ەلدىڭ ءتورى – ەلوردا جىلدان جىلعا بۇقارالىق سپورتتىڭ دا ورداسىنا اينالىپ كەلەدى. استانادا وتەتىن مارافون, ترياتلون, شاڭعى جانە ۆەلو جارىستارىنا تەك ەلىمىزدەن عانا ەمەس, شەتەل سپورتشىلارى دا قىزىعىپ قاتىساتىن بولدى. سونداي ءىس-شارانىڭ ءبىرى, جەكسەنبى كۇنى وتكەن Astana half-2023 مارافونىنا ەلىمىزدىڭ 16 وڭىرىنەن, سونداي-اق اقش, ۇلىبريتانيا, رەسەي, پولشا جانە ۋكراينا ەلدەرىنەن 2000 اۋەسقوي جۇگىرۋشى قاتىستى.
Astana half-2023 جارتىلاي مارافونىنا ۇلىبريتانيا, اقش, پولشا, رەسەي, ۋكراينا جانە ەلىمىزدىڭ ءوڭىر-وڭىرىنەن 16 جاستان 75 جاسقا دەيىنگى 2000-عا جۋىق قاتىسۋشى قاتىستى. جەلاياقتار 21,1 جانە 5 شاقىرىم قاشىقتىققا جۇگىردى.
وتكەن جەكسەنبى كۇنى تاڭەرتەڭ 7-دەن باستالعان ءىس-شارانىڭ اشىلۋ سالتاناتىنا استانا قالاسى اكىمىنىڭ ورىنباسارى ەرلان بەكمۋرزاەۆ قاتىسىپ, مارافونشىلارعا ساتتىلىك تىلەدى. ءيا, بۇل كۇنى ەرتە تۇرعان ەلوردالىقتار تاڭەرتەڭنەن قالا كوشەلەرىندە جۇگىرگەن اۋەسقوي سپورتشىلارعا قولداۋ ءبىلدىرىپ, ولاردىڭ ەرىك-جىگەرىنە قول سوقتى.
Astana Half جانە Astana Marathon – قايىرىمدىلىق اكتسيالارىنىڭ تۇراقتى قاتىسۋشىسى. بىرنەشە جىلدان بەرى قاراجاتتىڭ ءبىر بولىگى قازاقستانداعى بالا مەن ءسابي ءولىمى جانە مۇگەدەكتىگىن ازايتۋعا باعىتتالعان Ayala قايىرىمدىلىق قورىنىڭ جوبالارىنا باعىتتالۋدا. بيىل قور ارقىلى قازاقستاننىڭ بالالار اۋرۋحانالارىن ومىرلىك ماڭىزدى جابدىقپەن جاراقتاندىرۋ جونىندەگى «ومىردەن ءلاززات الايىق» جوباسىن قولداۋدا.
21,1 شاقىرىم قاشىقتىقتا ەرلەر اراسىندا 1 ساعات 9 مينۋت 51 سەكۋندتا مارەگە جەتكەن ءالىمجان بالتابەك ۇزدىك بولسا, ايەلدەر اراسىندا 1 ساعات 11 مينۋت 57 سەكۋندتا باعىندىرعان گۇلجانات جاناتبەك دارالاندى. ال 5 شاقىرىمدا ەرلەر اراسىندا الەكسەي گۋساروۆ (00:15:04), ايەلدەر اراسىندا ەۆا پينچۋك (00:17:45) باعى ۇستەم بولدى.
مارافوندا جاس ساناتى بويىنشا دا مىقتىلار انىقتالدى. 18-39 جاس ارالىعىندا جۇگىرگەن ەرلەر اراسىندا الماتىلىق سۇلتان ايعاراەۆ, ايەلدەر اراسىندا پەتروپاۆلدىق ايگۇل ارجانيكوۆا ءبىرىنشى ورىن الدى.
40-44 جاس ساناتىندا الەكساندر بەسپالوۆ پەن لەنا سكلياروۆا, 45-49 جاستاعى مارافونشىلار اراسىندا الەكساندر ميشانوۆ, تەمىرتاۋلىق يننا ۆيشنياكوۆا ەرلەر جانە ايەلدەر اراسىندا جۇيرىك ەكەنىن كورسەتتى. 50-54 جاس ارالىعىندا ۆاسيلي پيۆنەۆ, 55-59 جاس ارالىعىندا قانات سۇگىرباەۆ پەن مارگارەت فريتس, 60-64 جاس ساناتىندا عاليوللا ىسقاقوۆ, 65-69 جاس ساناتىندا قايىرجان مولدىباەۆ, 75-79 جاس ارالىعىندا امەلگۋلسين مۇسىلمانوۆا مارەگە ءبىرىنشى جەتتى.
ايتا كەتەتىنى, 60-64 جاستاعى مارافونشىلار اراسىندا نيدەرلاندىدان كەلگەن اندرە كارستەنس جۇلدەگەرلەر قاتارىنان كورىندى.
