ءاليانىڭ جىر الەمى
ۇلتتىق اكادەميالىق كىتاپحانادا بەلگىلى اقىن ءاليا داۋلەتباەۆانىڭ «الماتىدان الىستا» كىتابىنىڭ تانىستىرىلىمى ءوتتى. بىرقاتار قوعام قايراتكەرلەرىنىڭ, استانانىڭ ادەبي ورتاسىنىڭ, ولەڭسۇيەر قاۋىمنىڭ باسىن قوسقان شارا ءان مەن جىر مەرەكەسىنە ۇلاستى.
وسىدان ون شاقتى جىل بۇرىن ءاليانىڭ «سول ءبىر ساۋلە» اتتى جىر جيناعى جارىق كوردى. ونىڭ العىسوزىن پوەزيا پاديشاسى فاريزا وڭعارسىنوۆا جازدى. سوندا: «ءاليانى مەن وقۋشى كەزىنەن تانيمىن. العاش م.موڭكەۇلىنىڭ 150 جىلدىق مەرەيتويىندا كورىپ, كەلەشەگىنەن ءۇمىت كۇتكەن ەدىم. ول جاقسى اقىن بولىپ قالىپتاستى. ولەڭدەرى تەگەۋرىندى ىرعاعىمەن, تەرەڭ مازمۇنىمەن, وتانسۇيگىشتىك رۋحىمەن ەرەكشەلەنەدى. قۇنارلى ءتىل, وزىندىك كوركەم ويمەن تاريحي تاقىرىپتارعا قالام تەربەپ ءجۇر» دەپ جازعان ەدى كورنەكتى اقىن. ءاليانىڭ كەزەكتى كىتابىنىڭ تانىستىرىلىمى فاريزا وڭعارسىنوۆانىڭ اتى بەرىلگەن زالدا ءوتۋىن زاڭدىلىق دەپ ۇقتىق.
ومىردەن ەرتە وزعان تالانتتى اقىن نۇرلان ماۋكەنۇلىنىڭ «استانادان الىستا, اتىراۋدا سول ءبىر ماڭ» دەپ جىرلاعانى بار ەدى. وسى ولەڭ جولدارىمەن ءاليانىڭ جاڭا كىتابىنىڭ اراسىندا ءبىر بايلانىستى بايقادىق. ونىڭ سەبەبى كىتاپ اۆتورى ءدال وسى اتىراۋ قالاسىندا تۇرىپ, «الماتىدان الىستا, استانادان جىراقتاۋ جەردە العاۋسىز ارمانىمەن البىرت ولەڭ جازادى».
استاناعا جاڭا كىتابىمەن جەتكەن اقىن وقىرماندارىمەن پوەزيا تىلىندە سىرلاستى. تانىستىرىلىمعا قاتىسقاندار دا مول اسەر الدى. ماسەلەن, «قاراشانىڭ ىزعارى, العاشقى مۇزداق, تاپتاۋرىن تايعاقتىڭ ءبارىن ۇمىتتىرىپ جان جايلاۋىنا كىرگىزگەن كەش بولدى. استانادا وسىنداي جىر كەشتەرى ءجيى وتكىزىلۋى كەرەك» دەدى بەلگىلى قالامگەر, سەناتور نۇرتورە ءجۇسىپ.
جاستار ءاليانىڭ ولەڭدەرىن وقىدى, اندەر ايتىلدى. اۆتوردىڭ وڭايگۇل تۇرجان, جانات اسكەربەكقىزى, ەلەنا ابدىحالىقوۆا سىندى اقىن اپالارى, جازۋشىلار وداعىنىڭ حاتشىسى, وسى ۇيىمنىڭ استانا قالالىق فيليالىنىڭ ديرەكتورى داۋلەتكەرەي كاپۇلى, تاناگوز تولقىنقىزى, اسىلزات ارىستانبەك سىندى زامانداستارى, باسقا دا اقىندار تىلەكتەرىن جەتكىزدى.