استانادا رەسپۋبليكا كۇنىنە وراي مۇمكىندىگى شەكتەۋلى جاندار اراسىندا «Showdown» ۇستەل تەننيسىنەن ءى قالالىق اشىق چەمپيونات ءوتتى. جارىستا ارنايى جاتتىعۋدان وتكەن 20 قاتىسۋشى ويىن كورسەتتى.
سپورتتىق ءىس-شارانىڭ اشىلۋ سالتاناتىنا استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ سالتاناتتى تۇردە اشىپ بەردى. قر سپورت جانە دەنە شىنىقتىرۋ ىستەرى كوميتەتىنىڭ باسقارما باسشىسى مۇحامەدجان بەكنازاروۆ, پارلامەنت ءماجىلىسىنىڭ دەپۋتاتى ماقپال تاجماعانبەتوۆا, استانا قالاسىنىڭ جانە ازىرەت سۇلتان مەشىتىنىڭ باس يمامى ەربولات نۇرىلداۇلى, دەنە مۇمكىندىگى شەكتەۋلى تۇلعالارعا ارنالعان سپورتتىق دايارلاۋ ورتالىعى باسشىسىنىڭ ورىنباسارى ءادىلحان ومىرزاقوۆ, بەلگىلى ايتىسكەر اقىن بالعىنبەك يماشەۆ جانە «كوزىمنىڭ قاراسى» مۇگەدەكتەر قوعامدىق بىرلەستىگىنىڭ توراعاسى ءجۇزباي سەرىكۇلى قاتىسىپ, سپورتشىلارعا ساتتىلىك تىلەدى.
«بۇل جارىس رەسپۋبليكا كۇنىنە ارنالىپ وتىر. استانا قالاسى اكىمدىگىنىڭ اتىنان بارشاڭىزدى الدىمىزدا كەلە جاتقان ۇلتتىق مەرەكەمىز رەسپۋبليكا كۇنىمەن قۇتتىقتايمىن. «Showdown» ۇستەل تەننيسىنىڭ وزگەشەلىگى ەلوردادا العاش رەت وتكىزىلۋدە. ەندى, استانالىق زاعيپ جاندار ەلىمىزدە ەندى عانا دامۋ قارقىنىن العان «Showdown» ويىنىن يگەرىپ, رەسپۋبليكالىق, حالىقارالىق جارىستارعا قاتىسىپ, ەلوردامىزدىڭ نامىسىن ابىرويمەن قورعايتىنىنا سەنىممەن قارايمىز.
ال «Showdown» ۇستەل تەننيسىنەن
ءى-قالالىق اشىق چەمپيوناتىندا ەپتىلەر مەن كۇشتىلەر جەڭىسكە جەتۋىنە تىلەكتەسپىن» دەدى باسقارما باسشىسى س.جىلقىباەۆ.
استانا قالاسىندا ءبىرىنشى رەت وتكىزىلىپ جاتقان جارىس الداعى ۋاقىتتا ەلىمىزدىڭ باسقا وڭىرلەرىندە ىرىكتەۋ كەزەڭىن وتكىزىپ, قاراشا ايىندا رەسپۋبليكالىق تۋرنير وتكىزۋ جوسپارلانىپ وتىر.
– «بۇرىننان ىزدەنىستە ءجۇرىپ, شەت مەملەكەتتەردەن وسىنى قاراپ, زەرتتەپ قازاقستانعا قالاي اكەلسەم ەكەن دەگەن وي بولدى. بۇل چەمپيونات وسى استانا قالاسىندا وتكىزىلگەننەن كەيىن, الداعى ۋاقىتتا 13-دۇنيەجۇزىلىك زاعيپ جاندار كۇنىنە وراي رەسپۋبليكالىق تۋرنير وتكىزەمىز» دەيدى «كوزىمنىڭ قاراسى» مۇگەدەكتەر قوعامدىق بىرلەستىگىنىڭ توراعاسى ءجۇزباي سەرىكۇلى.
شارانىڭ ماقساتى – الەمدىك دەڭگەيدەگى جارىستارعا قاتىسۋ ءۇشىن وتاندىق قۇراما كوماندا جاساقتاۋ بولدى.
ال مامانداردىڭ ايتۋىنشا, كانادا, گەرمانيا, بولگاريا سياقتى شەت مەملەكەتتەردە جاقسى دامىعان بۇل سپورت ءتۇرى كوز جانارىنان ايىرىلعان زاعيپ جانداردىڭ دەنساۋلىعىنا پايدالى. ياعني, ەستۋ قابىلەتىمەن, قول مەن اياق قوزعالىسى قىزمەتىنىڭ جۇمىسىن ارتتىرادى.
رەسپۋبليكا كۇنىنە وراي ۇيىمداستىرىلعان چەمپيوناتتىڭ جەڭىمپازدارى ارنايى ديپلومدارمەن, مەدالدارمەن, سىيلىقتارمەن جانە كۋبوكتارمەن ماراپاتتالدى. سونىمەن قاتار بارشا قاتىسۋشىلارعا دەمەۋشىلەر تاراپىنان اقشالاي قاراجات تابىستالدى.
