جىل وتكەن سايىن ساۋلەتى مەن داۋلەتى وركەندەي تۇسكەن ەلوردانىڭ تۇرعىندار سانى عانا ەمەس, جەر اۋقىمى دا كەڭەيە تۇسكەن. استانا ىرگەسىندەگى بىرقاتار اۋىلدار بۇگىندە باس قالانىڭ قۇرامىنداعى تۇرعىندار الابىنا اينالدى. بۇل رەتتە ەلوردا اكىمدىگى قالانىڭ شەتكى اۋداندارىن دامىتۋ بويىنشا جۇيەلى باعدارلاما نەگىزىندە جۇمىس اتقارىپ كەلەدى. دەمەك, باس قالادا ورتالىق ايماق نەمەسە شەتكى ايماق دەگەن ۇعىم جوق.
استانا قالاسىنىڭ اكىمى جەڭىس قاسىمبەك سارىارقا اۋدانىنداعى اگروقالاشىق تۇرعىن الابىنىڭ تۇرعىندارىمەن كەزدەسىپ, تۇيتكىلدى ماسەلەلەردى تالقىلادى. كەزدەسۋدە تۇرعىندار جولدار مەن تروتۋارلار, ينجەنەرلىك جەلىلەر سالۋ, جارىقتاندىرۋ, بەينەباقىلاۋ كامەرالارىن ورناتۋ, توزىعى جەتكەن تۇرعىن ۇيلەردى بۇزۋ, گازداندىرۋ جانە تاعى باسقا ماسەلەلەردى كوتەردى.
«سۇراقتار جەتكىلىكتى, ولار شەشىمىن تابادى. تۇرعىندارمەن بىرگە ەڭ الدىمەن ورىندالۋى ءتيىس مىندەتتەردى بەلگىلەيمىز. اگروقالاشىق ەلدى مەكەنىن كەستەگە سايكەس كەزەڭ-كەزەڭىمەن دامىتامىز. ماسەلەن, تۇرعىندار گازداندىرۋ ماسەلەسىن كوتەردى. اگروقالاشىق ەلدى مەكەنى گازداندىرىلعان, بىراق جەكەلەگەن تۇستارى بار, ولار بويىنشا بيىل جۇمىس جوباسىن اياقتايمىز, ال كەلەر جىلى جەلى قۇرىلىسىن باستايمىز جانە قالعان ۇيلەردى گازعا قوسامىز» دەپ جازدى ج.قاسىمبەك ءوزىنىڭ الەۋمەتتىك جەلىدەگى پاراقشاسىندا.
قالا باسشىسى اپاتتى ۇيلەردى بۇزۋعا قاتىستى ماسەلەگە دە بولەك توقتالدى. «كەلەسى جىلى اگروقالاشىق ەلدى مەكەنىندە ءۇش ءۇيدى بۇزۋدى جوسپارلاپ وتىرمىز. قالا بويىنشا بارلىعى 200-دەن استام اپاتتى ۇيلەر بار. الداعى 3 جىلدا توزىعى جەتكەن ۇيلەردىڭ تۇرعىندارى ءۇشىن 2,5-3 مىڭعا جۋىق پاتەر سالۋدى جوسپارلاپ وتىرمىز» دەدى اكىم.
سونداي-اق جەڭىس قاسىمبەك سۋمەن جابدىقتاۋ بويىنشا ماسەلەگە قاتىستى سۇراققا جاۋاپ بەردى. «بيىل ماۋسىم ايىندا №3 سۋ سورعىش-سۇزگىش ستانتسيانى پايدالانۋعا بەرەمىز. تامىز ايىندا تاۋلىگىنە 100 مىڭ تەكشە مەتردەن اسا سۋ بەرىلەدى. دەمەك, ماسەلە ءىشىنارا شەشىلەدى» دەدى ول. قالا باسشىسى اباتتاندىرۋ ماۋسىمى بارىسىندا اۋدانداردا جولدار, تروتۋارلار, اۋلالار مەن قوعامدىق كەڭىستىكتەر سالۋ جۇمىسى جۇرگىزىلىپ جاتقانىن ايتتى.
