وسىنداي نيەتتەگى مۇسىلمان باۋىرلارىمىز بۇگىن رامازان ايتى مەرەكەسىنىڭ ءۇشىنشى كۇنىن اتاپ وتۋدە. سوڭعى جىلدارى اسىل دىنىمىزگە سەنىم ءبىلدىرىپ, قۇلشىلىق ەتۋشىلەردىڭ قاتارى جيىلەپ جاتقانىن بىلەمىز. وسىعان وراي, ءدىني مەيرامنىڭ دا مارتەبەسى ارتىپ, مەرەيى ۇستەمدەۋدە. ءتول ءدىنىمىزدى ۇستانۋشىلاردىڭ قۋانىشىن ءبولىسۋ ماقساتىندا ەلورداداعى سادۋاقاس عىلماني مەشىتىنىڭ نايب يمامى مامليۋك مۇساەۆتى اڭگىمەگە تارتقانبىز.
– ايت مەيرامىندا بارلىعىمىزعا اللانىڭ نۇرى جاۋسىن! وتىز كۇن ورازادا مەشىتتەرىڭىزگە كەلەتىن قۇلشىلىق ەتۋشىلەردىڭ قاتارى ارتقاندىعى بايقالدى ما؟
– البەتتە. اللاعا شۇكىر دەۋ كەرەك. قۇبىلاعا قاراپ, تىزە بۇككەن باۋىرلارىمىزدىڭ سانى جىل ساناپ كوبەيۋدە. بيىل دا سابىر مەن يمان تىلەپ, مەشىتىمىزدىڭ تابالدىرىعىن اتتاعان اعايىندار مولىنان. ماسەلەن, كەشەگى ايت نامازىن ءوزىم دالادا تۇرىپ وقىدىم. استاناداعى 7 مەشىتتىڭ ءبارى نامازحاندارعا تولدى.
– ايتتىڭ ماڭىزى مەن مانىنە توقتالا كەتسەڭىز.
– ءيا, جالپى, ايت جونىندە كەڭىنەن اڭگىمەلەۋگە بولادى. ايت ءسوزىنىڭ ءوزى «مەيرام» دەگەندى بىلدىرەدى. ياعني, مۇسىلمانداردىڭ ەكى ۇلكەن مەرەكەسى بولسا, ءبىرى وسى – رامازان ايتى, ەكىنشىسى – قۇربان ايت.
ورازا ۇستاعان ءاربىر مۇسىلمان وتىز كۇندە كوپ ساباق الادى, سابىرلىلىقتى ۇيرەنەدى, كوپ نارسەنىڭ قادىرىن بىلەدى. ال, وتىز كۇننىڭ ارتىن الا بەرە كەلەتىن ايت كۇندەرى – ناعىز مولشىلىقتىڭ كەزدەرى. مۇندا ءيسى مۇسىلمان ءبىر-بىرىنە جاقسى تىلەكتەر ايتىپ, ءار شاڭىراقتا جايىلعان اق داستارحاننان ءدام تاتادى. ەڭ باستىسى, ارازداسقان اعايىندار ءبىر-ءبىرىنىڭ قاتەلىگىن كەشىرىپ, يگى نيەتپەن كورىسەدى. ءۇش كۇنگە سوزىلاتىن ايتتى تاتۋلىق پەن دوستىقتىڭ, ىرزىق پەن نەسىبەنىڭ, قۋانىش پەن قۇلشىلىقتىڭ كورىنىس تاباتىن ۋاقىتى دەپ بىلەمىن.
– ءوزىڭىز ايتقانداي, ايت كەزىندە ءار شاڭىراقتان ءدام تاتىپ, جاقسى تىلەكتەر باعىشتاۋ – مەيرامنىڭ باستى بەلگىسى. الايدا, وسى ءۇردىس ەلوردادان بايقالمايتىن سىڭايلى؟..
– راس, ءدىنىمىز سان جىلدار بوداندىقتا بولىپ, ۇلتتىق ناقىشتارىمىز دا جويىلىپ كەتۋدىڭ از-اق الدىندا قالعان. كەيىن ەگەمەندىگىمىزدى الىپ, ءتول ءدىنىمىز ەلباسى تاراپىنان قولداۋ تاپتى. قۇربان ايت مەرەكەسىندە دەمالىس بەرىلدى. بۇرىنعىداي, ايت كەزىندە ءۇي-ءۇيدى ارالاپ, قۇران باعىشتاۋ بۇگىندە قالالى جەرلەردە از ەكەنى راس. بىراق, الداعى ۋاقىتتا يگى ءداستۇر جالعاسادى دەپ ويلايمىن. ويتكەنى, قازاق ۇلتىنىڭ ءتۇپ قازىعى – يسلام. ال, يسلام – تەك بىرلىكتى, تاتۋلىقتى, جاقسىلىقتى, سابىرلىلىقتى, باسقا دا عاجاپ قاسيەتتەردى قولدايدى.
اسحات رايقۇل
