انارا بەكەنوۆا – قالاداعى كوپ كەلىنشەكتەردىڭ ءبىرى ەمەس. ومىرگە وزىندىك كوزقاراسى بار, ۇستانىمى دا ەرەكشە. ءارى ءوزى ادەمى, مىنەزى, ءتىپتى, كاسىبى دە كەرەمەت. بەينەبىر سيقىرشىداي ادەمىلىك الەمىنىڭ ساندىعىن اشىپ, ونىڭ ءبىر جاۋھارىن جۇلىپ الىپ, قولىڭىزعا ۇستاتقاندا ءوزىڭىزدى حاس سۇلۋداي سەزىنەسىز. قازاق كەلىنشەكتەرى دە ەركىن مەڭگەرە باستاعان «ۆيزاجشى» كاسىبىن تاڭداۋىنىڭ باستى سەبەبى انارانىڭ سۇلۋلىققا, ۇيلەسىم مەن جاراسىمدىققا جانى قۇمارلىعى بولسا كەرەك.
ەسىندە, ەڭ العاش رەت جانارگۇل دەگەن بويجەتكەننىڭ بەتىن ارلەپ, كيىم كيىسى مەن شاشىن تۇزەپ بەرگەن بولاتىن. العاشقى كليەنتى بولعان سوڭ با, قول-اياعى دىرىلدەپ قينالعانى بار. سىر بىلدىرمەي, بارىن سالىپ جۇمىسىن ورىنداپ شىقتى. الاڭ كوڭىلمەن كوڭىلدى وتىرىسقا شىعارىپ سالدى. ەرتەسىنە جانارگۇلدەن ءبىراۋىز حابارلاما كەلدى. «كوپ راحمەت! ءسىزدىڭ ارقاڭىزدا كەشتىڭ ەڭ سۇلۋى مەن بولدىم!» دەپ جازىپتى. سونداعى انارانىڭ قۋانعانىن كورسەڭىز. تىرناقالدى تەڭگەسىن تۇمارىنداي ساقتاپ قويدى. ونىڭ سەبەبى بار. انارا 17 جاسىندا تۇرمىس قۇرىپ, ءسابيلى بولىپ, وتاعاسىنىڭ جاعدايىن جاساپ, بۇگىندە سەكسەننىڭ تورىنە شىققان ەنەسىنىڭ قاباعىنا قاراپ دەگەندەي ءۇي-جايىنىڭ بابىمەن جاسىندا قىزمەت قۋا الماعان ەدى. ەندى, مىنە, قىرىقتىڭ قىرقاسى كورىنگەندە ءوز كاسىبىن باستاپتى. قىزمەتىنە ريزا بولعان ەنەسى دە كەلىنىنىڭ بەتىنەن قاقپاي, اق باتاسىن بەرىپتى. ال سۇيىكتى كەلىنىنىڭ تاڭداعان كاسىبى جايىن بىلگەندە: «قاپ, قارتايىپ قالعانىم-اي, ايتپەسە ساعان بەتىمدى بوياتىپ, ەرنىمدى قىزارتىپ, ساندەنەتىن ەدىم» دەپ كۇلدىرىپتى. ونداعىسى– كەلىنىن قولداپ تالابىنا سۇيسىنگەنى.
– جاقىندا ءبىر جەردەن وقىدىم, «ەشتەن كەش جاقسى» دەگەن ءسوزدى «كەشتەن بولماعانى جاقسى» دەپ جاقسى ءسوزدىڭ تونىن تەرىس اينالدىرىپتى. قالايشا اۋزى بارىپ ايتتى ەكەن. ەشتەن كەش جاقسى دەگەندە جاراتقاننىڭ سىباعاڭدى, الارىڭدى كەيىنگە ساقتاعانىم دەگەنى ەمەس پە؟! – دەيدى انارا.
وتباسىنا قارايلاعان جاننىڭ قىرۋار شارۋاسى بارى راس, انارا سان تىرلىكتىڭ ورتاسىندا ءجۇرىپ, وتىزدان اسقاندا اعىلشىن ءتىلىن ۇيرەنىپ الدى. حالىقارالىق Make-up Studio ۆيزاج جانە ستيل مەكتەبىن ويداعىداي ءبىتىرىپ, ءوز ءىسىن اشتى.
ادام كورىكسىز جاراتىلمايدى. اركىمنىڭ ادەمى كورىنگىسى بار. كەيدە بەتىمىزگە وپا جاعىپ, ساندەنبەك تۇگىل, ايناعا قاراۋعا مۇمكىندىك بولماي جاتادى. سان ءتۇرلى سىلتاۋ ايتىپ, كورىكسىز كەلبەتىمىزدىڭ سەبەبىن اقتاپ الۋعا دايارمىز. الايدا, انارا بار سىلتاۋىمىزدى جوققا شىعاردى.
– سوڭعى ەكى جىلدا تالاي ارۋدىڭ اجارىن اسىرىپ, تالاي كەلىنشەكتىڭ كوركىن كەلتىرىپ, «سىرى كەتكەن» تالاي اپالارىمىزدىڭ جامالىن جاقسارتتىم. ادەمىلىكتى ايەلدەرگە ءتان ەتسە, وندا اجار-كوركىمىزدى اشا تۇسەتىن جاڭا كاسىپتىڭ مۇمكىندىگىن نەگە قولدانباسقا؟! – دەيدى سۇلۋلىق سىرىن اشقان انارا.
ايگۇل ۋايسوۆا
