ءا.مامبەتوۆ اتىنداعى مەملەكەتتىك دراما جانە كومەديا تەاترىندا اقىن اقبەرەن ەلگەزەكتىڭ «بولماعان بالالىق شاق» پوۆەسى جەلىسىمەن ساحنالانعان ادەبي شىعارما اتتاس درامانىڭ پرەمەراسى ءوتتى. سپەكتاكلدىڭ قويۋشى-رەجيسسەرى – ءالي بيداحمەت.
قويىلىم اۆتورلىق بايانداۋ تاسىلىمەن باستالىپ, ءوربىپ وتىرادى. ءومىربايان تۋىندىسى ەش قوسپاسى جوق شىنايى ومىرگە نەگىزدەلگەن. سونىسىمەن تارتىمدى بولىپ وتىر. مۇندا تۋعان اكەدەن ەرتە قالىپ, ناعاشىلاردىڭ, ودان كەيىن قاتىگەز وگەي اكەنىڭ قولىندا وسكەن جەتىم بالانىڭ ايانىشتى ءومىرى باياندالادى. باس كەيىپكەر – اقىننىڭ بالا بەينەسى.
ءبىر ايتا كەتەرلىگى, ادەبي تۋىندى اراعا از ۋاقىت سالىپ, بيىل ەكى تەاتردا قاتار ساحنالاندى. الماتىلىقتار وسى اتاۋمەن سپەكتاكلدى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنان تاماشالادى. ال استانالىقتار تەاتر رەفورماتورىنىڭ اتاۋى بەرىلگەن ونەر وشاعىنان كورىپ, كول-كوسىر اسەر الدى.
وسىدان 15 جىل بۇرىن جازىلعان پوۆەستى اۆتور شىعارمالارىن بالا كەزىنەن ءسۇيىپ وقىعان كورنەكتى قالامگەر بەردىبەك سوقپاقباەۆتىڭ رۋحىنا ارنادى. پروزاعا قالام تارتۋىنىڭ سەبەبى – ىشتە جينالىپ قالعان كۇيزەلىستى شىعارۋ. جالپى كەز كەلگەن شىعارماشىلىق يەسىنىڭ قيىن تاعدىرى بولماسا, قۇدىرەتتى تۋىندىلاردىڭ تۋى نەعايبىل. اتالمىش شىعارما سوعان تاعى كوز جەتكىزەدى. اۆتور استاناداعى پرەمەراعا قاتىسىپ, ونى جازۋداعى ماقساتى جايىندا ايتتى.
«بۇل – كەز كەلگەن اۋىلدا ورىن الۋى مۇمكىن وقيعا. جەتىمدىك پروبلەماسى تەك قانا قازاقتىڭ ەمەس, بۇكىل الەمنىڭ پروبلەماسى. سوندىقتان بۇل شىعارمانى جازعان كەزدە, ءبىر جەتىم بالانىڭ قولىنا تۇسسە, ونىڭ بولاشاعى ءوزىنىڭ قولىندا بولىپ, تالپىنسا ۇلكەن ازامات بولاتىنىن, شۋاقتى, جارقىن ومىرگە جەتەتىنىن ءبىلسىن دەپ جازدىم. ەكىنشىدەن, قولىندا جەتىم بالا بار, جەتىم اسىراپ وتىرعان ۇلكەن كىسىلەر سونداي بالانىڭ جان دۇنيەسى مۇلدەم باسقا بولاتىنىن ءتۇسىنسىن, ونىڭ نازىك, جارالانعىش جۇرەگىن اياسىن, باسىنان سيپاپ قويسىن دەگەن الدىمدا ماقسات تۇردى» دەدى اقىن اقبەرەن ەلگەزەك.
پرەمەراعا استانا قالاسى مادەنيەت باسقارماسىنىڭ باسشىسى جاڭاباي مەيىرمانقۇلوۆ قاتىسىپ, كەزىندە وسى شىعارمانى وقىپ اسەرلەنگەنىن ايتا كەلە, اۆتوردى تەاتر ۇجىمى اتىنان «ءا.مامبەتوۆ اتىنداعى» توسبەلگىمەن ماراپاتتادى. سپەكتاكلدە ارتىستەر ەڭبەگىن ەرەك اتاپ ءوتۋ كەرەك, بارلىعى وزىنە بەكىتىلگەن رولدەردى بەرىلە كەسكىندەپ شىقتى. باس كەيىپكەر, ياعني بالا اقبەرەننىڭ بەينەسىن اكتەر قازبەك امانجول سومدادى. بىزگە اقوشتىڭ سەمەي پوليگونىنىڭ زاردابىنان مۇگەدەك بولىپ قالعان اعاسى دانىشپاندى ويناعان اكتەردىڭ ونەرى ەرەكشە ۇنادى.
بيبىگۇل جەكسەنباي, سەناتور:
– ءبىر كۇلدىرىپ, ءبىر كۇڭىرەنتكەن, كورەرمەن كوڭىلىنىڭ پەرنەلەرىن باسىپ, جۇرەگىن سىزداتىپ, كوزىنە جاس كەلتىرگەن قويىلىم قوعامداعى بۇرىنعى مەن قازىرگى دەرتتەردى كورسەتەدى. ءدوپ باسادى. ويلاندىرادى.
اۋەل باستا شىعارماعا ارقاۋ بولعان بالانىڭ ىشكى, سىرتقى ارپالىسى ەندى كورەرمەندى سول سەزىمدى سەزىنۋگە, سول ورتانىڭ اراسىندا بولۋعا مۇمكىندىك بەرىپ وتىرعانداي. ءبىر كۇندە اكەدەن ايىرىلىپ, انادان تىرىدەي جەتىمدىك كورگەن, وگەي اكە قورلىعىن سەزگەن, تاۋقىمەتتى بالا كەزدەن بەلى قايىسىپ كوتەرگەن اقوش – باستى كەيىپكەر. اقوش – ادەتتەگى قويىلىمداعىداي كوركەم قيالدىڭ تۋىندىسى ەمەس, ومىردە بار, اقىننىڭ ءوزى. ءوزىمىز بىلەتىن – اقبەرەن.
قويۋشى-رەجيسسەرى ءالي بيداحمەتتىڭ العاشقى ەڭبەگىنىڭ ءبىرى ەكەنىنە قاراماستان, تىڭ ءتاسىل, ادەمى شىعارماشىلىق قولتاڭباسى, فالسافالىق قادامى ايقىن بايقالادى. ساحناعا «موسكۆيچ» كولىگىن ايداپ كەلۋ, سىركىرەپ جاۋعان جاۋىن, كۇن كۇركىرەپ, نايزاعاي جارقىراۋى سياقتى جاڭا تەحنيكا تاسىلدەرىن دە كوركەم پايدالانادى. سپەكتاكلدى اسەم اۋەنمەن كوركەمدەگەن سۇلتان تۇرسىنبەكوۆ تە كورەرمەن كوڭىلىنىڭ كىلتىن تاۋىپ, شىعارمانىڭ شىنايىلىعىن كۇشەيتە تۇسكەن. اكتەرلەردىڭ ءبارى ءوز ءرولىن سونداي شىنايى سومداپ, ولاردىڭ اكتەر ەكەنىن ءتىپتى ۇمىتىپ كەتەسىڭ.
جالپى قازاق تەاترىندا ورلەۋ ءداۋىرى باستالعانداي. زالدا ينە شانشار جەر بولمادى. ءبىر جارىم ساعاتتىق قويىلىمدى ەكى اياعىنان تىك تۇرىپ كورىپ شىققان كورەرمەندەر – اتىراۋ, شىمكەنت, سەمەيدەن ءدال وسى پرەمەرانى كورۋگە كەلگەن اعايىندى كورىپ قۋاندىم. قوعام مۇنداي شىنايى دۇنيەگە شولىركەپ قالعان. ۇلتتى مورالدىق ازعىندىقتان, سەزىمدىك جاداۋلىقتان قۇتقاراتىن, رۋحانياتىمىزدى كۇشەيتەتىن وسىنداي دۇنيەلەر كوپ بولا بەرسىن!
