جۇمىسشى مامانداردى دايارلاۋ – ۋاقىت تالابى
استانا قالاسى ءماسليحاتىنىڭ دەپۋتاتتارى كەزەكتى سەسسياعا دايىندىق اياسىندا ەلورداداعى تەحنيكالىق ماماندار دايارلايتىن تاعى بىرنەشە كوللەدجدى ارالاپ, بۇگىنگى تاڭدا وقۋ ورىندارىندا اتقارىلىپ جاتقان جۇمىستاردى كوزدەرىمەن كورىپ قايتتى.
الدىمەن استاناداعى كولىك جانە كوممۋنيكاتسيا كوللەدجىنە ات باسىن بۇرعان دەپۋتاتتار مۇنداعى جاڭعىرتىلاتىن ەنەرگيا كوزدەرى زەرتحاناسىندا بولىپ, زەرتحانالىق جۇمىس ىستەۋگە ارنالعان زاماناۋي جابدىقتارمەن, اقىلدى تاقتانىڭ جۇمىسىمەن تانىستى. «ەكسپو-2017» كورمەسى قارساڭىندا رەسپۋبليكالىق بيۋدجەت ەسەبىنەن كورەيادان ساتىپ الىنعان بۇل جابدىقتارمەن جۇمىس ىستەۋ ارقىلى جاس مامانادار بولاشاقتا ەلەكتر ەنەرگياسىن كۇننەن, جەلدەن, سۋدان الۋدى ۇيرەنۋدە.
مۇندا 13 كومپيۋتەر جانە 3 لينگوفون كلاسى, 13 ينتەراكتيۆتى كلاسس, ارناۋلى پاندەر بويىنشا 5 ۇلگى زەرتحاناسى, كىتاپحاناسى, وقۋ, ءماجىلىس, سپورت, ترەناجەر زالدارى جانە باسقا زاماناۋي ماتەريالدىق-تەحنيكالىق بازاسى بار. ءبىلىم ورداسى قازىرگى كەزدە ەڭبەك نارىعىندا ەرەكشە سۇرانىسقا يە تەحنيك, ەلەكتريك, ەنەرگەتيك, تەمىرجولشى, ەلەكتروۆوز جوندەۋشى, راديوەلەكترونيكا جانە بايلانىس ماماندارىن, بارلىعى 14 ماماندىق بويىنشا كاسىبي بىلىكتى كادرلاردى دايارلاۋدا. قازىر 2 000-نان استام ستۋدەنت ءبىلىم الۋدا. «قازاقستان تەمىر جولى» ۇلتتىق كومپانياسىمەن كەلىسىم بويىنشا مۇندا 83 ستۋدەنت ءدۋالدى نەگىزدە, ياعني, كاسىپتىك وقىتۋ ۇدەرىسىنىڭ باسىم بولىگىن وقۋ ورنىندا ەمەس, كاسىپورىنداردا ءوتىپ ءجۇر. الداعى ۋاقىتتا «قازاقتەلەكوم» اق-مەن دە كەلىسىم جاساۋ جوسپارلانۋدا.
بۇرىنعى جالپى ءبىلىم بەرەتىن وقۋ ورتالىعى بۇگىندە استانا قالاسىنداعى كوپ بەيىندى كوللەدج دەپ اتالادى ەكەن. سەرىك تاشەنوۆ جەتەكشىلىك ەتەتىن بۇل ءبىلىم مەكەمەسى بۇگىندە اۆتوموبيل جۇرگىزۋشىلەرىن, تۋريزم سالاسىنىڭ ماماندارى مەن ەسەپتەۋىش تەحنيكاسىنىڭ وپەراتورلارىن دايارلايدى. وقۋ ەكى كورپۋستا وتكىزىلگەنىمەن, تاجىريبە جۇمىستارى 20 توننالىق كونتەينەرلەردە ءجۇرگىزىلەدى. ول قىس مەزگىلدەرىندە ەلەكترمەن جىلىتىلادى. سوندىقتان, جىلدىڭ وسى مەرزىمىندە مۇندا ساباقتار 20-25 مينۋت قانا وتەتىن كورىنەدى.
قالالىق قۇرىلىس باسقارماسى وسىدان ءۇش جىل بۇرىن اتالمىش وقۋ ورداسىنا ارنالعان عيمارات سالۋدى قولعا العان. قاراجات جەتىسپەگەندىكتەن, مۇنداعى قۇرىلىس جۇمىستارى ۋاقىتشا توقتاپ تۇر. مامانداردىڭ ايتۋىنشا, قاجەتتى قارجى 2016-2017 جىلدارى بولىنبەكشى. باس قالاداعى تەحنولوگيالىق كوللەدجدە وقيتىن جاستار كەلەشەكتە تىگىن ءوندىرىسى جانە كيىمى ۇلگىسى, شاشتاراز جانە ساندىك كوسمەتيكا ءوندىرىسى, نان, ماكارون جانە كونديتەر ءوندىرىسى بويىنشا ماشىقتانىپ ءجۇر.
وندىرىستىك وقۋ ءبولىمىنىڭ شەبەرى ۇلجان تەمىرتانوۆا – وسى كوللەدجدىڭ تۇلەگى. جۇرەك قالاۋىمەن تاڭداپ العان ماماندىعى بويىنشا ءبىلىمىن جەتىلدىرىپ, جوعارى وقۋ ورنىن تامامداعاننان كەيىن ءوزى ءبىلىم العان كوللەدجگە قايتىپ ورالعان ول بۇگىندە وقىتۋشى. توبىنداعى 15 قىزعا تىگىنشىلىكتىڭ قىر-سىرىن ۇيرەتۋمەن بىرگە قوعامدىق جۇمىستارعا دا بەلسەنە ارالاسىپ ءجۇر, «نۇر وتان» پارتياسى باستاۋىش پارتيا ۇيىمىنىڭ ءتورايىمى.
ەلوردانىڭ كاسىپتىك-تەحنيكالىق ءبىلىم بەرۋ مەكەمەلەرىن ارالاي ءجۇرىپ, مۇندا جاس مامانداردىڭ ساپالى ءبىلىم الىپ, كاسىبي شەبەرلىكتى يگەرۋىمەن قاتار, زامان تالابىنا ساي بىلىكتى مامان رەتىندە نارىق زامانىنىڭ باسەكەسىنە تۇسە الاتىن, ءبىلىم دەڭگەيى مەن كاسىبي شەبەرلىگىن كورسەتە الاتىن ءوز ىستەرىنىڭ شەبەرلەرىن دايارلاۋ باعىتىندا يگى ىستەر اتقارىلىپ جاتقانىنا كۋا بولدىق.
بۇل رەتتە ەلباسى تاپسىرماسىن باسشىلىققا الا وتىرىپ, ءدۋالدى وقىتۋ جۇيەسىن ودان ءارى جالعاستىرۋ ارقىلى باس قالادا جۇمىسشى ماماندارىنىڭ جەتىسپەۋشىلىگىن جويۋعا مۇمكىندىك مول. ول ءۇشىن كاسىپتىك-تەحنيكالىق ءبىلىم بەرۋ مەكەمەلەرى قازىرگى زامان تالابىنا ساي جابدىقتالۋى كەرەك. حالىق قالاۋلىلارىنىڭ پىكىرى وسىعان سايادى. ال, قالالىق ءماسليحاتتىڭ حاتشىسى سانسىزباي ەسىلوۆ ەكى كۇن بويى وزدەرى ارالاعان وقۋ ورىندارىندا وقىپ جۇرگەن جاستاردى تاڭداپ العان كاسىبىنىڭ قىر-سىرىن مەڭگەرۋمەن قاتار سول سالاداعى سونى تەحنولوگيالاردى, جۇمىس ىستەۋدىڭ جاڭاشا داعدىلارىن ۇيرەنۋگە, ەڭ باستىسى, كەلەشەكتە ەلوردا مارتەبەسىنە ساي ەڭبەك ەتۋگە شاقىردى.