ايەل ءالسىز ەمەس
استاناداعى ورتالىق بالالار جانە جاسوسپىرىمدەر كىتاپحاناسىندا «قاراشاڭىراق» رەسپۋبليكالىق قوعامدىق بىرلەستىگىنىڭ ۇيىمداستىرۋىمەن اقىن, جۋرناليست-جازۋشى فاتيما زابۋراقىزىنىڭ «مىقتى ايەل» كىتابىنىڭ تانىستىرىلىمى ءوتتى.
شاراعا استانا قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ايگەرىم مولداباەۆا, سارىارقا اۋدانى اكىمدىگى ىشكى ساياسات ءبولىمىنىڭ باس مامانى اياۋلىم ادەشوۆا, ەلوردانىڭ زيالى قاۋىمى, باق وكىلدەرى, ۇستازدار, قالامگەرلەر, مەكتەپ وقۋشىلارى, كوللەدج ستۋدەنتتەرى قاتىستى.
ۇلاعاتتى ۇستازدار قاجىمۇرات ءناسيۇلى, روزا ەسەنباەۆا, اقىن, كومپوزيتور وسپان سۇلەيمەن, جۋرناليست ايشا تۇرماعامبەتوۆا, اقىن ارداق يگەنوۆا اۆتوردى قۇتتىقتاپ, جاڭا كىتابىنا جوعارى باعا بەردى. ديكتور, مادەنيەت سالاسىنىڭ ۇزدىگى قۋات احمەتجانوۆ اقىننىڭ ولەڭدەرىن, وقۋشىلار «مىقتى ايەل» كىتابىنان ءۇزىندى وقىدى. فانيدا نۇرباەۆا باستاعان «ەسىل تولقىندارى» ءانسامبلى ءان شىرقاپ, تاماشا كوڭىل كۇي سىيلادى. وسىنىڭ الدىندا «مەنىڭ اكەم – ەڭ جاقسى ادام», «جارىق عالام» كىتاپتارى شىققان فاتيما زابۋراقىزىنا سارىارقا اۋدانى اكىمىنىڭ العىس حاتى تاپسىرىلدى.