سان عاسىرلىق سۋىرىپسالمالىق ونەر جايىندا سىر شەرتىپ وتىرىپ قونىسباي ءابىل حاقىندا اڭگىمە قوزعالسا, «ءاي-ءاي» اۋەنى ءسوز بولادى. ال «ءاي-ءاي» اقىن» ايتىلسا, قونىسبايدىڭ قاعىتپا قالجىڭدارىنىڭ ەسىمىزگە تۇسەتىنى وزىنشە ءبىر زاڭدىلىق ىسپەتتى. ونىڭ كوزىڭە جاس كەلگەنشە كۇلدىرەتىن سان قىرلى ساتيراسى, جۇرەككە جىلىلىق سىيلايتىن جىرى, بۇگىندە بارشامىزعا تانىمال ءبىرشاما ءانى بار. توپقا ءتۇسىپ سىنالعاندا «تورعايدان شىققان ءبىر تايمىن» دەپ ءوزى ايتقانداي, تەك تورعاي ءوڭىرىنىڭ عانا ەمەس, الاشتىڭ اياۋلىسىنا اينالعان ازامات بيىل الپىستى القىمداپتى.
سەنبى كۇنى, كونگرەسس-حولدا استانا قالاسى ءتىل باسقارماسىنىڭ ۇيىمداستىرۋىمەن ايتىستىڭ اقتاڭگەرى, جىردىڭ جامپوزى, ساتيرا ساڭلاعى, قازاقستاننىڭ حالىق اقىنى قونىسباي ءابىلدىڭ الپىس جاسقا تولۋىنا ارنالعان «تۇياعىمىن تۇلپاردىڭ» اتتى ءانى مەن اۋەزى بولەك اسەرلى كەش ءوتتى.
مەرەيتويدا ەلىمەن قاۋىشقان اقىن العى ءسوزىن اقجارما تىلەگىمەن, ءوزىنىڭ ءجۇرىپ وتكەن ءومىر باسپالداعى جايىنداعى كىرىسپە ولەڭمەن اشتى. ارقالىقتىڭ سالەمىن ارقالاپ كەلگەن ايبەك قاليەۆ اعاسىنا ارناۋىن ايتتى. ايعايلاپ ايتار اقيقاتى, شىرىلداتىپ جەتكىزەر شىندىعى بار ءتول شاكىرتىنىڭ جىر-شاشۋىنان كەيىن مەرەيتوي يەسى كورەرمەندەرمەن سىرلاستى. كورنەكتى ايتىسكەر كوكەن شاكەەۆتى ونەردەگى ۇستازى سانايتىنىن ايتتى.
كەش بارىسىندا ءسوز العان سارابدال ساتيريك كوپەن امىربەك قونىسبايدىڭ قاعىتپا قالجىڭدارىن تاعى ءبىر مارتە قايتالاپ كورەرمەندى ءدۇر سىلكىندىرسە, الماتىنىڭ ايلى ءتۇنىن جاستىق شاقتارىندا بىرگە وتكەرگەن ۇلىقبەك ەسداۋلەت دوسى جايىندا جىلى-جىلى لەبىز ءبىلدىردى. الىستان ات تەرلەتىپ جەتكەن اسەلحان قالىبەكوۆا دا ءاي-ءاي ارىپتەسى جايلى ەستەلىك ايتسا, اسىلدىڭ سىنىعىنداي بولعان ەرىك اسقاروۆتىڭ ۇلى بەكزات اكەسىنىڭ كوزى تىرىسىندە قونىسباي اقىنعا ارناعان ولەڭىن وقىپ بەردى. توي يەسىنىڭ ەسكى جىلداردان ەستەلىك ەمگەن كوڭىلى ءبىر ساتكە دامىل تاۋىپ, «مەنى سەگىز قىرلى ءبىر سىرلى جىگىت دەيتىندەر كوپ, اسەلحان ايتقانداي, بۇل مەنىڭ توعىزىنشى قىرىم» دەپ ءوزىنىڭ «بالا ماحابباتى», «اڭساۋ», «ون ءتورت جاسار بالانىڭ ءسوزى» سياقتى وتىزعا تارتا ءاننىڭ اۆتورى بولىپ, سازگەرلىك قىرىنان تانىلعان اقىن كەش سوڭىندا ءوزىنىڭ ءسوزى مەن انىنە جازىلعان بىرنەشە ءانىن ورىنداپ بەردى.
كەشكە قازىرگى قازاق رۋحانياتىنىڭ ءبىر توپ قابىرعالى وكىلدەرى قاتىستى.
