ادىلبەك جاقسىبەكوۆ – «نۇر وتان» پارتياسى استانا فيليالىنىڭ توراعاسى
ەلوردادا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ قاتىسۋىمەن پارتيانىڭ استانا قالالىق فيليالىنىڭ ءحىح ەسەپتىك-سايلاۋ كونفەرەنتسياسى ءوتتى.
كونفەرەنتسيادا ەلوردا اكىمى ادىلبەك جاقسىبەكوۆ پارتيانىڭ استانا قالالىق فيليالىنىڭ توراعاسى بولىپ سايلاندى.
ادىلبەك جاقسىبەكوۆ كورسەتكەن سەنىمدەرى ءۇشىن پارتيالاستارىنا ريزاشىلىعىن ءبىلدىرىپ, ەلورداداعى پارتيالىق ۇيىمنىڭ توراعاسى رەتىندە وعان زور جاۋاپكەرشىلىك جۇكتەلىپ وتىرعانىن اتاپ ءوتتى.
«پارتيادا جاڭا ساياسي تەحنولوگيالارمەن جاۋاپكەرشىلىككە ىقپال ەتۋدىڭ اقپاراتتىق تاسىلدەرى پىسىقتالۋى ءتيىس. پارتياارالىق پىكىرتالاس ءبىز ءۇشىن نورماعا اينالۋى قاجەت جانە ءبىز ىنتىماقتا بولۋعا ۇمتىلۋىمىز كەرەك» دەدى ادىلبەك رىسكەلدىۇلى.
سونداي-اق, قالا اكىمى مەملەكەت باسشىسىنىڭ «نۇرلى جول – بولاشاققا باستار جول» جولداۋىنداعى تاپسىرمالاردى پارتيالىق قۇرىلىمدار ارقىلى تياناقتى ورىنداۋعا ايرىقشا ءمان بەرۋ كەرەك ەكەنىن ايتتى.
بۇدان بولەك, استانا قالالىق ساياسي كەڭەسىنىڭ جاڭا قۇرامى انىقتالدى. جاڭا قۇرامعا مەملەكەتتىك قىزمەت, ءبىلىم بەرۋ مەن عىلىم, مادەنيەت, دەنساۋلىق ساقتاۋ سالالارىنىڭ وكىلدەرى, سالالىق ەكونوميكا مەن قىزمەت كورسەتۋ كاسىپورىندارىنىڭ جۇمىسشىلارى, سونداي-اق, ازاماتتىق قوعام بەلسەندىلەرى مەن «جاس وتان» جاستار قاناتىنىڭ مۇشەلەرى سايلاندى.
ال «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك: «پارتيا كوشباسشىسىنىڭ جەتەكشىلىگىمەن تاۋەلسىزدىگىمىزدى نىعايتۋعا ءوز ۇلەسىمىزدى قوساتىنىمىزعا سەنىمدىمىن. بۇل – ءبىزدىڭ ساياسي دوكترينامىزدا ايتىلعان باستى جەتىستىك. «نۇرلى جول» جاڭا ەكونوميكالىق ساياساتى الەمدەگى ەڭ دامىعان 30 ەلدىڭ قاتارىنا قوسىلۋعا قارقىندى قادام جاساۋعا جاعداي تۋعىزادى. «نۇر وتان» پارتياسىنىڭ ماقساتى – بىرلىكتى, كەلىسىمدى, قوعامدىق تۇراقتىلىقتى قامتاماسىز ەتۋ» دەي كەلىپ, پارتيانىڭ استانالىق فيليالىنا ۇلكەن جاۋاپكەرشىلىك جۇكتەلىپ وتىرعانىنا ەرەكشە توقتالدى.
سونىمەن قاتار, كونفەرەنتسيادا «نۇروتاندىقتار» پارتيانىڭ ساياسي كەڭەسىنىڭ كەڭەيتىلگەن وتىرىسىندا قابىلدانعان 2015-2025 جىلدارعا ارنالعان سىبايلاس جەمقورلىققا قارسى ءىس-قيمىل باعدارلاماسىنىڭ جۇزەگە اسىرىلۋىن تالقىلادى.
پارتيانىڭ سايلاۋالدى تۇعىرناماسىنىڭ ورىندالۋ ناتيجەسىنە كوز جۇگىرتسەك, استاناداعى جۇمىسسىزدىق دەڭگەيى جىل وتكەن سايىن تومەندەپ كەلەدى. بيىلعى جىلدىڭ ەكىنشى توقسانىندا بۇل كورسەتكىش 0,3%-عا تومەندەپ, 5,2%-دى قۇراعان. ال سابيلەردىڭ شەتىنەۋى 21,4%-عا تومەندەپ, قازىر 100 مىڭ بالاعا 7-دەن كەلەدى. شاعىن جانە ورتا بيزنەس سۋبەكتىلەرىنىڭ سانى دا ءوسۋ ۇستىندە. الدىڭعى جىلمەن سالىستىرعاندا, ولار 4,3%-عا ارتىپ, بارلىعى 9 076 سۋبەكتىنى قۇراپ وتىر. بۇگىنگى كۇنى 903,6 مىڭ شارشى مەتر تۇرعىن ءۇي پايدالانۋعا بەرىلىپ, بۇل كورسەتكىش الدىڭعى جىلمەن سالىستىرعاندا 4,5%-عا جوعارىلاعان.
نۇريسلام قۇسپانعالي