استانادا ايبا-نىڭ ارۆ نۇسقاسى بويىنشا ەكىنشى اينالىمنىڭ جەكپە-جەكتەرى ءوتتى.
الەم بىرىنشىلىگىنىڭ قولا جۇلدەگەرى بەرىك ابدراحمانوۆ (60 كگ) فيليپپيندىك چارلي سۋارەسپەن قولعاپ ءتۇيىستىردى. جەكپە-جەكتى وتە سالقىنقاندىلىقپەن وتكىزگەن جەرلەسىمىزگە تورەشىلەر جەڭىستى ءبىراۋىزدان بەردى. بۇل – بەرىكتىڭ جاڭا نۇسقاداعى ەكىنشى جەڭىسى. سونداي-اق, يتاليانىڭ بەرگامو قالاسىندا نەمىس بوكسشىسىمەن جەكپە-جەككە تۇسكەن قازاقستان ۇلتتىق قۇراماسىنىڭ مۇشەسى انتون پينچۋك تە كەزەكتى جەڭىسىنە قول جەتكىزدى.
وسى جارىستىڭ ءبىرىنشى اينالىمىندا جەڭىسكە جەتكەن ءىلياس سۇلەيمەنوۆ ءوز جەكپە-جەكتەرىن رەسەيدە وتكىزۋدە. ول كەزەكتى ايقاسىنا 28 قاراشا كۇنى نوۆوسيبيرسك قالاسىندا شىعادى. قارسىلاسى 2013 جىلعى الەم چەمپيوناتىنىڭ ءفيناليسى الجيرلىك موحاممەد فليسسي بولماق. ءبىرجان جاقىپ پەن ادىلبەك نيازىمبەتوۆ تە جاقىن ارادا كەزەكتى جەكپە-جەكتەرىنە شىعاتىن بولادى.
ارۆ نۇسقاسى بويىنشا ءوتىپ جاتقان جارىس 10 سالماق دارەجەسىندە وتۋدە. ءار سالماقتا الەمدەگى ۇزدىك 8 بوكسشى قاتىسۋدا. ءار بوكسشى ءبىر-بىرىمەن كەزدەسەتىن بولادى. ءار سالماقتىڭ جەڭىمپازىنا 2016 جىلى ريو-دە-جانەيرودا وتەتىن وليمپيادا ويىندارىنا جولداما بەرىلەتىن بولادى.
عالىم قوجابەكوۆ
