باس قالادا «نازار اۋدارىڭىز! بالالار!» جەدەل-الدىن الۋ ءىس-شاراسى باستالدى.
ول وسى ايدىڭ 30-ىنا دەيىن جالعاسادى. اكتسيا اياسىندا ۇيىمداستىرىلعان شارالار تۋرالى استانا قالاسى ءىىد اكىمشىلىك پوليتسيا باسقارماسى باستىعىنىڭ ورىنباسارى عوسمان جاقين اڭگىمەلەيدى.
– اتالمىش اكتسيا اياسىندا قانداي شارالار ۇيىمداستىرىلادى؟
– «نازار اۋدارىڭىز! بالالار!» جەدەل-الدىن الۋ ءىس-شاراسى اياسىندا استانا قالاسىنداعى ىشكى ىستەر دەپارتامەنتى اكىمشىلىك پوليتسيا باسقارماسىنىڭ قىزمەتكەرلەرى ءبىلىم بەرۋ مەكەمەلەرىندەگى جاس جول قوزعالىس ينسپەكتورلارىمەن ءبىرلەسىپ مەكتەپ وقۋشىلارىنا كامەلەتكە تولماعان بالالاردىڭ قاتىسۋىمەن بولاتىن جول-كولىك وقيعالارىنىڭ الدىن الۋ, ولاردىڭ ءومىرى مەن دەنساۋلىعىن ساقتاۋ, قالا جولدارىنداعى جاعدايدى تۇراقتاندىرۋ بويىنشا كەڭ اۋقىمدى ءتۇسىندىرۋ جۇمىستارىن جۇرگىزەدى. جول ەرەجەلەرىن بۇزعان بالالاردىڭ اتا-انالارى اكىمشىلىك جاۋاپكەرشىلىككە تارتىلادى.
استانادا 72 مەكتەپ بولسا, بارلىق ءبىلىم بەرۋ مەكەمەلەرىندە سونشالىقتى جاس جول قوزعالىس ينسپەكتورلارى بار. بالالار جاراقاتتانۋشىلىعىن الدىن الۋ ماقساتىندا ولاردىڭ قاتىسۋىمەن سلەتتەر ۇيىمداستىرىلىپ تۇرادى. ماۋسىم ايىندا بالالار وسكەمەندە وتەتىن وسىنداي شاراعا قاتىسىپ قايتۋدى جوسپارلاپ وتىر.
وسى اكتسيا اياسىندا ءبىز استاناداعى №2 قالالىق بالالار اۋرۋحاناسىندا بولىپ, ونداعى جول اپاتىنان زارداپ شەككەن بالالارعا جارقىلداۋىق بىلەزىكتەر سىيعا تارتتىق. جارقىلداۋىق ەلەمەنتتەرى بار كيىمدەردى كيىپ, زاتتاردى قولدانعان جاياۋ جۇرگىنشىنى جۇرگىزۋشى تاۋلىكتىڭ قاراڭعى مەزگىلىندە دە جولدا جىلدام بايقاي الادى. ولار 300-400 مەتردەن كورىنەدى.
– قازىرگى تاڭدا جول اپاتى سالدارىنان زارداپ شەككەن بالالار سانى قانشا؟
– بۇگىندە استاناداعى №2 قالالىق بالالار اۋرۋحاناسىنىڭ تراۆماتولوگيالىق پۋنكتىنە تۇسكەن بالالاردىڭ سانى 100-دەن 150-گە دەيىن كوبەيگەن. قازىرگى ۋاقىتتا جول اپاتى سالدارىنان زارداپ شەككەن 27 بالا وسى ەمدەۋ مەكەمەسىندە ەم قابىلداۋدا.
جالپى, جاقىندا تىركەلگەن 28 جول-كولىك وقيعاسىنىڭ سالدارىنان ءبىر بالا قايتىس بولسا, 27 بالا ءتۇرلى جاراقات العان. ولاردىڭ باسىم بولىگى, ناقتىراق ايتساق, 23-ءى جولدى بەلگىلەنبەگەن جەرلەردەن وتكەن. سونداي-اق, كەيبىر اتا-انالار كامەلەتكە تولماعان بالالاردى كولىكتە ۇستاپ وتىراتىن قۇرىلعىلارسىز تاسىمالدايدى. وسىنداي جول اپاتىنىڭ بىرىندە اۆتوكرەسلوسىز تاسىمالدانعان 10 جاسار قىز وقيعا بولعان جەردە قايتىس بولدى. اكتسيا اياسىندا ۇيىمداستىرىلاتىن شارالار بارىسىندا مۇنداي وقيعالاردىڭ الدىن الۋ ءۇشىن قاۋىپسىزدىك ەرەجەلەرىنىڭ قاتاڭ ساقتالۋىن ەسكەرتەمىز.
– اكتسيا قانشالىقتى ءجيى وتكىزىلىپ تۇرادى؟
– جىل سايىن ەكى رەت: كەزەكتى وقۋ جىلىنىڭ اياقتالار الدىندا جانە جاڭا وقۋ جىلى قارساڭىندا وتكىزەمىز. مۇنداعى باستى ماقسات – كامەلەتكە تولماعانداردىڭ قاتىسۋىمەن بولاتىن جول-كولىك وقيعالارىنىڭ الدىن الۋ, كوشەلەر مەن جولداردا قاۋىپسىز مىنەز-قۇلىق ماشىقتارىن بەكىتۋ.
بيىل مامىردىڭ 20-سى كۇنى باستالعان اكتسيا وسى ايدىڭ 30-ىنا دەيىن جالعاسادى. اكتسيا اياقتالعانعا دەيىن ەلورداداعى ءاربىر وقۋشىعا 4 اي مەرزىمگە جارامدى ساقتاندىرۋ ءپوليسىن سىيعا تارتپاقشىمىز.
گۇلبارشىن وكەشقىزى
