ەلوردادا قول دوبىنان قىزدار اراسىنداعى قازاقستان چەمپيوناتى مارەسىنە جەتتى. رەسپۋبليكا كۇنى مەرەكەسى اياسىندا وتكەن جارىسقا ۇزدىك 8 كوماندا قاتىستى.
ون بەس جانە ودان تومەن جاستاعى سپورتشىلار اراسىنداعى چەمپيوناتتا استانا, شىمكەنت, الماتى قالالارىمەن قاتار, قاراعاندى, پاۆلودار, اقتوبە, اقمولا, الماتى وبلىستارىنىڭ قۇراما كوماندالارى سۋپەرليگا جانە جوعارى ليگا بويىنشا سىنعا ءتۇستى.
«چەمپيوناتتىڭ نەگىزگى ماقساتى – ەلوردادا بۇقارالىق سپورت ءتۇرىن كەڭىنەن دامىتۋ ارقىلى سالاۋاتتى ءومىر سالتىن قالىپتاستىرۋ قاعيداتتارىن ناسيحاتتاۋ, بارلىق ەلدى مەكەندەردە قول دوبى ويىنىن ودان ءارى دامىتۋ, تۇرعىنداردى دەنە شىنىقتىرۋ مەن سپورتپەن جۇيەلى شۇعىلدانۋعا تارتۋ, قىزدار اراسىندا قول دوبى ويىنىنىڭ شەبەرلىك دەڭگەيىن كوتەرۋ, سپورت رەزەرۆىن دايارلاۋدى قامتاماسىز ەتۋ, وبلىس قۇراما كومانداسىن ۇزدىك ويىنشىلارمەن تولىقتىرىپ, الەمدىك دەڭگەيدەگى جارىستارعا قاتىستىرۋ» دەپ اتاپ ءوتتى استانا قالاسىنىڭ №5 بجمورسم باسشىسى قۋات تلەگەنوۆ.
جارىس قورىتىندىسىندا شىمكەنتتەن كەلگەن گاندبولشىلار پاۆلودار قالاسىنىڭ سپورتشىلارىن ايقىن باسىمدىقپەن ۇتىپ, باس جۇلدەنى ولجالادى. پاۆلودار قالاسىنىڭ قول دوپشىلارى ەكىنشى ورىننان كورىنسە, قولا مەدال الاڭ قوجايىندارى استانا قالاسىنىڭ ارۋ قىزدارىنا بۇيىردى.
چەمپيونات بارىسىندا قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ استانا كومانداسىنىڭ بىرقاتار ويىنشىلارىنا «قازاقستاننىڭ سپورت شەبەرى» كۋالىگىن تاپسىردى. وسىلايشا ۇلجان كامەتاي, مادينا مىرزامسەيتوۆا, مادينا ەگينباەۆا, مارجان ەلەۋسيز, جاميلا سارسەنبەكوۆا, داميرا جاپاروۆا جانە لۋيزا ولەينيكوۆا قالامىزداعى سپورت شەبەرلەرى قاتارىن تولىقتىردى.
