استانا قالاسىنىڭ اكىمى التاي كولگىنوۆ «التىن شار» كوپپاتەرلى تۇرعىن ءۇي كەشەنىنىڭ ۇلەسكەرلەرىمەن كەزدەستى. ءبىر قۋانارلىعى, 13 مىڭنان اسا ۇلەسكەر كوپتەن كۇتكەن باسپاناسىنا قول جەتكىزىپ, قۋانىشقا بولەندى.
قالا باسشىسى قۇرىلىسى ۇزاققا سوزىلعان نىساننىڭ بەس كوپپاتەرلى ۇيدەن تۇراتىنىن ايتتى. «ۇلەسكەرلەردىڭ جالپى سانى 1200-دەن اسا وتباسىلار. نىسانعا كىرگەن كەزدە «ساقالدى» قۇرىلىستىڭ جۇمىسى توقتاپ تۇردى. ءبىر جەرىندە كەم دەگەندە ءۇيدىڭ قاڭقاسى بولسا, كەي جەرلەردە ۇيلەردىڭ بلوكتارى ورناتىلىپ, تەك قادالار قاعىلعان ەدى. ياعني ەشتەڭە بولعان جوق. الايدا كوپپاتەرلى تۇرعىن ءۇي كەشەنىنىڭ قۇرىلىسى 2017 جىلى اياقتالۋى ءتيىس ەدى. ينۆەستور تارتۋدىڭ ارقاسىندا قۇرىلىس جۇمىستارى قايتا جاندانا باستادى. بۇعان دەيىن ءبىز قۇرىلىستى اياقتاپ, ۇلەسكەرلەرگە ءتورت تۇرعىن ءۇي كەشەنىنىڭ ء(بىرىنشى جانە ەكىنشى ورىن) كىلتتەرىن تاپسىردىق. قازىرگى ۋاقىتتا قالعان تۇرعىن ءۇي كەشەنى بويىنشا سوڭعى جۇمىستار جۇرگىزىلۋدە (3-ورىندا). جالپى العاندا, كوپپاتەرلى تۇرعىن ءۇي كەشەنى بويىنشا قۇرىلىس جۇمىستارىنان باسقا, سىرتقى سۋ قۇبىرى, كارىز, ەلەكتر جەلىلەرى جانە ت.ب. جەلىلەرىن ورناتۋ بويىنشا جۇمىستار جۇرگىزىلدى. دەگەنمەن, ءالى دە اتقارار جۇمىس كوپ. كەزدەسۋدە ۇلەسكەرلەر ليفتىلەردىڭ جۇمىسى, «ساقالدى» قۇرىلىستى اياقتاۋ, اباتتاندىرۋ, الەۋمەتتىك نىساندار (مەكتەپ, ەمحانا), پاركينگ, اۋلالار جانە ت.ب. سالۋ ماسەلەلەرىن ايتتى» دەدى التاي كولگىنوۆ.
قالا اكىمى تۇرعىندار كوتەرگەن ءاربىر ماسەلە بويىنشا جۇمىستار رەت-رەتىمەن اتقارىلاتىنىن جەتكىزدى. «جۇمىستى كەزەڭ-كەزەڭمەن جۇرگىزەمىز. مىسالى, اۋا رايى جاعدايىن ەسكەرە وتىرىپ, اۋلا قۇرىلىسىن الداعى كوكتەمگە (2023 جىل) جوسپارلايمىز, سونداي-اق ايتىلعان الەۋمەتتىك نىسانداردىڭ قۇرىلىسىنا ارنالعان ۋچاسكەلەردى بەكىتەمىز. مەملەكەت باسشىسىنىڭ تاپسىرماسى بويىنشا قۇرىلىسى ۇزاققا سوزىلعان نىسانداردىڭ قۇرىلىسىن اياقتاۋ بويىنشا جۇيەلى جۇمىستار جۇرگىزۋدەمىز. 16 مىڭنان استام ۇلەسكەر-وتباسىلاردىڭ 13 مىڭنان استامى كوپتەن كۇتكەن باسپاناسىنا قول جەتكىزدى. قالعان قاڭتارىلعان قۇرىلىستار بويىنشا قادامدىق ءىس-شارالار جوسپارى بار» دەپ ءتۇسىندىردى قالا اكىمى.
