Sport

ايدى اسپانعا شىعارعان «استانا»!

بۇرناعى كۇنى تۇندە فۋتبولدان ەۋروپا ليگاسىنىڭ توپتىق كەزەڭىندە 5-تۋردىڭ ويىندارى وينالدى. «استانا» ءوز الاڭىندا انگليانىڭ «مانچەستەر يۋنايتەدىن» قابىلداپ, 2:1 ەسەبىمەن جىگەرلى جەڭىسكە جەتتى. ولاي دەيتىنىمىز, الاڭ يەلەرى ويىن بارىسىندا اۋەلى ۇتىلىپ تۇرىپ, اقىر سوڭىندا ۇتىپ شىقتى.نۇر-سۇلتان قالاسىنىڭ اكىمى التاي كولگىنوۆ ماتچ اياقتالعاننان كەيىن Twitter الەۋمەتتىك جەلىسىنە: «ەلوردالىق «استانا» فك تاريحى تەرەڭدە جاتقان «مانچەستەر يۋنايتەدتى» ۇتتى. جەڭىس قۇتتى بولسىن, نۇر-سۇلتان!» دەپ جازدى.
ءبىزدىڭ جەرلەستەرىمىز وسىلايشا توپتا ءوزىنىڭ ءبىرىنشى ۇتىسىنا قول جەتكىزسە, مانچەستەرلىكتەر العاش رەت جەڭىلىستىڭ اششى ءدامىن تاتتى. «مانچەستەر يۋنايتەد» 2016 جىلدىڭ اقپان ايىنان بەرى ەۋروپا كۋبوكتارى ءۇشىن ماتچ­تارىندا ءوزى ەسەپ اشقاننان كەيىن ءبىرىنشى رەت جەڭىلىسكە ۇشىرادى. بۇعان قوناقتار كوۋ­چى ولە گۋننار سۋلشەردىڭ كلۋبتا تاربيەلەنىپ جۇرگەن 8 جاس تۇلەكتى ويىنعا قوسۋى باستى سەبەپكەر بولدى. «ميۋ» ءوزىنىڭ تاريحىندا ءبىرىنشى رەت مۇنداي تۋرنيردە ەڭ جاس قۇرامىمەن الاڭعا شىقتى. وسىلايشا الاڭداعى ويىنشىلارىنىڭ ورتا جاسى 20 جىل جانە 221 كۇندى قۇرادى.
«مانچەستەر يۋنايتەد» – انگليانىڭ 20 دۇركىن چەمپيو­نى بولعان كوماندا. ءۇش رەت ەۋروپا چەمپيوندارىنىڭ, ءبىر رەت ەۋروپا ليگاسىنىڭ جەڭىمپازى اتانعان. كەزىندە اعىلشىن فۋتبولىنىڭ جۇلدىزدارى بوببي چارلتون, دەنيس لوۋ, دجوردج بەست شىققان كوماندا. ونىڭ əلەمدىك رەيتينگتەگى ورنى ءəلى دە جوعارى. دəل قازىر ول ەۋروپا ليگاسىنىڭ جەڭىمپازى اتانادى دەگەن كوماندالار ساناتىندا تۇر.دەگەنمەن «مانچەستەردىڭ» قاي قۇرامى دا كۇشتى. انگليا سياقتى ەلدە فۋتبولشىلاردىڭ تولقۇجاتتاعى جاسىنا ەمەس, ويىنىنا قاراپ باعام جاسايدى. سەبەبى وندا جاراپ جاتسا, ءجاسوسپىرىم جاسىنداعى ويىنشىنى دا الامانعا ويلانباي قوسا بەرەدى, ودان جانە باسقالارمەن بىردەي جاۋاپكەرشىلىك تالاپ ەتىلەدى.
مۇنى ماتچتىڭ باسى مانچەستەرلىكتەردىڭ ايقىن باسىمدىلىعىمەن وتكەنى دە ايعاقتايدى. مەيمانداردىڭ قورعاۋشىلارى ليۋك شوۋمەن جانە دجەسسي ­لينگاردپەن كۇشەيتىلگەن جاستار قۇرامى ويىن باستالعان ساتتەن ونىڭ تىزگىنىن قولدارىنا الدى. تابلوداعى تەپە-تەڭدىك ون مينۋتقا دەيىن سوزىلدى. سوسىن لينگارد ايىپ الاڭىنىڭ سىرت جاعىنان قاقپاعا دوپ باعىتتاپ, استانالىقتاردىڭ قاقپاشىسى, كوماندا كاپيتانى نەناد ەريچتى قاپى قالدىردى. وسى ەسەپ ءبىرىنشى تايمنىڭ سوڭىنا دەيىن ساقتالىپ تۇردى.
الاڭداعى جاعداي ۇزىلىستەن كەيىن مۇلدە باسقاشا رەڭككە ءتۇستى. ەندى الاڭ يەلەرىنىڭ باسىمدىلىعى بارعان سايىن بايقالا بەردى. استانالىقتار كوپ ۇزاماي ەسەپتى تەڭەستىرىپ قانا قويماي, سونىمەن بىرگە العا شىقتى. ەكى جاعدايدا دا گولدى قورعاۋشىلاردىڭ قاتىسۋىمەن جاسالدى. ويىننىڭ 55-مينۋتىندا دميتري شومكو ايىپ الاڭى ىشىندە وزىنە كەلگەن دوپتى تورعا قاراي ادەمى بۇرىپ جىبەرسە, 66-مينۋتتا انتونيو رۋكاۆينا ۇرعان دوپتى مەيمانداردىڭ 19 جاسار قورعاۋشىسى ديشون بەرنارد ءوز قاقپاسىنا كىرگىزىپ قويدى.
وسى جەڭىلىسكە قاراماستان, بۇعان دەيىن 10 ۇپاي جيناپ ۇلگەرگەن «مانچەستەر يۋنايتەد» پلەي-وفف كەزەڭىنە مەرزىمىنەن بۇرىن شىعىپ وتىر. ال بۇعان دەيىن 4 رەت جەڭىلىسكە ۇشىراعان «استانا» ەڭ العاشقى 3 ۇپايىنا قول جەتكىزدى.
«مانچەستەر يۋنايتەدتىڭ» بۇل جەڭىلىسى ەۋروپا سپورت اقپارات قۇرالدارىنىڭ نازارىنان تىس قالمادى. ايتالىق, Eurosport.ru باسىلىمى «قازاقستان قاتتى قايران قالىپ وتىر. «استانا» «ميۋ»-مەن ويىندا ءبىرىنشى بولىپ گول وتكىزىپ الدى, بىراق سوڭىندا جەڭىپ شىقتى. «مانچەستەردىڭ» شابۋىلى بارىنشا جاس, ال قاقپاشىسى كارى بولىپ شىقتى» دەپ جازدى.
ەندى سوڭعى تۋردىڭ ويىندارى 12 جەلتوقسان كۇنى وينالادى. بۇل كۇنى «استانا» بەلگرادتا «پارتيزانمەن» كەزدەسەدى.

راسۋل ايتقوجا

تاعىدا

ۇقساس جاڭالىقتار

پىكىر ۇستەۋ

Back to top button