استانا قالاسى ءماسليحاتىنىڭ توراعاسى ەرلان كاناليموۆ پەن ەلوردا اكىمىنىڭ ورىنباسارى نۇرلان سولتانبەكوۆ ءماسليحات دەپۋتاتتارىمەن بىرگە باس قالانىڭ كەلەشەكتەگى ينفراقۇرىلىمعا قاتىستى ماسەلەلەرىن تالقىلادى. بۇل تۋرالى ە.كاناليموۆ ءوزىنىڭ الەۋمەتتىك جەلىدەگى پاراقشاسىندا جازدى.
«ارىپتەستەرمەن جانە ەلوردا اكىمىنىڭ ورىنباسارى نۇرلان سولتانبەكوۆپەن بىرگە قالامىزدىڭ الداعى جىلدارى بولۋى ىقتيمال ينفراقۇرىلىمدىق ماسەلەلەردى تالقىلادىق. اتاپ ايتساق, حالىق سانىنىڭ كوبەيۋى, قۇرىلىس قارقىنى, سونداي-اق جىلۋ جانە سۋمەن جابدىقتاۋ جەلىلەرىنىڭ توزۋى ماسەلەلەرى بويىنشا وي-پىكىرلەرىمىزدى بىلدىك» دەدى ە.كاناليموۆ.
ونىڭ ايتۋىنشا, قازىرگە دەيىن ءتيىستى دەڭگەيدە تازالانباعان استانا سۋ قويماسى 2028 جىلعا قاراي سۋ رەزەرۆكە اينالۋى مۇمكىن. «ەسىلدى سۋعا تولتىرۋ ق.ساتپاەۆ ارناسى ارقىلى جۇزەگە اسىرىلادى. سونىمەن قاتار, رەزەرۆتىك سۋ قۇبىرىن جوبالاۋ باستالدى. سۋمەن جابدىقتاۋ ماسەلەلەرىن شەشۋ ءۇشىن شامامەن 11,5 ميلليون شارشى مەتر تۇرعىن ءۇيدى ءتورت جىلدا كەزەڭ-كەزەڭىمەن پايدالانۋعا بەرۋ ۇسىنىلدى» دەپ ءتۇسىندىردى ول.
بۇدان بولەك, جيىنعا قاتىسۋشىلار ينجەنەرلىك ينفراقۇرىلىمنىڭ بىرقاتار ماسەلەلەرىن, سونىڭ ىشىندە ەلوردامىزدىڭ وڭ جاعالاۋىن اباتتاندىرۋ جولدارى تۋرالى وي ءبولىستى. ە.كاناليموۆ جاقىن ارادا وسى ماسەلەلەردى شەشۋ ءۇشىن كوميسسيا قۇرىلاتىنىن, ونىڭ قۇرامىنا استانا قالاسى ءماسليحاتىنىڭ ءار تۇراقتى كوميسسياسىنان ءبىر دەپۋتات كىرەتىنىن جەتكىزدى.
