وقۋشىلاردى كاسىپكەرلىككە باۋلۋ, ىسكەرلىككە ىنتالاندىرۋ, بيزنەس-يدەيالاردى جۇزەگە اسىرۋعا جول اشۋ – مەكتەپ قابىرعاسىنان-اق باستاۋ الاتىن مۇمكىندىكتەر. جاستايىنان ىسكەر كوشباسشى اتانۋعا ۇمتىلعان جاستاردىڭ تىڭ جوبالارىن قولداۋ ماقساتىندا جاقىندا استانادا Enactus Kazakhstan National EXPO 2023 مەكتەپ كاسىپكەرلىگىنىڭ IV رەسپۋبليكالىق چەمپيوناتى اياقتالىپ, تارتىستى سايىستا توپ جارعان ۇزدىكتەر انىقتالدى. 70 مەكتەپ كومانداسى قاتىسقان دودادا وزىق ويلى جاسوسپىرىمدەر باس قوسقان استانا حالىقارالىق مەكتەبى چەمپيون اتاندى.
رەسپۋبليكالىق مەكتەپ كاسىپكەرلىگى چەمپيوناتى – Enactus حالىقارالىق قاۋىمداستىعىنىڭ باستاماسىمەن وتكىزىلەتىن جىل سايىنعى بايقاۋ. كاسىپ باستايمىن دەگەن جاستاردى بىرىكتىرەتىن بىرەگەي الاڭعا بيىل ەلىمىزدىڭ 17 وڭىرىنەن كوماندالار قاتىستى. چەمپيوناتقا قاتىسۋشىلار وقۋ جىلى بويى الەۋمەتتىك, ەكولوگيالىق جانە يننوۆاتسيالىق جوبالاردى ويلاستىرىپ, شىڭداۋمەن جۇمىس ىستەدى. ولار ەكى كۇن ارالىعىندا ءتۇرلى تاقىرىپتاعى ستارتاپ جوبالاردى تانىستىردى. ءار جوبانىڭ باستى ماقساتى – ەلىمىزدەگى وزەكتى ماسەلەلەردى شەشۋگە اتسالىسۋ.
جەڭىمپاز استانا حالىقارالىق مەكتەبىنىڭ وقۋشىلارى تىڭ يدەيانى ۇسىنۋمەن ەرەكشەلەندى. مەكتەپتىڭ «Revera Team» توبى بىلتىر دا كاسىپكەرلىك چەمپيوناتىندا جەڭىس تۇعىرىنان كورىنىپ, جۇلدەلى 2-ورىندى العان ەدى. ال بۇل جولعى چەمپيوندار – ISA Engineers توبى سايىستا العاش رەت باق سىنادى. وتكەن جىلدىڭ قىركۇيەگىندە قۇرىلعان توپ دوداعا سەگىز اي كولەمىندە قىزۋ دايىندالدى. 10 جانە 11-سىنىپ وقۋشىلارىنان قۇرالعان توپتا جەتى ادام بار. ارقايسىسىنىڭ ءوز مىندەتى دە ايقىندالعان. باعدارلامالاۋ, ديزاين جانە ماركەتينگ سالاسىنا ماماندانعان وقۋشىلار وسى باستان-اق IT-سالاسىنا ۇلكەن قىزىعۋشىلىق تانىتۋدا.
ISA Engineers توبى چەمپيوناتتا ەكى جوبانى ۇسىندى. بۇل تۋرالى توپ باسشىسى ماۋلەت سەيىتوۆ كەڭىرەك ايتىپ بەردى.
– العاشقى جوبامىز – «MinAvto». بۇل – كولىك جۇرگىزۋ كەزىندە جۇرگىزۋشىنىڭ ۇيىقتاپ كەتۋىنە جول بەرمەيتىن بىلەزىك پەن كامەرا. ياعني اتالمىش قۇرىلعى جۇرگىزۋشىگە كوز ىلە باستاعانىندا بەلگى بەرەدى. ناتيجەسىندە ونىڭ دەنساۋلىق جاعدايىن ۇنەمى باقىلاۋدا ۇستاپ وتىرادى.
ەكىنشى جوبا – «Jurmek». ول جۇرەك سوعىسىن ەسەپتەپ, دەرەكتەردى ءموبيلدى قوسىمشاعا لەزدە جىبەرەتىن ءپورتاتيۆتى ەكگ. قۇرىلعى جاساندى ينتەللەكت ارقىلى ەلەكتروكارديوگرامما ناتيجەسىن دەرەكقورعا سالادى. دەرەكتەر نەگىزىندە قاۋىپتى جاعداي انىقتالسا, بىردەن جەدەل جاردەم قىزمەتىنە قوڭىراۋ شالادى. ەكگ جوباسىن جاساۋدا ءبىز وتاندىق جانە شەتەلدىك عالىمداردىڭ تاجىريبەسىنە سۇيەنە وتىرىپ, ۇلكەن Data Set-ءتى (دەرەكتەر جيناعى) قولداندىق.
جوبالارىمىزدىڭ نەگىزگى ماقساتى – ادام ءومىرىن ساقتاپ قالۋ. ياعني ءبىز جاڭا تەحنولوگيالار ارقىلى جول اپاتىنىڭ الدىن الۋعا جانە ءولىم-ءجىتىم ستاتيستيكاسىن ازايتۋعا سەپتەسكىمىز كەلەدى, – دەدى توپ باسشىسى.
ىزدەنىمپاز, امبيتسياعا تولى جاس كاسىپكەرلەردىڭ ەندىگى ماقساتى – جوبالارىن كوپشىلىككە تانىستىرىپ, نارىققا شىعارۋ.
«ءبىز ەكى جوبانى تولىققاندى دايىن ءونىم رەتىندە جاساپ, وزگەلەرگە ۇسىنعىمىز كەلەدى. ەشبىر كەمشىلىكسىز, قاۋىپ-قاتەرسىز جۇمىس ىستەۋگە دايىن بولعاندا, نارىققا شىعارامىز» دەدى وقۋشى.
وقۋشىلاردىڭ ايتۋىنشا, مەكتەپتە كاسىپكەرلىك نەگىزدەرىن دامىتۋعا ارنالعان ارنايى ءپان بولماعانمەن, «ەكونوميكا» ءپانى وقىتىلادى. سوزدەرىنشە, بيزنەس-يدەيالارىن جۇزەگە اسىرۋدا سالالىق ءپاننىڭ بەرەرى كوپ بولدى.
مەكتەپ كاسىپكەرلىگى – كاسىپتىك باعداردىڭ نەگىزى ءارى زامان تالابى. بۇگىندە وقۋشىلاردىڭ باسىم بولىگى كاسىپ باستاپ, بيزنەس اشسام دەيدى. ال بۇل جولدا كاسىپكەرلىك داعدىلارىن مەڭگەرگەن جاستار ۇلكەن ومىرگە قادام باسقاندا, الداعى سىن-كەدەرگىگە ساقاداي ساي تۇرادى. وزىق كوشباسشى, مىقتى ماركەتولوگتار مەكتەپتەن-اق تاربيەلەنىپ شىعادى. ەڭ باستىسى, ۇسىنعان بيزنەس-جوبالارى قوعام يگىلىگىنە جۇمسالادى.
