«استانا ارەنا» ستاديونىنىڭ الدىنداعى الاڭدا «ۆ ريتمە درۋجبى» قايىرىمدىلىق شاراسى ءوتتى. پسيحولوگتار مەن ارت-تەراپەۆتتەر بالالار ءۇيىنىڭ تاربيەلەنۋشىلەرىنە ارناپ كوممۋنيكاتيۆتىك داعدىلاردى دامىتۋعا جانە ءوز-وزىنە دەگەن سەنىمدى ارتتىرۋعا باعىتتالعان ءتۇرلى ويىندار ۇيىمداستىردى.
اكتسيا باعدارلاماسى تاجىريبەلى ماماندارمەن ازىرلەندى, ارت-تەراپيانىڭ ءتۇرلى ادىستەرى بالالاردىڭ شىعارماشىلىق الەۋەتىن اشۋعا, ويلاۋ قابىلەتتىلىگى مەن قاجەتتى الەۋمەتتىك ماشىقتارىن دامىتۋعا مۇمكىندىك بەردى.
– اكتسيا وسىنداي اۋقىمدا العاش رەت وتكىزىلىپ وتىر, سونداي-اق, ويىن, ءىس-قيمىل جانە ەلەس-قيال ارقىلى قارىم-قاتىناس قۇرۋعا باعىتتالعان. بۇل شارا بالالاردى الەۋمەتتىك بەيىمدەۋگە جانە ءوز بەتىنشە ءومىر سۇرۋگە دايىنداۋعا ارنالعان, – دەيدى Best for Kids قوعامدىق قورىنىڭ پرەزيدەنتى سايا كاكىم.
ايتا كەتەيىك, شاراعا استانالىقتار عانا ەمەس, سونىمەن قاتار اقمولا وبلىسىنىڭ دا بالالارى قاتىستى.
astana.gov.kz
