مادەنيەت

بي تەاترىنىڭ تىنىسى

استانا قالاسىنىڭ كوممۋنيكاتسيالار قىزمەتى الاڭىندا «ناز» مەملەكەتتىك بي تەاترىنىڭ قىزمەتىمەن وسى ونەر وشاعىنىڭ ديرەكتورى ەركەبۇلان اعىمباەۆ تانىستىردى.

ونىڭ ايتۋىنشا, وسى جىل باسىنان بەرى بي تەاترى 24 ءىس-شارا وتكىزىپ, جيىرما مىڭعا جۋىق كورەرمەن ونەرىن تاماشالادى. تەاتر ارتىستەرى ءاز-ناۋرىز, قازاقستان حالقىنىڭ بىرلىگى كۇنى, وتان قورعاۋشىلار كۇنى, جەڭىس كۇنى سىندى مەرەكەلەرگە وراي ۇيىمداستىرىلعان كونتسەرتتەرگە قاتىستى. بۇعان قوسا, تەاتر «شاراپات» الەۋمەتتىك قىزمەت كورسەتۋ ورتالىعى, «دەمەۋ» الەۋمەتتەندىرۋ ورتالىعى سىندى مەكەمەلەردىڭ قايىرىمدىلىق شارالارىنا ۇنەمى قاتىسىپ تۇرادى.

سوڭعى جىلدارى ونەر وشاعى بولگاريا­دا وتكەن VITOSHA 2020 – Web Edition حالىقارالىق فولكلورلىق فەستيۆالگە قاتىسىپ, «ارنايى رەجيسسەر سىيلىعىمەن» ماراپاتتالىپ, ۇلتتىق مادەنيەتتىڭ دامۋىنا ۇلەس قوسقانى ءۇشىن «Nauryz-2021» تۇڭعىش ۇلتتىق پرەمياسىنىڭ يەگەرى اتاندى. بىلتىر رەسپۋبليكالىق «قاماجاي» ءى حورەوگرافتار بايقاۋىندا ۇلان يزەناەۆ باس جۇلدەنى يەمدەندى. بۇل كونكۋرسقا تالانتتى حورەوگراف اباي قۇنانبايۇلىنىڭ شىعارماسى جەلىسىمەن قويىلعان «ءازىم اڭگىمەسى» حورەوگرافيالىق سپەكتاكلىن ۇسىندى. ال بيىل وتكەن شارا جيەنقۇلوۆا اتىنداعى VI رەسپۋبليكالىق قازاق ءبيى بايقاۋىندا بالەت ءارتىسى ومار مۇحاممەتاليەۆ جۇلدەلى III ورىنعا يە بولدى.

تەاتر ۇجىمى 2021 جىلدىڭ قىركۇيەك ايىنان 2022 جىلدىڭ ءساۋىر ايىنا دەيىنگى دۋباي قالاسىندا وتكەن «EXPO-2020» حالىقارالىق كورمەسىندە ونەر كورسەتتى. قازاقستان پاۆيلونىندا تەاتردىڭ بالەت ارتىستەرى 6 اي بويى قازاق ءبيىنىڭ مارتەبەسىن ارتتىردى. سول ۋاقىت ىشىندە 100-گە جۋىق كونتسەرت بەرىپ, 20 مىڭعا جۋىق كورەرمەندى قامتىدى. بىلتىر قازان ايىندا تەاتردىڭ بالەت ارتىستەرى تۇركيانىڭ يزنيك قالاسىندا وتكەن «IV الەمدىك كوشپەندىلەر ويىنىنا» قاتىستى. سول ۋاقىتتا گۇلنار سۇتتىباەۆا, ءاليا ابىلقاسىموۆا سىندى بالەت ارتىستەرى ماروككو كورولدىگىنىڭ استاناسى رابات قالاسىندا قازاقستان ­رەسپۋبليكاسىنىڭ رەسپۋبليكا كۇنىنە وراي وتكىزىلگەن كونتسەرتتە ونەر كورسەتىپ كەلدى.

تاعىدا

ۇقساس جاڭالىقتار

پىكىر ۇستەۋ

Back to top button