مەملەكەتتىك حاتشى, قازاقستان رەسپۋبليكاسى پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى گ.ابدىقالىقوۆا «بۇۇ-ايەلدەر» ۇيىمىنىڭ قازاقستانداعى وكىلى, ورتالىق ازياداعى «بۇۇ-ايەلدەر» بىرنەشە ەلگە ارنالعان بولىمشەسىنىڭ ديرەكتورى ي.كونكيەۆيچپەن كەزدەستى, – دەپ حابارلايدى اقوردانىڭ ءباسپاسوز قىزمەتى.
كەزدەسۋگە سونداي-اق ۇلتتىق كوميسسيا ءتورايىمىنىڭ ورىنباسارى, پارلامەنت ءماجىلىسىنىڭ دەپۋتاتى ە.تاراسەنكو قاتىستى.
تاراپتار ايەلدەردى جۇمىسپەن قامتۋ, ايەل كاسىپكەرلىگىنە قولداۋ كورسەتۋ, انا مەن بالانى قورعاۋ, تۇرمىستىق زورلىق-زومبىلىقتىڭ الدىن الۋ, وتباسىلىق جانە رۋحاني-ادامگەرشىلىك قۇندىلىقتاردى نىعايتۋ ماسەلەلەرىن شەشۋ ىسىندەگى ىنتىماقتاستىقتىڭ كەلەشەگىن تالقىلادى.
مەملەكەتتىك حاتشى قازاقستان مەن «بۇۇ-ايەلدەر» ۇيىمى اراسىنداعى ىنتىماقتاستىقتىڭ دەڭگەيى جوعارى ەكەنىنە توقتالدى. گەندەرلىك تەڭدىكتى ىلگەرىلەتۋ, ەلىمىز مۇشەسى بولىپ تابىلاتىن ايەلدەرگە قاتىستى شەكتەۋدىڭ بارلىق ءتۇرىن جويۋ تۋرالى بۇۇ كونۆەنتسياسى ەرەجەلەرىن ساقتاۋ جونىندەگى بىرلەسكەن جۇمىستى اتاپ ءوتتى. قازاقستان رەسپۋبليكاسىنىڭ 2006-2016 جىلدارعا ارنالعان گەندەرلىك تەڭدىك ستراتەگياسى «بۇۇ-ايەلدەر» ۇيىمىنىڭ بەلسەنە اتسالىسۋى ارقىلى ازىرلەنىپ, قابىلداندى.
گۇلشارا ابدىقالىقوۆا قازىرگى جاعدايداعى ايەلدەر ءرولىنىڭ كوپقىرلىلىعىنا جانە ولاردىڭ جان-جاقتى دامۋى مەن جاسامپازدىق الەۋەتىن ىسكە اسىرۋ ءۇشىن جاعداي جاساۋ قاجەتتىگىنە نازار اۋداردى.
مەملەكەتتىك حاتشى ەلباسىنىڭ «نۇرلى جول – بولاشاققا باستار جول» اتتى جاڭا ەكونوميكالىق ساياساتى اياسىندا جاڭا جۇمىس ورىندارى مەن وندىرىستەر قۇرۋمەن بايلانىستى بارلىق ينفراقۇرىلىمدىق جوبالارعا ايەلدەردى بەلسەندى تۇردە تارتۋعا ۇلتتىق كوميسسيا بارىنشا ىقپال ەتەتىنىن اتاپ كورسەتتى.
