ءتول دىنىمىزدەگى قاسيەتتى مەيرامنىڭ ءبىرى – قۇربان ايتتى استانالىق مۇسىلماندار دا كوتەرىڭكى كوڭىل-كۇيمەن, زور قۋانىشپەن اتاپ وتۋدە. ءۇش كۇنگە سوزىلاتىن مەرەكەنىڭ العاشقى كۇنىندە حازىرەت سۇلتان مەشىتى ايت نامازىنا جينالعان جاماعاتقا لىق تولدى.
جاڭبىر استىنداعى جاماعات
تمد ەلدەرىندە تەڭدەسى جوق, اۋماعى ات شاپتىرىم ۇلكەن مەشىتكە سىيماعان جۇرتشىلىق جاۋىن-شاشىنعا قاراماي, اللاعا قۇلشىلىقتارىن دالادا جاسادى.
«نامازعا جينالعان استانالىق مۇسىلماندارعا حازىرەت سۇلتان مەشىتى دە تارلىق ەتكەندەي ينە شانشار ورىن جوق. ساپ تۇزەگەن جاماعات ايت نامازىن جاڭبىردىڭ استىندا وقۋعا ءماجبۇر بولدى» دەيدى مەشىت قىزمەتكەرلەرى.
ەلباسى ەل بىرلىگىن تىلەدى
سول كۇنى مەملەكەت باسشىسى نۇرسۇلتان نازارباەۆ حازىرەت سۇلتان مەشىتىندە بولىپ, قازاقستاندىقتاردى قۇربان ايت مەرەكەسىمەن قۇتتىقتادى. نۇرسۇلتان ءابىشۇلى وسىناۋ ەرەكشە مەيرامدى بۇكىل مۇسىلمان الەمى اتاپ ءوتىپ جاتقانىن ايتتى. «بۇگىن بارلىق مۇسىلمان ءۇشىن ماڭىزدى كۇن – قۇربان ايت مەرەكەسى. قازاقستاندا ءبىز بۇل كۇندى وزگە دە ءدىني سەنىمدەگىلەردىڭ مەرەكەسى ءتارىزدى اتاپ وتەمىز. حالىقتىڭ بىرلىگىنىڭ, وتانعا دەگەن سۇيىسپەنشىلىگىنىڭ ارقاسىندا ءبىزدىڭ ەلىمىز تابىستى دامۋدا. تاۋەلسىزدىك كەزەڭىندە حالقىمىز ءوزىنىڭ تاريحي دىنىنە قايتا ورالدى. بۇگىندە كۇللى ەلىمىز بويىنشا ءۇش مىڭنان استام مەشىت بار. ءبىز قازاقستانداعى ەڭ ۇلكەن مەشىتتى استانادا سالدىق» دەدى پرەزيدەنت.
ەلباسى ەلگە بەيبىتشىلىك پەن تىنىشتىق, باق-بەرەكە مەن بىرلىك تىلەگەن بارلىق قازاقستاندىقتاردىڭ دۇعاسىنىڭ قابىل بولۋىن تىلەدى. «اللا تاعالا بىزگە, تىنىشتىق جانە كوپ ۇلتتى ءارى كوپ كونفەسسيالى حالقىمىزعا بىرلىك بەرسىن. سوندا ءبىز ەلىمىزدىڭ بارشا ازاماتتارىنىڭ يگىلىگى ءۇشىن قازاقستاندى ودان ءارى وركەندەتە بەرەتىن بولامىز» دەدى مەملەكەت باسشىسى.
قۇربان شالۋشىلاردىڭ قاراسى مول
مەرەكەنىڭ باستى ءراسىمى – اللانىڭ رازىلىعى ءۇشىن ءتورت تۇلىكتىڭ بىرىنەن قۇربان شالۋ. اسىرەسە, ۋاق مال كوپ سويىلادى بۇل كۇندەرى. ەلوردادا ايت مەرەكەسiنiڭ ءبiرىنشi كۇنiندە ءبىر قوي ورتا ەسەپپەن 25 مىڭ تەڭگەدەن ساتىلدى. مال ساتۋ جانە سويۋ ءۇشiن استانا قالاسى اكiمدiگi ارنايى ورىندار بەلگiلەگەنىن حابارلاعان بولاتىنبىز. سولاردىڭ ءبىرى – ورتالىق بازار اۋماعىنداعى «نۇربەرەكە» جشس-دا ءبىر قوي 18 000-25 000 تەڭگە ارالىعىندا پۇلداندى. ال قاساپشى قىزمەتi – 2 مىڭ تەڭگە.
«قۇربان شالۋ كەزiندە قۇران وقىپ, مۇسىلمان قاۋىمعا قىزمەت كورسەتۋ ءۇشiن مەشiتتەن ارنايى كەلدiك. مۇندا مەن سياقتى ون ءدىني قىزمەتكەر ءجۇر. بيىل قۇربان شالىپ جاتقان جاماعاتتىڭ قاراسى وتكەن جىلعىدان كەم ەمەس» دەيدi مەشiت وكiلi.
ايتا كەتۋ كەرەك, قالا اكiمدiگى ارنايى بولگەن ورىنداردان تىس جەرلەردە دە قۇرباندىق شالىپ جاتقاندار بار. مۇندا قويدى ءۇش مىڭ تەڭگەگە سويىپ بەرەتىن كورىنەدى. «بۇل جەرلەردە قوي سويۋعا بولمايدى. بiراق, مال باۋىزدالىپ قويعاندىقتان, ازiرشە ەشتەڭە iستەي الماي تۇرمىز. رۇقسات ەتiلمەگەندiكتەن, قازiر ەرەجە بۇزعان ادامداردى مىنا جەردەن قۋعا تۋرا كەلەدi» دەيدi قۇقىق قورعاۋشىلار. ال, اكiمدiك ارنايى بەلگiلەگەن مال سويۋ پۋنكتتەرiنiڭ تiزiمiندەگi دۋلاتوۆ كوشەسى, 191 مەكەن-جايىنداعى «پيششەكومبينات-استانالىق پليۋس» جشس-دا مال سويىلىپ جاتقان جوق.
اسحات رايقۇل
