ادىلبەك جاقسىبەكوۆ: استانا اۋەجايى – ەلوردانىڭ عانا ەمەس, ەلىمىزدىڭ اۋە قاقپاسى
كەشە استانا اكىمى ادىلبەك جاقسىبەكوۆ حالىقارالىق اۋەجايدىڭ جۇمىسى مەن ونى دامىتۋ ماسەلەلەرى تالقىعا سالىنعان جيىن وتكىزدى. وعان قالالىق قۇرىلىم وكىلدەرى, قازاقستاندىق اۋە كومپانيالارى, ۇلتتىق قاۋىپسىزدىك كوميتەتى, ىشكى ىستەر, تۇتىنۋشىلار قۇقىعىن قورعاۋ دەپارتامەنتتەرىنىڭ وكىلدەرى قاتىستى دەپ حابارلادى قالا اكىمىنىڭ ءباسپاسوز قىزمەتى.
اكىم ءوزىنىڭ كىرىسپە سوزىندە «نۇرلى جول» جاڭا ەكونوميكالىق ساياساتىنىڭ نەگىزگى باعىتتارىنىڭ ءبىرى – كولىك-لوگيستيكالىق ينفراقۇرىلىمىن جەتىلدىرۋ ءۇشىن اۋەجايلاردى دامىتۋعا ايىرىقشا كوڭىل بولىنەتىندىگىن ايتتى.
بۇگىنگى تاڭدا ىشكى جانە حالىقارالىق اۋە قاتىناستارىنىڭ باسىم بولىگى – استانا مەن الماتى قالالارىنىڭ ۇلەسىندە. ەلدىڭ اۆياتسيا نارىعىندا ەكىنشى ورىندا تۇرعان ەلوردا اۋەجايىنا بارلىق رەيستەردىڭ – 12%-ى, جولاۋشىلار تاسىمالىنىڭ – 24%-ى تيەسىلى بولسا, پوشتا مەن جۇك تاسىمالىنىڭ جالپى كولەمىنىڭ 6%-ى وسى جەردەن جونەلتىلەدى.
– استانا اۋەجايىنىڭ وتكىزۋ قابىلەتتىلىگىنىڭ جەتكىلىكسىزدىگى اۆياكومپانيالاردىڭ وپەراتسيالىق قىزمەتتەرىن شەكتەپ, جولاۋشىلاردىڭ سۇرانىستارىن تولىق كولەمىندە قاناعاتتاندىرا الماي وتىر. كەلەشەكتە بۇل جولاۋشىلار تاسىمالى ترافيگىنە كەرى اسەرىن تيگىزۋى مۇمكىن. وسى ماسەلەلەردى شەشۋ ءۇشىن 2015 جىلدىڭ اقپانىندا تەرمينالدى ۇلعايتۋ جانە ۇشىپ-قونۋ الاڭىن قايتا جاڭارتۋ جۇمىستارى باستالعان ەدى, ول 2017 جىلدىڭ ناۋرىزىندا اياقتالماق, – دەدى اكىم.
اتالعان جوبانىڭ ماڭىزدىلىعىنا توقتالا كەلە, قالا باسشىسى استانا اۋەجايى – ەلوردانىڭ عانا ەمەس, مەملەكەتتىڭ نەگىزگى اۋە قاقپاسى ەكەنىن دە باسا ايتتى.
جيىن بارىسىندا اكىم شۇعىل شارالار قابىلداۋدى قاجەت ەتەتىن بىرقاتار ۇيىمداستىرۋشىلىق جانە تەحنيكالىق ولقىلىقتاردى دا تىلگە تيەك ەتتى. قاۋىپسىزدىك قىزمەتىنە دە سىن ايتىلدى.
تاعى ءبىر تۇيتكىلدى ماسەلەنىڭ ءبىرى – زاڭسىز تاكسي قىزمەتى.
– ەلورداعا كەلۋشى جولاۋشىلاردى جالپى قابىلداۋ زالىندا كۇتىپ الىپ, وزدەرىنىڭ قىزمەتتەرىن جاعالاسا ۇسىناتىن جەكە كولىگىمەن تاسىمالداۋشىلار دا كەرى اسەر تۋعىزۋدان تانباي كەلەدى. ىشكى ىستەر دەپارتامەنتىنە وسىنداي زاڭسىز تاكسيستەرگە شارا قولدانۋدى تاپسىرامىن, – دەدى اكىم.
ول, سونداي-اق, رەسمي اۋەجاي تاكسيى بولىپ تابىلاتىن «جەبە» تاكسوموتورلىق كومپانياسىنىڭ قىزمەتكەرلەرى ەلوردالىق دەڭگەيگە ساي بولۋى ءۇشىن ءۇش تىلدە ەركىن سويلەۋى كەرەك ەكەندىگىن ايتتى.
اكىم قوعامدىق كولىك قىزمەتىنە دە توقتالدى. حالىقارالىق اۋەجايعا قاتىنايتىن قوعامدىق كولىكتەر №1, №3 اۆتوپارككە قارايدى. ونىڭ ايتۋىنشا, بۇل باعدارلارعا دا رەسمي تاكسيگە قويىلاتىن تالاپتار قويىلۋى قاجەت.
– بۇگىندە اۆتوبۋس كوندۋكتورلارىن ءار ءۇش-ءتورت اي سايىن اۋىستىرىپ وتىرۋ ءۇردىسى قالىپتاستى. الايدا, اۆتوبۋستاردىڭ سانيتاريالىق جاعدايىنا جاسالعان ەسكەرتۋلەردەن قورىتىندى شىعارىلعان جوق. كوندۋكتورلاردى وقىتقاندا اۋەجايعا قاتىنايتىن باعدارلارعا ەرەكشە كوڭىل اۋدارۋ قاجەت. سونىمەن قاتار, ولاردىڭ اعىلشىن ءتىلىن مەڭگەرۋ مۇمكىندىكتەرىن ويلاستىرۋ قاجەت, – دەدى ءا.جاقسىبەكوۆ.
جيىن بارىسىندا قىزمەت كورسەتۋ ساپاسىن جاقسارتۋ ماسەلەلەرى دە ءسوز بولدى. اكىمنىڭ ايتۋىنشا, اۋەجايدا ەلوردالىق دەڭگەيگە ساي كەلمەيتىن 30-عا جۋىق شاعىن جانە ورتا بيزنەس سۋبەكتىسى بار كورىنەدى.
– اۋەجاي باسشىلىعى كيىم ۇلگىسى, ىدىس-اياق, باعا كورسەتكىشتەرى مەن باسقا دا سەرۆيس قىزمەتىن ءبىر جۇيەگە ءتۇسىرۋ ماسەلەسىن قاراستىرۋى كەرەك. ءار كومپانيانىڭ ءوز «برەندىن» جارنامالاعىسى كەلەتىنى تۇسىنىكتى, بىراق, ولار قاي جەردە قىزمەت ەتىپ جۇرگەندەرىن دە ءبىلۋى كەرەك. سەبەبى, الدەبىر ماسەلە تۋىنداعان جاعدايدا بارلىق ەسكەرتپەلەر اۋەجاي اكىمشىلىگىنە ايتىلادى, – دەدى ەلوردا باسشىسى.
جيىن سوڭىندا ءا. جاقسىبەكوۆ بارلىق جاۋاپتى قۇرىلىمداردى اتالعان ءماسەلەلەردى شەشۋ جولىندا جەدەل ءارى جۇمىلا ارەكەت ەتۋگە شاقىردى.