بۇگىندە ەلىمىزدە بارلىق سالادا تسيفرلاندىرۋ ءىسى قارقىندى جۇرگىزىلۋدە. ەلوردانىڭ قالالىق قوعامدىق دەنساۋلىق ساقتاۋ باسقارماسىنىڭ الدىنا قويعان ماڭىزدى مىندەتتەرىنىڭ ءبىرى دە وسى – مەديتسينالىق قىزمەتتەردى ساندىق تەحنولوگياعا كوشىرۋ. سونىڭ ءبىر كورىنىسى رەتىندە استانادا العاش رەت №2 كوپبەيىندى قالالىق اۋرۋحانادا جاڭا گوسپيتالدىق فارماتسيا بولىمشەسى اشىلدى. جاڭا يننوۆاتسيالىق بولىمشەنىڭ اشىلۋ سالتاناتىنا ۆەدومستۆولىق مينيسترلىك وكىلدەرى, باسقارما باسشىلارى, اتالعان اۋرۋحانا دارىگەرلەرى قاتىستى.
كەلۋشىلەردى قارسى العان اۋرۋحانا ديرەكتورى نۇربول تۇرسىنباەۆ ەمدەۋ مەكەمەسىنە ەنگىزىلىپ جاتقان وزگە دە جاڭاشىلدىقتارمەن تانىستىردى. ول اتاپ ايتقان 3 باعىتتاعى جۇمىستاردىڭ ءبارى پاتسيەنتكە باعدارلانۋ اياسىندا جۇزەگە اسىرىلىپ وتىر. ءبىرىنشىسى, پاتسيەنتتەرگە ءبىر قادام جاقىندىق – ولاردى قولداۋ قىزمەتى, ەلەكتروندىق كەزەكتى ەنگىزۋ, پاتسيەنتتەردى جوسپارلى گوسپيتاليزاتسيالاۋ الگوريتمى بويىنشا جۇمىس ىستەيتىن فرونت-كەڭسەنىڭ اشىلۋى.
– مەملەكەت باسشىسى ايتقان كونتسەپتسياعا سايكەس «ەستيتىن مەملەكەت» قاعيداتى بويىنشا ءبىز بۇل فرونت-كەڭسەنى كىرەبەرىسكە, ياعني حالىق كوپ جينالاتىن, وتىراتىن جەرگە قويدىق. ويتكەنى كوپ مەكەمەلەردە بۇل قىزمەتتىڭ ادامدارى 2-3 قاباتتا ورنالاسادى. بۇل وتە ىڭعايسىز, حالىق سودان قايدا ارىزدانۋ كەرەكتىگىن بىلمەيدى. مەديتسينالىق قىزمەت ساپاسىن ارتتىرۋعا بايلانىستى حالىقتىڭ ءوتىنىش-شاعىمى جىلدان جىلعا كوبەيىپ كەلەدى. وسىعان وراي پاتسيەنتتەردى قولداۋ قىزمەتىن جاڭاشا فورماتتا جەتىلدىرۋدى قولعا الدىق, – دەدى دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ دەپارتامەنتىنىڭ باسشىسى دارحان تۇرلىبەكوۆ. جاقىن ارادا جاڭا جۇيە ارقىلى ونلاين رەجيمدە بوس توسەك-ورىن سانىن كورە الاتىن مۇمكىندىك تۋادى, بۇل قىزمەت اۋرۋحانا سايتىندا دا قولجەتىمدى بولماق. مۇندا تاۋلىگىنە 24 ساعات تىنىمسىز جۇمىس ىستەيتىن call-ورتالىق بار, وعان كۇن سايىن 500-دەن استام ءوتىنىش-شاعىمدار تۇسەدى.
ەكىنشى, جاڭا قابىلداۋ-دياگنوستيكالىق بولىمشەسىن سالۋ جوسپارى تانىستىرىلدى. بۇل بولىمشە قابىلداۋ ءحابى ءرولىن اتقارادى جانە مەكەمەنىڭ ەكى بىردەي عيماراتىن, ياعني اكۋشەرلىك جانە كلينيكالىق بلوكتاردى بىرىكتىرەدى. وسى ەكى بلوكتىڭ ورتاسىنا سالىناتىن جاڭا بولىمشە عيماراتىنىڭ قۇرىلىسى بيىل ءىىى توقساندا باستالىپ, 13 ايدان سوڭ كەلەسى جىلى سول ۋاقىتتا اياقتالادى دەپ جوسپارلانۋدا. جاڭا كەشەننىڭ ەڭ استىڭعى بولىگى بارلىق اۋرۋلار بويىنشا دياگنوستيكا جۇرگىزەتىن جابدىقتارمەن تولتىرىلادى. مۇندا تراۆماتولوگيالىق پۋنكت اشۋ دا كوزدەلۋدە.
ءۇشىنشىسى – گوسپيتالدىق فارماتسيا بولىمشەسىنىڭ اشىلۋى. جوبا الەمدىك تاجىريبەدە كەڭ قولدانىستا ءارى حالىقارالىق تالاپتاردىڭ ءبىرى بولىپ سانالادى. قازىر قالا بويىنشا جۇمىس ىستەپ تۇرعان 9 اۋرۋحانانىڭ ىشىندە وسى ەمدەۋ مەكەمەسىندە العاش رەت جۇزەگە اسىرىلعان جاڭا جوبانى الداعى ۋاقىتتا كوپبەيىندى اۋرۋحانالاردىڭ بارلىعىنا ەنگىزۋ جوسپاردا تۇر. استانا قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ پەن اتالعان اۋرۋحانا ديرەكتورىنىڭ كەڭەسشىسى, مەديتسينا عىلىمىنىڭ دوكتورى, پروفەسسور جاقسىلىق دوسقاليەۆ جاڭا بولىمشەنىڭ اشىلۋىنا وراي لەنتاسىن قيدى.
– مىنە, بۇگىن اۋرۋحانادا ناۋقاستارعا كومەك كورسەتۋ ساپاسىن ارتتىرۋعا باعىتتالعان جۇمىستار ناتيجەسىنە كۋا بولدىڭىزدار. اۋرۋحانانىڭ كلينيكالىق بولىمىندەگى پاتسيەنتتەردى قولداۋ بويىنشا فرونت-كەڭسەسىندە ناۋقاس ادامنىڭ تۋىستارى كەلىپ, سول جەردەن ناۋقاس تۋرالى تولىق اقپارات الىپ, دارىگەرمەن حابارلاسۋىنا بولادى. ودان بولەك, اۋرۋحانادا ەنگىزىلگەن تسيفرلىق شەشىمدەر پاتسيەنتتەر ءۇشىن دە ءتيىمدى, مەديتسينالىق پەرسونال قىزمەتىن جەڭىلدەتۋگە دە سەپتىك ەتەدى. جاڭادان اشىلعان بولىمشە جۇمىسى تولىق تسيفرلاندىرىلعان. ناۋقاسقا بەرىلەتىن ءدارى-دارمەك مولشەرى اۆتوماتتى تۇردە قاداعالانىپ وتىرادى. بولىمشەنىڭ بىرەگەي تۇسى – ءدارى-دارمەكتى ىسىراپ قىلماي, ارتىق شىعىننىڭ الدىن الۋ. سونداي-اق قاتە ءدارى-دارمەك تاعايىنداۋ قاۋپى اجەپتاۋىر ازايادى. الدىن الا ەسەپتەۋلەر بويىنشا جوبا جىلىنا 400 ملن تەڭگەگە دەيىن بيۋدجەت قاراجاتىن ۇنەمدەۋگە مۇمكىندىك بەرەدى, – دەدى باسقارما باسشىسى. جوبانىڭ نەگىزگى مىندەتى – دارىگەرلەردىڭ تاعايىنداۋى بويىنشا مەديتسينالىق پرەپاراتتاردى ۋاقتىلى جانە ساپالى دايىنداۋ, ولاردى مەديتسينالىق ۇيىمنىڭ كلينيكالىق جانە پارا-كلينيكالىق بولىمشەلەرىنە جەتكىزۋ.
– دارىلىك پرەپاراتتاردى كلينيكالىق فارماكولوگ ءار ناۋقاسقا ونىڭ جاسى, سالماعى, قارسى كورسەتكىشتەرى, تاۋلىكتىك دوزاسى جانە وزگە دە ولشەمدەر بويىنشا تاعايىندايدى. بۇل جوبانى ىسكە اسىرۋ كەزىندە ءبىزدىڭ كلينيكادا بۇعان دەيىن جۇزەگە اسىرىلعان اكگيۋن اقپاراتتىق جۇيەسىنىڭ دايىندىعى ماڭىزدى ءرول اتقاردى, – دەپ اتاپ ءوتتى اۋرۋحانانىڭ باس دارىگەرى نۇربول تۇرسىنباەۆ.
بولىمشەدە ۇزدىكسىز قىزمەتتە وتىراتىن كلينيكالىق فارماكولوگتار ەلەكتروندى تۇردەگى بارلىق دارىگەر تاعايىنداۋلارىن تەكسەرەدى. ەلەكتروندى جۇيەگە كەلىپ تۇسكەن دارىگەر تاعايىنداۋى شۇعىل تۇرىنە جاتسا, دارىلەر 15 مينۋتتا دايىندالىپ, بەرىلەدى, ال جوسپارلى تاعايىنداۋ بويىنشا 30 مينۋتتا ءتيىستى ءدارى ازىرلەنىپ, پاتسيەنتكە جونەلتىلەدى. جالپى جاڭا جۇيە ارقىلى ءبارى ايقىن, دارىلەردى قولدانۋدا ۇنەمدىلىككە قول جەتكىزىلەدى, سىبايلاس جەمقورلىققا جول بەرىلمەيدى.
اۋرۋحانانىڭ باستى ەرەكشەلىگى – مۇندا تەك استانالىقتار, ءتىپتى قازاقستاندىقتار عانا ەمەس, شەتەلدىكتەردىڭ دە كەلىپ ەم الۋىندا. اسىرەسە, رەسەي, وزبەكستان, قىرعىزستان ەلدەرىنىڭ ازاماتتارى ەمدەلۋگە كوپ كەلەدى ەكەن. سوندىقتان مەديتسينالىق ءتۋريزمدى قارقىندى دامىتىپ وتىرعان اۋرۋحانانىڭ وسىلايشا زاماناۋي تەحنولوگيالارمەن جابدىقتالۋى زاڭدى.
ەمدەۋ مەكەمەسىندەگى يننوۆاتسيالىق جاڭاشىل جۇمىستاردىڭ ءبارى «اكگيۋن» كومپانياسىنىڭ قولداۋىمەن اۋرۋحانامەن بىرلەسە جۇزەگە اسىرىلادى. وسى كومپانيانىڭ تاعى ءبىر «الاقان» دەگەن باعدارلاماسى اۋرۋحانانىڭ تۋرنيكەت ورناتىلعان كىرەبەرىستەرىنە ەنگىزىلگەن. ونىڭ ەرەكشەلىگى – عيماراتقا كىرىپ-شىققان سايىن تۋرنيكەتتەگى ارنايى ورىنعا الاقانىن قويعان ءاربىر قىزمەتكەردىڭ بۇكىل دەرەكتەرى سول جەردە قابىرعادا ءىلىنىپ تۇرعان ەكرانعا شىعاتىنى, ياعني قىزمەتكەردىڭ قاي ۋاقىتتا كەلىپ, كەتكەنىنەن بولەك, سۋرەتى, كىم بولىپ قىزمەت ىستەيتىنى دە جازىلىپ تۇرادى. «اكگيۋن» كومپانياسىنىڭ ورتا ازيا ءوڭىرى بويىنشا وكىلدىگى جۇلدىز داحىمباەۆانىڭ ايتۋىنشا, الداعى ۋاقىتتا وسى باعدارلاما اياسىندا تەك اۋرۋحانانىڭ مەديتسينالىق پەرسونالىنىڭ عانا ەمەس, سونىمەن بىرگە ءاربىر كەلۋشى پاتسيەنتتەر, تۇرعىنداردىڭ دا دەرەگىن ەنگىزۋ كوزدەلۋدە.
