم بەرۋدىڭ تاڭداۋلى ماسەلەلەرى» اتتى حالىقارالىق كونفەرەنتسيا وتكىزىلىپ, سونىڭ اياسىندا قازاقستاندا حيرۋرگيا قىزمەتىن دامىتۋ مەن مەديتسينالىق كادرلاردى دايارلاۋدىڭ وزەكتى ماسەلەلەرى تالقىلاندى.
استانا مەديتسينا ۋنيۆەرسيتەتىندە وتكەن جيىنعا گەرمانيا, ازەربايجان, قىرعىزستان, وزبەكستان جانە باسقا دا الىس-جاقىن شەت ەلدەردىڭ حيرۋرگيا سالاسىنداعى كورنەكتى عالىمدارى قاتىستى.
– ۋنيۆەرسيتەت قابىرعاسىندا شەتەلدىك ارىپتەستەرىمىزبەن تاجىريبە الماسۋ, حيرۋرگيا سالاسىنىڭ دامۋ بولاشاعىن تالقىلاۋ – ءبىز ءۇشىن ەرەكشە مارتەبە, ويتكەنى قازاقستاننىڭ ەڭبەك سىڭىرگەن دارىگەرى, كلينيكالىق يممۋنولوگتار مەكتەبىنىڭ نەگىزىن قالاۋشى, قازاقستان مەديتسينا عىلىمدارى اكادەمياسىنىڭ قۇرمەتتى اكادەميگى جانە ەۋروپالىق جاراتىلىستانۋ عىلىمدارى اكادەمياسىنىڭ اكادەميگى, پروفەسسور گيلەن ۆاسيلەۆيچ 40 جىلدان استام ۋاقىت وسى وقۋ ورداسىندا ەڭبەك ەتە ءجۇرىپ, جوعارى بىلىكتى دارىگەرلەر توبىن تاربيەلەدى. كونفەرەنتسيا قورىتىندىسى بۇدان كەيىنگى عىلىمي جۇمىستارعا نەگىز بولاتىنىنا, حيرۋرگيا قىزمەتىن ودان ءارى دامىتۋ ءۇشىن تۇجىرىمدامانى ايقىندايتىنىنا جانە مەديتسينا كادرلارىن دايارلاۋ كەزىندە ءبىلىم بەرۋ پروتسەسىن جەتىلدىرۋگە ىقپال ەتەتىنىنە سەنىمدىمىن, – دەدى استانا مەديتسينا ۋنيۆەرسيتەتىنىڭ باسقارما توراعاسى – رەكتورى كامالجان نادىروۆ.
گيلەن تسوي ەلىمىزدىڭ حيرۋرگيا قىزمەتى مەن حيرۋرگيا عىلىمىنىڭ دامۋىنا زور ۇلەس قوستى. ءوزىنىڭ 90 جىلدىق مەرەيتويىنا دەيىن كاسىبي قىزمەتىن جالعاستىردى. ول تىڭ يگەرۋ جىلدارى تىڭ يگەرۋ ولكەسىنىڭ باس حيرۋرگى رەتىندە اقمولا وبلىسى مەن سولتۇستىك قازاقستاننىڭ حيرۋرگيا جانە تراۆماتولوگيا قىزمەتىن ۇيىمداستىرۋعا بەلسەندى قاتىستى.
تانىمال حيرۋرگ ءوزىنىڭ ەڭبەك جولىن 88 جاسىندا حيرۋرگيا اۋرۋلارى كافەدراسىنىڭ حيرۋرگ-كەڭەسشىسى بولىپ اياقتادى. 77 جاسقا دەيىن ول وتا جاساۋمەن اينالىستى, سونىمەن قاتار, تسەلينوگراد وبلىستىق اۋرۋحاناسىنىڭ بازاسىندا ۇيىمداستىرىلعان تراۆماتولوگيا عىلىمي ينستيتۋتىندا كەڭەسشى بولدى. حيرۋرگيا قىزمەتى اشىلعان كۇننەن باستاپ باسقارعان ول ءومىرىنىڭ سوڭعى كۇندەرىنە دەيىن سول جەردە كەڭەسشى بولدى.
