ەلوردا تىنىسى

«جۇرەكپەن سەزىنۋگە» شاقىردى

بۇگىنگى تاڭدا استانا قالاسى اكىمدىگىنىڭ ءبىر عانا №1 پسيحولوگيا­لىق-پەداگوگيكالىق تۇزەۋ كابينەتىندە سوڭعى 10 جىل ىشىندە 5 مىڭنان استام بالا مەملەكەتتىك قىزمەتپەن قامتاماسىز ەتىلگەن. قازىرگى تاڭدا ولار قالانىڭ جالپى ءبىلىم بەرۋ ۇيىمدارىندا ءبىلىم الۋدا. الايدا اتا-انالار قالادا وسىنداي تۇزەۋ ۇيىمدارى بار ەكەنىن جانە ولاردىڭ قىزمەتى تۋرالى كوپ بىلە بەرمەيدى. وسى ورايدا اتالعان مەكەمە كەشە مۇمكىندىگى شەكتەۋلى بالالارعا ارنالعان «جۇرەكپەن سەزىنۋ» فەستيۆالىن وتكىزدى.

م.وتەمىسۇلى اتىنداعى وقۋشىلار سارايى ماڭىنداعى اربات دەمالىس الاڭىندا ۇيىمداستىرىلعان ءىس-شاراعا ءبىلىم مينيسترلىگى, الماتى قالاسى ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعى, استانا قالاسى ءبىلىم باسقارماسى, سارىارقا اۋدانى اكىمدىگى وكىلدەرى, دەمەۋشى ۇيىمدار, سونداي-اق مۇمكىندىگى شەكتەۋلى بالالار مەن ولاردىڭ وتباسىلارى قاتىستى.

– مۇمكىندىگى شەكتەۋلى بالالاردى الەۋمەتتىك بەيىمدەۋ جانە ينتەگراتسيالاۋ فەستيۆالىن وتكىزۋ ارقىلى قوعامنىڭ نازارىن مۇمكىندىگى شەكتەۋلى بالالاردىڭ ماسەلەلەرى مەن مۇددەلەرىنە اۋدارۋ كوزدەلىپ وتىر. سونىمەن قاتار بۇل ءىس-شارانى وتكىزۋدەگى تاعى ءبىر سۇبەلى سەبەپ – ەلورداداعى وسى «№1 پسيحولوگيالىق-پەداگوگيكالىق تۇزەۋ كابينەتى» كمم قۇرىلعانىنا بيىل 10 جىل تولۋى. بۇل مەكەمە استانا قالاسى اكىمىنىڭ قاۋلىسىمەن 2013 جىلى اشىلىپ, 0-18 جاس ارالىعىنداعى مۇمكىندىگى شەكتەۋلى بالالارعا پسيحولوگيالىق-پەداگوگيكالىق كومەك كورسەتەتىن العاشقى مەملەكەتتىك ۇيىمداردىڭ ءبىرى بولدى. سودان بەرى قانشاما ەرەكشە بالانىڭ دامۋىنا ىقپال ەتىپ, ولاردىڭ اتا-انالارىنىڭ جانىنا جالاۋ بولىپ كەلەدى, – دەدى ءبىلىم باسقارماسى باسشىسىنىڭ ورىنباسارى مارجان قايىربەكوۆا.

فەستيۆال بارىسىندا مۇگەدەك بالالاردىڭ وتباسىلارى مەن قالا تۇرعىندارى ءارتۇرلى سالا ماماندارىنان, اتاپ ايت­قاندا, سۋردوپەداگوگ, پەداگوگ-پسيحولوگ, تيفلوپەداگوگ, لوگوپەد, دەفەكتولوگتان بالالاردى ەرتە جاستان وڭالتۋ مۇمكىندىگى تۋرالى كاسىبي كەڭەس الدى.

قالانىڭ ارنايى ءبىلىم بەرۋ ۇيىمدارىنىڭ قاتىسۋىمەن بالالاردى تۇزەتۋ-دامىتۋ پروتسەسىندە قولدانىلاتىن وقۋ-ادىستەمەلىك قۇرالدار مەن يننوۆاتسيالىق جابدىقتاردىڭ كورمەسى ۇيىمداستىرىلدى. سونداي-اق قولونەرشىلەر, سۋرەتشىلەر, انيماتورلار ويىن-ساۋىق جانە تانىمدىق باعدارلامالار ۇسىنىپ, فەستيۆالدىڭ جوعارى دەڭگەيدە وتۋىنە اتسالىستى. ەرەكشە قاجەتتىلىكتەرى بار بالالار ءارتۇرلى باعىتتاعى شەبەرلىك ساباقتارىنا قاتىسۋعا مۇمكىندىك الدى. سونداي-اق بالالاردىڭ اقىل-ويى مەن فيزيكالىق دامۋىنا ىقپال ەتەتىن, اسىقپەن جانە نەيروگيمناستيكالىق جاتتىعۋلاردى ورىندايتىن ۇلتتىق ويىندار وتكىزىلدى. تىرەك-قوزعالىس اپپاراتىندا اقاۋى بار ادامدارعا بەيىمدەلەتىن سپورتتىق قۇرال-جابدىقتار كورسەتىلدى. جالپى ءىس-شاراعا ماقساتتى توپتاعى 2000-نان استام بالالار مەن اتا-انالار قاتىستى.

تاعىدا

رايحان راحمەتوۆا

«استانا اقشامى» گازەتىنىڭ شولۋشىسى

ۇقساس جاڭالىقتار

پىكىر ۇستەۋ

Back to top button