كەشە ەلىمىزدە «ارحيۆ جانە بولاشاق ۇرپاق» اتتى رەسپۋبليكالىق جوبا اياسىنداعى شارالار ءوتتى.
بۇل جوبا اياسىندا مەكتەپ وقۋشىلارى مەن جوعارى وقۋ ورىندارى ستۋدەنتتەرى ساياسي قۋعىن-سۇرگىن قۇرباندارى تۋرالى ارحيۆتەگى اسا قۇندى قۇجاتتاردى, حح عاسىردىڭ 20, 30-جىلدارىنداعى اشارشىلىققا قاتىستى ماتەريالداردى, جاستار قوزعالىسىنىڭ تاريحىن, قازاقستان رەسپۋبليكاسى تاۋەلسىزدىگىنىڭ قالىپتاسۋىن جانە باسقا دا تاريحي فاكتىلەردى كۋالاندىراتىن قۇجاتتارمەن تانىسىپ, ءبىلىمىن جەتىلدىرە الادى.
مادەنيەت جانە سپورت مينيسترلىگىنىڭ باستاماسىمەن جۇزەگە اسقان رەسپۋبليكالىق جوبا اياسىندا ەلىمىزدىڭ بارلىق مەملەكەتتىك ارحيۆتەرىندە «اشىق ەسىك» كۇنى ءوتتى.
«جاس ازاماتتار ءۇشىن مۋزەيلەر مەن كىتاپحانالار عانا ەمەس, ارحيۆتەر دە ماڭىزدى تاريحي وقيعالاردى, ۇلتتىق ءداستۇردى, قازاقستاننىڭ كورنەكتى قوعام جانە مەملەكەت قايراتكەرلەرىنىڭ قىزمەتىن زەردەلەۋگە ارنالعان ورتالىققا اينالۋعا ءتيىس. ءوز ەلىمىزدىڭ تاريحىنا ءۇڭىلىپ, سيرەك كىتاپتاردى رەستاۆراتسيالاۋ, قولجازبالاردى سكانەرلەۋ, ساياسي قۋعىن-سۇرگىن قۇرباندارى تۋرالى ارحيۆ قۇجاتتارىن ءوز كوزدەرىمەن كورۋ ماڭىزدى دەپ ويلايمىن. ءبىز ءارتۇرلى جاستاعى بالالاردى قامتىپ, وقۋشىلار مەن ستۋدەنتتەرگە اسا قۇندى قۇجاتتارعا قول جەتكىزۋگە مۇمكىندىك بەرۋىمىز كەرەك», – دەپ اتاپ ءوتتى مادەنيەت جانە سپورت ءمينيسترى داۋرەن اباەۆ.
استانا قالاسىنىڭ مەملەكەتتىك ءارحيۆى بۇل جوبانى قولداپ, «مەنىڭ قالامنىڭ تاريحى» اتتى ەكسكۋرسيالىق كورمە وتكىزدى. ءىس-شارانىڭ ماقساتى – بالالاردىڭ وتانعا دەگەن سۇيىسپەنشىلىگىن وياتۋ, ەلوردامىزدىڭ قالىپتاسۋ تاريحىمەن جاقىن تانىستىرۋ, وسكەلەڭ ۇرپاقتى وتانسۇيگىشتىككە, پاتريوتيزمگە تاربيەلەۋ.
«وقۋشىلار وزدەرىنىڭ ءومىر سۇرەتىن قالاسىنىڭ تاريحىن تەرەڭىنەن ءتۇسىنىپ, تۇيسىنەتىن بولسا, بولاشاقتا قۇرمەتپەن قارايدى دەپ سەنەمىز» دەيدى ۇيىمداستىرۋشىلار.
ءىس-شارا بارىسىندا وقۋشىلار كورمەنى قىزىعا تاماشالادى. سۇراقتار قويىپ, وزدەرىنە قىزىق ءارى كەرەك اقپاراتتار الدى. ۆيكتورينالىق سۇراقتارعا دۇرىس جاۋاپ بەرگەن وقۋشىلارعا «ەلوردا – تاۋەلسىزدىك سيمۆولى» كىتابى سىيعا تارتىلدى.
بايان اسىلبەكوۆا
