ماقسات بازارباەۆ, ءانشى: «جاقسى ءان ەلدىڭ جۇرەگىنەن ورىن تابۋى ءتيىس»
– ماقسات اعا, سالەمەتسىز بە؟ قازىر قايداسىز؟ شىعارماشىلىعىڭىزدا نە جاڭالىق؟
جانار نۇرىش, ستۋدەنت
– قازىر قازاقستاندامىن (كۇلىپ). رەپەرتۋارىمدى جاڭا اندەرمەن تولىقتىرىپ جاتىرمىن. جاقىندا تاشكەنتتە ۇكىتاي ەرنيازوۆتىڭ ءانى مەن سوزىنە جازىلعان «سەن سۇيگەن ارۋ» دەگەن انىمە بەينەبايان ءتۇسىرىپ كەلدىم. كورىپ جۇرگەن بولارسىزدار.
– ماماندىعىڭىز بويىنشا كاسىبي اكتەرسىز. كينوعا تۇسۋگە شاقىرسا, بارار ما ەدىڭىز؟
ايىم كاريموۆا, وقىرمان
– ونداي شاقىرتۋلار بولىپ جاتسا, ارينە, باراتىن ەدىم. نەگىزى, مەن ت.جۇرگەنوۆ اتىنداعى ونەر اكادەمياسىن اكتەر ماماندىعى بويىنشا بىتىرگەنمىن. ەڭ العاش ساحناعا «باۋىرجان شوۋ» تەاترىندا ونەر كورسەتكەنمىن. جامان بولماعان سياقتى. سول جەردە باس-اياعى ءۇش جىلدان استام قىزمەت ەتتىم.
ەگەر رەجيسسەرلەردەن ۇسىنىس ءتۇسىپ جاتسا, كەلىسىمىمدى بەرەر ەدىم. بىراق, ونداي شاقىرتۋلار ازىرگە بولا قويعان جوق.
– انشىلەردىڭ كوبى «ەكى جۇلدىز», «كەش جارىق» سىندى جوبالارعا قاتىسىپ ءجۇر. سونداي شوۋلاردان ءسىزدى نەگە كورمەيمىز؟
جانسايا وماربەكوۆا, جۋرناليست
– مەنى «ەكى جۇلدىز» جوباسىنا شاقىرعان بولاتىن. بىراق ءدال سول ۋاقىتتا قىتايدا گاسترولدىك ساپاردا ءجۇردىم دە, بارا المادىم. ودان كەيىن رەنجىپ قالدى عوي دەيمىن, شاقىرتۋ تۇسكەن جوق.
– بۇگىندە ەلىمىزدەگى انشىلەردىڭ كوپشىلىگى بەينەباياندارىن تاشكەنت قالاسىندا ءتۇسىرىپ كەلەدى. سوندا ءبىزدىڭ ەلىمىزدە ساپالى بەينەبايان تۇسىرەتىن ارنايى مامانداردىڭ بولماعانى ما؟
گۇلىم بولاتوۆا, قالا تۇرعىنى
– جوق, ولاي ەمەس. بىزدە ولاردىكىندەي ساپامەن تۇسىرسەك, قىمباتتاۋ بولادى.
– ءسىزدىڭ بەينەباياندارىڭىزدىڭ بار ەكەنىن ەستىمەپپىز…
سامال ساماتقىزى, مەدبيكە
– كەزىندە «جاستىق شاق» دەگەن انىمە بەينەبايان تۇسىرگەنمىن. جالپى, بەينەبايان – ادامنىڭ قۇلاق قۇرىشىن قاندىرىپ, كوزىن تالدىراتىن نارسە بولۋى كەرەك.
– قازاق ەستراداسىنداعى كەمشىلىك دەپ نەنى ايتار ەدىڭىز؟
اسپەت جۇماشكە, مۇعالىم
–قازىر ەكىنىڭ ءبىرى ءانشى عوي. كىم كورىنگەن ساحنادا ءجۇر. ءان ايتىپ جۇرگەندەردىڭ ءبارىن جامان دەسەم, كوپكە توپىراق شاشقانداي بولارمىن, بىراق انشىلەردىڭ سانىن كوبەيتىپ جۇرگەندەردىڭ تەڭ جارتىسى مۋزىكاعا قاتىسى جوق ادامدار. ولاردىڭ نە سوزىندە ماعىنا جوق, نە مۋزىكاسىندا ءمان جوق.
– اندەرىڭىزدىڭ ءانى دە, ءسوزى دە ۇنايدى. ءاندى قالاي تاڭدايسىز؟
ينارا ارمانقىزى, ستۋدەنت
–راحمەت, ينارا. ءان تاڭداۋ وڭاي نارسە ەمەس. ەگەر ورىنداعان جاقسى ءانىڭ ەلدىڭ جۇرەگىنەن ورىن تاۋىپ جاتسا, ول, ارينە, جەتىستىك. جالپى, اندەردىڭ سانى كوپ, ساپاسى جوق بولعاننان گورى, سانى از, ساپالى بولعان جاقسى دەپ ەسەپتەيمىن. كوبىنەسە ەستىپ, ۇناتىپ قالعان اندەرىمدى سۇراستىرىپ, تاۋىپ الىپ, وڭدەپ جازدىرامىن.
– سپورتپەن اينالىساسىز با؟
بەكزات ماحمەتوۆ, سپورتشى
– مەكتەپ قابىرعاسىندا جۇرگەندە اينالىستىم. قازىر اندا-ساندا جۇگىرىپ, سپورت زالدارعا بارىپ تۇرامىن.
– ومىردەگى جانە ونەردەگى دوسىڭىز؟
سارا يگىلىك, وقۋشى
–مىسالى «نۇر-مۇقاسان» توبىنداعى جىگىتتەردى دوسىم دەپ ەمەس, اعام دەسەم بولادى. ولارمەن كادىمگى باۋىرلار ەسەبىندە ارالاسامىن. مۇقاساننىڭ ادامگەرشىلىگىن سوزبەن ايتىپ جەتكىزە المايمىن.
جالپى, ومىردە دە, ارىپتەستەردىڭ اراسىندا دا سىيلاسىپ جۇرگەندەر وتە كوپ. ونىڭ ءبارىن تىزبەلەپ شىعۋ مۇمكىن ەمەس.
– جەكە بيزنەسىڭىز بار ما؟
كوپەن بالاجان, كاسىپكەر
– ناقتى بيزنەس جوق, بىزدىكى سول شوۋ-بيزنەس, توي-بيزنەس قوي.
– دومبىرا شەرتەتىن ونەرىڭىز بار ەكەنىن بىلەمىز. بولاشاقتا ءسىزدى ساحنادان دومبىرامەن كورەمىز بە؟
تولعاناي الىمباەۆا, ماگيسترانت
– بۇيىرتسا, ول دا بولا جاتار. جاقىندا شىعارماشىلىق كەشىمدى وتكىزبەكپىن. سوندا دومبىرامەن ان سالسام با دەگەن وي بار.
ەركەجان ساتىمبەك