بولات ۇزاقوۆ, قر ەڭبەك سىڭىرگەن قايراتكەرى, رەجيسسەر:
پرەزيدەنتتىڭ استانانىڭ الماتىدان اقمولاعا كوشەتىنى جايلى جارلىعى رەسپۋبليكادا ۇلكەن سەرپىن تۋدىرعانى انىق. بۇكىل حالىقتىڭ زەيىنى بۇعان دەيىن ەلەۋسىز بولعان اقمولا قالاسىنا اۋدى. سولاردىڭ قاتارىندا ونەر ادامدارى – ءبىز دە ەلەڭدەپ قالىپ ەدىك. ءسويتىپ, جاڭا ەلورداعا بەت تۇزەگەن العاشقىلاردىڭ ءبىرى بولىپ, اقمولا قالاسى ق.قۋانىشباەۆ اتىنداعى تەاترىنىڭ رەجيسسەرى, قىزمەتىنە شاقىرتۋ الدىم.
1997 جىلى شىلدە ايىندا بۇرىن اياق باسپاعان, مەن ءۇشىن بەيتانىس اقمولا قالاسىنا كەلدىم. ۆوكزالدان مەنى ق. قۋانىشباەۆ اتىنداعى تەاتردىڭ سول كەزدەگى ديرەكتورى ءارى كوركەمدىك جەتەكشىسى, قازاقستاننىڭ حالىق ءارتىسى قادىر جەتپىسباەۆ جۇرگىزۋشىسىمەن كەلىپ, قارسى الدى. شىنىمدى ايتسام, وسىنداي ۇلكەن كىسىنىڭ مەنىڭ الدىمنان شىققانىنا تاڭ قالدىم, ءارى قۋاندىم.
اقمولاعا قادىر اعا ءوزى ارنايى شاقىرعان بولاتىن. قاپىرىق ۆاگوننان شىعا سالىسىمەن, سارىارقانىڭ سامال جەلى بىردەن كوڭىلىمدى سەرگىتىپ جىبەردى. ويتكەنى, مەنىڭ تۋعان جەرىمنىڭ دە جىل ون ەكى اي تىنباي سوعىپ تۇراتىن جەلى بار. وسى ۇقساستىق جاڭا جەردى جاتسىنباي, بىردەن باۋىر باسىپ كەتۋىمە سەبەپشى بولدى. بىراق, كەلگەن كۇننەن باستاپ كوپكە دەيىن ءبىر نارسە جەتىسپەيتىندەي, كوڭىلىم الاڭداۋلى ەدى. سويتسەم, ماعان جەتىسپەي تۇرعانى تاۋ ەكەن. تۋعان جەرىم – الاتاۋدىڭ ەتەگى. اكەم جىلقىشى بولعاندىقتان, بالالىق شاعىمنىڭ ءبارى ات ۇستىندە, جاسىل جايلاۋدا, قاراعايلى تاۋلاردىڭ اراسىندا ءوتتى. مەنىڭ تۋعان جەرىمدە قايدا قاراساڭ دا كوزىڭە تاۋ تۇسەدى.
اقمولانىڭ ەندى ءبىر ەرەكشەلىگى – ماساسى. جالپى, مەن ماسادان قورقاتىن ادام ەمەسپىن. ويتكەنى, ول ءوز اۋىلىمدا دا بار. بىراق, اقمولانىڭ ماساسى ەرەكشە بولىپ شىقتى. ال, ەندى, جەرگىلىكتى تۇرعىندارعا كەلسەك, قازاقتارىنىڭ ورىسشاسى باسىم ەكەنى بىردەن كوزگە ءتۇستى. مىنە, اقمولا جەرىنە كەلگەندەگى العاشقى اسەرلەرىم وسىلاي بولدى.
استانانىڭ الماتىدان كوشەتىنىن بارشا جۇرتتىڭ قۋانا كارسى الماعانى بەلگىلى عوي. بۇل جەردە دە قاراپايىم حالىقتىڭ اراسىندا كۇمانمەن قاراعان ادامدار كەزدەسىپ جاتتى. بىراق, بولاشاققا دەگەن سەنىم, جاقسىلىق پەن جاڭالىققا دەگەن ۇمتىلىس باسىم بولدى. تەاترعا ت.جۇرگەنوۆ اتىنداعى ونەر اكادەمياسىنان سول جازدا اكتەرلىك ءبولىمىن بىتىرگەن ءبىر كۋرستى تۇگەل الدىق. تەاتردا جاڭا قويىلىمدى باستاساق, ال, قالادا اقمولاعا مەملەكەتتىك رامىزدەردىڭ كوشىپ كەلۋ سالتاناتىنا دايىندىق قىزۋ باستالىپ كەتتى. مىنە, وسىلاي جاڭا قونىستاعى جۇمىسىما كىرىسىپ كەتتىم.
سودان بەرى 15 جىل ۋاقىت ءوتىپ كەتىپتى. بىلاي قاراعاندا, از عانا ۋاقىت. كوزدى اشىپ-جۇمعانداي. ال, ءبىرشاما ءوزگەرىس بولدى. ەگەر كوزىمەن كورمەسە, ەشكىم سەنبەس ەدى. مىسالى, بىرەۋ سول كەزدەگى اقمولا 15 جىلدان كەيىن بۇگىنگى كۇندەگىدەي بولادى دەسە, مەن دە سەنبەس ەدىم. الايدا, استانانىڭ ءوسۋى, كوركەيۋى قيال جەتكىسىز جىلدامدىقپەن دامىدى. ونەر وشاقتارى بىرىنەن كەيىن ءبىرى اشىلىپ جاتتى. ءبىزدىڭ تەاتر دا اكتەرلىك قۇرامى جاعىنان 4-5 ەسە ءوستى. ۇجىمنىڭ شىعارماشىلىق دەڭگەيى كوتەرىلدى. شىعارماشىلىق جاعىن 90 پايىز جاستار قۇرادى. 1999 جىلى ەلباسىنىڭ شاقىرۋىمەن, تەاترىمىزعا حالىق قاھارمانى ءازىربايجان مامبەتوۆ اعامىز كەلىپ باسشىلىق جاسادى. ول كىسىنىڭ كەلۋىمەن تەاتر تاعى دا جاڭاشا ءبىر سەرپىن الىپ, دامىعان ۇستىنە دامي ءتۇستى. ۇجىم ەرەكشە شىعارماشىلىق رۋحتا بولدى. ويتكەنى, سول كەزدەگى استانانىڭ دامۋ قارقىنى ەشكىمدى دە بەي-جاي قالدىرمادى. كۇردەلى جوندەۋدەن وتكەن تەاترىمىزدى ەلباسىمىز ءوزى كەلىپ اشىپ بەردى.
سول العاشقى جىلدارى تەاتر ساحناسىندا م.اۋەزوۆتىڭ «قاندى ازۋ», «قاراقىپشاق قوبىلاندى», ا.سەيدىمبەكتىڭ «كۇزەۋدە» جانە ءوزىم جازعان «ءۇمىت» سپەكتاكلدەرىن قويدىم. ونىڭ ۇستىنە, استانانىڭ العاشقى تۇساۋكەسەرىن, ءبىر جىلدىق مەرەيتويىن حالىقارالىق دەڭگەيدە وتكىزدىك. بۇل شارالار بارىسىندا ءبىزدىڭ تەاترعا جەكە باعدارلاما «ەتنواۋىلدى» وتكىزۋ تاپسىرىلدى. حالقىمىزدىڭ ۇلتتىق ەرەكشەلىكتەرىن بەينەلەيتىن كورىنىستەردى مىڭداعان استانا تۇرعىندارى مەن شەتەلدىك قوناقتار قىزىعا تاماشالادى. بۇل باعدارلاما سودان كەيىن ون جىل قاتارىنان ءبىزدىڭ تەاتردىڭ ەنشىسىندە بولدى.
استانا – مەنىڭ رەجيسسەر رەتىندە قالىپتاسىپ, وسۋىمە ۇلكەن مۇمكىندىك بەرگەن قالا. بالالارىم دا وسىنداعى جاقسى ءبىلىم وشاقتارىنان ءبىلىم الىپ شىقتى. وسى وتكەن 15 جىل ىشىندە 25-تەن اسا سپەكتاكل قويىپپىن. حالىقارالىق جانە رەسپۋبليكالىق فەستيۆالداردا جۇلدەلى ورىندار الدىم, باس بايگەنى دە ۇتتىم. سونىمەن ءبىرگە, ەلوردامىزدا وتكەن اقىن-جازۋشىلاردىڭ, قوعام قايراتكەرلەرىنىڭ شىعارماشىلىق مەرەيتويلارىن, جاڭا جىل, ناۋرىز مەرەكەلەرىن وتكىزدىم. وسىلاي استانا قالاسىنىڭ مادەني ءومىرىنىڭ وسۋىنە از دا بولسا ءوز ۇلەسىمدى قوسقانىمدى ماقتان ەتەمىن.
2000 جىلى قر «قۇرمەت» گراموتاسىن الدىم. 2001 جىلى ەلباسىنىڭ قولىنان پاتەر الدىم (سول پاتەردە كەنجە قىزىم اسىلجان دۇنيەگە كەلدى). 2006-2007 جىلدارى «ۇزدىك رەجيسسەر» اتاندىم. 2009 جىلى قر ەڭبەك سىڭىرگەن قايراتكەرى اتاعىن الدىم.
استانانىڭ باس قالا رەتىندە دامۋى مەن سياقتى مىڭداعان ادامداردىڭ ءومىر جولىن, قوعامداعى ورنىن تابۋعا زور مۇمكىندىك بەردى.
سول كەزدەگى استانانىڭ دامۋ قارقىنى ەشكىمدى دە بەي-جاي قالدىرمادى. كۇردەلى جوندەۋدەن وتكەن تەاترىمىزدى ەلباسىمىز ءوزى كەلىپ اشىپ بەردى.
