4 ماۋسىم كۇنى ەركەعالي راحماديەۆ اتىنداعى مەملەكەتتىك اكادەميالىق فيلارمونيا ساحناسىندا قازاقستان مەن تاتارستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆانىڭ شىعارماشىلىق كەشى وتەدى. «ەلىمە تاعزىم» كونتسەرتى قازاقستان رەسپۋبليكاسىنىڭ مەملەكەتتىك رامىزدەر كۇنىنە ارنالادى.
كەشتە نۇرجامال ۇسەنباەۆا ءوزىنىڭ اۋقىمدى جانە الۋان ءتۇرلى رەپەرتۋارىنان ەڭ ۇزدىك شىعارمالارىن ورىندايدى. كونتسەرت تاتارستاننىڭ حالىق ءارتىسى, قازاقستاننىڭ ەڭبەك سىڭىرگەن قايراتكەرى, قۇرمانعازى اتىنداعى ۇلتتىق كونسەرۆاتوريانىڭ قۇرمەتتى پروفەسسورى, شاقىرىلعان ماەسترو رەنات سالاۆاتوۆتىڭ جەتەكشىلىگىمەن, فيلارمونيانىڭ سيمفونيالىق وركەسترىنىڭ سۇيەمەلدەۋىمەن وتەدى. كەشتىڭ كوركىن حالىقارالىق بايقاۋلاردىڭ لاۋرەاتى, ەلوردا فيلارمونياسىنىڭ كامەرالىق حورى (كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى, پروفەسسور گۇلميرا قۇتتىباداموۆا) كوركەيتە تۇسپەك. پريمامەن بىرگە ساحناعا وتاندىق جانە الەمدىك وپەرا جۇلدىزدارى شىعادى.
كونتسەرتتى قازاق وپەرا ونەرىنىڭ التىن قورىنا ەنگەن نۇرجامال ۇسەنباەۆانىڭ ورىنداۋىنداعى مۇقان تولەباەۆتىڭ «باقىت ءۆالسى», ا.جۇبانوۆ پەن ل.ءحاميديدىڭ «اباي» وپەراسىنان اجار ارياسى اشادى. م.تولەباەۆتىڭ «ءبىرجان مەن سارا» وپەراسىنان ايگىلى «ايتىستى» ءانشى كونتسەرتتىڭ ارنايى قوناعى, قازاقستاننىڭ ەڭبەك سىڭىرگەن قايراتكەرى مەدەت شوتاباەۆپەن دۋەتتە شىرقايدى.
باعدارلامانىڭ تاعى ءبىر جۇلدىزدى قوناعى چەح وپەرا ءانشىسى, ەۋروپا ونەر وداعىنىڭ كوركەمدىك جانە مادەني قىزمەت سالاسىنداعى ەڭ جوعارى ماراپاتى – «التىن ەۋروپا» (Golden Europea) يەگەرى فيليپ باندجاك بولماق. نۇرجامال ۇسەنباەۆامەن بىرگە ول ر.لەونكاۆاللونىڭ «پاياتسى» وپەراسىنان اريا ورىندايدى.
تاعى ءبىر دۋەت – وزبەكستان مەملەكەتتىك كونسەرۆاتورياسى مۋزىكالىق تەاترىنىڭ ءسوليسى, وزبەكستان, قاراقالپاقستان جانە باشقۇرتستان رەسپۋبليكالارىنىڭ حالىق ءارتىسى جەڭىسبەك پيازوۆپەن بىرگە ت.مۇحامەدجانوۆتىڭ «مەن سەنىمەن كەزدەستىم» شىعارماسى ورىندالادى.
نۇرجامال ۇسەنباەۆا مەن ونىڭ بەنەفيسىنىڭ قوناقتارى كورەرمەندەرگە ۆوكالدىق ونەردىڭ باسقا دا اسىل مارجاندارىن – دج.ءروسسينيدىڭ «سەۆيل شاشتارازى» وپەراسىنان فيگارو ارياسى, بەرنارد حەررماننىڭ «Citizen Kane» وپەراسىنان سالامبو ارياسى, دج.ءپۋچچينيدىڭ «تۋراندوت» وپەراسىنان كالافا ارياسى, ۆ.حەربەرتتىڭ «The Enchantress», مانۋەل پونسەنىڭ «Estrellita», اگۋستين لارانىڭ «گرانادا» ارياسى, د.مودۋنونىڭ «Volare» جانە ت. ب. ۇسىنادى. كونتسەرت ت.مۇحامەدجانوۆتىڭ «وتان» شىعارماسىن بارلىق ورىنداۋشىلاردىڭ بىرلەسكەن ورىنداۋىمەن اياقتالادى.
