ادەبيەت الەمىندەگى ايەل جۇرەگى
قر ۇلتتىق اكادەميالىق كىتاپحاناسىندا «ادەبيەت الەمىندەگى ايەل جۇرەگى» اتتى كەش ءوتىپ, وقىرماندار جازۋشى زاريا جۇمانوۆا مەن اقىن, ادەبيەتتانۋشى عالىم گۇلزادا نيەتقاليەۆامەن كەزدەستى.
قر جازۋشىلار وداعىنىڭ مۇشەسى, جازۋشى-جۋرناليست, رەسپۋبليكالىق «جۇلدىز» جۋرنالىنىڭ ءبولىم مەڭگەرۋشىسى, «تۇنگى وتتار», «ەكىگە بولىنبەيتىن كەلىنشەك», «ءسىز ىزدەگەن ادام», «ۇلتىن سۇيگەن ۇلىلار» پروزالىق جيناقتاردىڭ اۆتورى زاريا جۇمانوۆانىڭ ەسىمى ەستى وقىرمانعا جاقسى تانىس بولۋى ءتيىس. ول – قازاقستان جازۋشىلار وداعىنىڭ ع.مۇستافين اتىنداعى ادەبي سىيلىعىنىڭ يەگەرى, سوروس زاماناۋي ونەر ورتالىعىنىڭ, ەقىۇ جابىق بايگەلەرىنىڭ جۇلدەگەرى.
بەلگىلى اقىن ەسەنعالي راۋشانوۆتىڭ «ايەلدەن اقىن شىقپايدى, ءبيشى نە كۇيشى بولماسا» دەگەن ماتەلگە اينالعان ولەڭ جولدارى بار. شايىردىڭ وسى سوزىنە «اقىنمىن دەسەم نە دەر ەڭ؟» دەپ جاۋاپ جازىپ, كەيىننەن ەسەنعاليدىڭ پوەزياسىن زەرتتەگەندەردىڭ ءبىرى – اقىن, عالىم جانات اسكەربەكقىزى. گۇلزادا نيەتقاليەۆا دا اقىندىعىمەن قوسا ەسەنعالي راۋشانوۆىڭ پوەزياسىنا ۇڭىلگەن عالىم, فيلولوگيا عىلىمىنىڭ كانديداتى جانە ماحامبەت اتىنداعى سىيلىقتىڭ يەگەرى. ونىڭ قالامىنان تۋعان ولەڭدەر مەن ەڭبەكتەر «قيعاشتىڭ قارلىعاشى», «اقبوتا كۇندى اڭساۋمەن», «ارداقتىم», «اللاجار», «دارا», «ەسەنعالي راۋشانوۆتىڭ پوەزياسى» اتتى جىر جيناقتارى مەن مونوگرافيالارعا اينالعان.
كەشتە قوس قالامگەر اتاۋى ايتىپ تۇرعانداي, ايەل ادامنىڭ ادەبيەتتە الاتىن ورنى تۋرالى پىكىرلەرىن ايتىپ, شىعارماشىلىق ىزدەنىستەرى تۋرالى ايتىپ بەردى.
امانعالي قالجانوۆ