2023 جىلعا دەيىن استانادا وقۋشى سانى 123 مىڭ بالاعا كوبەيەدى دەپ كۇتىلۋدە. بۇعان قازىر مەكتەپتەرگە سىيماي جاتقان 11 مىڭ بالانى قوسىڭىز. اكىمدىك بۇل ماسەلەنى قالاي شەشپەك؟
ارينە, حالىق سانى وسكەن سايىن قوسىمشا مەكتەپ قۇرىلىسىن سالۋعا, بالاباقشادا ورىن تاپشىلىعىن جويۋعا باسىمدىق بەرىلمەسە بولمايدى. ەلوردا مەكتەپتەرىندە جىل سايىن وقۋشىلار سانى ورتاشا العاندا 15-18 مىڭ ادامعا كوبەيەتىنىن ەسكەرسەك, ءبىرىنشى كەزەكتە ينفراقۇرىلىم ءماسەلەسى شەشىلۋ كەرەك. ءدال قازىرگى ۋاقىتتا ءبىلىم سالاسىنا قاتىستى استانا اكىمدىگى الدىندا مەكتەپ جانە مەكتەپكە دەيىنگى ءبىلىم بەرۋدە ۇلكەن ەكى ماسەلە بار. ونىڭ ءبىرى – بالالاردى 100 پايىز مەكتەپپەن قامتۋ, ال ەكىنشىسى – وقۋ ورىندارىن تولىقتاي جەتكىلىكتى ەتۋ.
الدىمەن بالاباقشا ماسەلەسىنە توقتالايىق. قازىرگى ۋاقىتتا جەكەمەنشىك بالاباقشالارعا مەملەكەتتىك تاپسىرىس 40 پايىزدى قۇرايدى. سونىمەن قاتار 4 جاڭا بالاباقشا سالىناتىنى بەلگىلى بولدى. اكىم باقىت سۇلتانوۆتىڭ ايتۋىنشا, ونىڭ ءبىرى كورۋ قابىلەتى بۇزىلعان بالالارعا ارنالادى.
ءبىلىم باسقارماسىنىڭ باسشىسى ءانۋار جانعوزين 2018-2019 وقۋ جىلدارىندا ەلوردانىڭ 5 مەكتەبى ءۇش اۋىسىمدىق جۇمىس تارتىبىنە كوشىرىلگەنىن ايتقان ەدى. بۇدان بولەك, تاعى 20 مەكتەپتە ادام سانىنىڭ تىعىزدىعى بار. جالپى, وقۋشى ورىندارىنىڭ تاپشىلىعى 17 مىڭدى قۇرايدى. بۇل ماسەلەنى شەشۋ ءۇشىن 2023 جىلعا دەيىن 120 مىڭ ورىن دايىنداۋ قاجەت. ياعني جاڭا نىساندار سالۋ مەن ىسكە قوسۋ ارقىلى شەشىمىن تابۋ كوزدەلگەن. جاڭا نىسان دەمەكشى, وتكەن جىلى استانادا 4 جاڭا مەكتەپ اشىلدى. ال قاڭتار ايىندا №20 مەكتەپ جۇمىس ىستەي باستادى. بۇيىرسا, جازدىڭ ورتاسىنا قاراي م.جۇماباەۆ داڭعىلىنداعى جاڭا مەكتەپ پايدالانۋعا بەرىلەتىن بولادى. سونىمەن قاتار ەلوردادا جەكەمەنشىك مەكتەپتەردىڭ دە كوبەيگەنى كوڭىلگە مەدەۋ بولىپ تۇر. رەسمي دەرەككە سۇيەنسەك, 15 جەكەمەنشىك مەكتەپتىڭ 8-ىنە 3 مىڭ ورىنعا مەملەكەتتىك تاپسىرىس بەرىلگەن ەكەن. الداعى ۋاقىتتا ولاردىڭ دا سانى كوبەيەدى. ال الداعى 3 جىلدا ءباا جانە سينگاپۋر ينۆەستورلارىنىڭ ەسەبىنەن 6-7 مىڭ ورىندى جەكەمەنشىك مەكتەپتەردى اشۋ جوسپاردا بار. قىسقاسى, ەلوردالىق وقۋشىلاردىڭ زامان تالابىنا ساي ءبىلىم الۋى كەزەك كۇتتىرمەي شەشىلەتىن مىندەتتەردىڭ ءبىرى بولىپ وتىر.
