تولە بي الىبەكۇلىنىڭ 350 جىلدىق مەرەيتويى اۋليەاتا جەرىندە كەڭ كولەمدە اتالىپ ءوتتى
القيسسا
توپىراعىنان تالاي تۇيعىن- تۇلەكتەردى تۇلەتىپ ۇشىرعان تاريحي تاراز بۇل كۇندەرى تەلەگەي تەبىرەنىس قۇشاعىندا. كەڭ-بايتاق قازاق ەلىنىڭ ءار تۇكپىرىنەن ات ارىلتىپ كەلىپ جاتقان قوناقتاردا قيساپ جوق. ءبارى دە قارا قىلدى قاق جارىپ, قاراشانىڭ قامىن جەگەن, تۋرالىعىن ايتىپ تەكتىلىكتىڭ تۇعىرىنا قونعان تولە بي بابانىڭ رۋحىنا تاعزىم ەتۋگە, تورقالى تويىنان تابارىك الۋعا اسىق. سوناۋ اساۋ شۋدى باۋىرىنا باسىپ جاتقان جايساڭ جايلاۋىندا كىندىك قانى تامىپ, كورەگەندىگى مەن كەمەڭگەرلىگىنىڭ ارقاسىندا التى الاشتىڭ ايبىندى ۇلىنا, اقيقاتتىڭ الداسپانىنا اينالعان ءاز تولە تويىنىڭ ءدۇبىرى وسىلايشا دۇركىرەپ سالا بەردى.
قويىلىم قۇندىلىعى
قاسيەتتى اۋليەاتا جەرىندەگى تاعلىمدى توي جازۋشى-دراماتۋرگ ەلەن ءالىمجاننىڭ «تولە بي» دراماسىمەن باستالدى.
قولدان قولعا جەتىپ, ۇرپاقتان ۇرپاققا مۇرا بولىپ كەلە جاتقان تاريحي دەرەكتەردە تولە ءبيدىڭ ءومىرى مەن قىزمەتى ەكى داۋىرگە ءبولىپ قاراستىرىلادى. ونىڭ العاشقىسى – تاۋكە حاننىڭ تۇسىنداعى كەزەڭ. ول تۇستا تولە باستاعان بيلەرگە سالماق تۇسكەنىمەن, نەگىزگى جاۋاپكەرشىلىك تاۋكە حاننىڭ موينىندا بولاتىن. ابىز بي وسى كەزەڭدە جارقىراپ كورىندى. «جەتى جارعىنى» جاساۋعا اتسالىسقانى دا وسى كەزەڭ.
ال, تاۋكە حان قايتىس بولىپ, قازاق حاندىعىنىڭ ءوزى بىرنەشەگە ءبولىنىپ كەتكەن تۇستا تولە بي ءومىرىنىڭ ەكىنشى كەزەڭى باستالدى. بۇل كەزدە بارلىق اۋىر سالماق تولە بيگە ءتۇستى. اۆتور شىعارماسىنا وسى داۋىردەگى قازاق حالقىنىڭ تۇرمىس-تىرشىلىگىن, حاندىقتار اراسىنداعى الاۋىزدىقتىڭ سەبەپ-سالدارىن اشىپ كورسەتۋگە تىرىسقان. سول تۇستا تولە ءبيدىڭ الدىندا بىتىراپ كەتكەن حاندىقتاردىڭ ءبارىنىڭ باسىن قۇراپ, ءبىر جەرگە توپتاستىرۋ ماقساتى تۇردى. حاندىقتاردىڭ ارقايسىنىڭ ءوزىنىڭ بيلىگى بولعان سوڭ بۇلار ەشكىمگە باعىنبادى. بولىنگەنىنىڭ ارقاسىندا جوڭعار ولارعا شابۋىل جاسادى. رەسەي مەن قىتايدىڭ ساياساتى جۇزەگە اسا باستادى. مىنە, وسىنداي اۋىر كەزەڭدە ابىز ءبيدىڭ الدىندا تاعدىرلى ساتتەر كۇتىپ تۇردى. ەلدىڭ رۋحىن كوتەرىپ, ىنتىماق-بىرلىككە ۇيىستىرۋ كەرەك بولدى. جانە ءاز تولە وسىلاي جاسادى. ءبۇتىن ەلدى بىلىكتىلىكپەن باستاپ, حان-سۇلتانداردىڭ باسىن قوستى. بىتىسپەس داۋ-دامايدى بىلگىرلىكپەن شەشتى. ونىڭ وسىنداي قايتالانباس قاسيەتى مەن قايراتكەرلىك قىرى باراق سۇلتاننىڭ سوتى كەزىندە دە ايقىندالا تۇسەدى. ابىلقايىردى ولتىرگەن سۇلتانعا قاتىستى توبە بي باستاعان بيلەر سوتى ۇكىم ايتىپ, ماڭىزدى مامىلەگە قول جەتكىزەدى. درامانىڭ نەگىزگى ارقاۋى دا – وسى. شيەلەنىستى وقيعالاردىڭ سوڭى بىتىمگەرلىكپەن اياقتالادى.
ايتۋ كەرەك, تاريحي درامانىڭ تۇساۋى تۇڭعىش كەسىلىپ وتىرعانىنا قاراماستان قويىلىمدى وبلىستىق قازاق دراما تەاترىنىڭ ارتىستەرى شەبەرلىكپەن ورىنداپ شىقتى. اسىرەسە, جيىلعان جۇرتشىلىق باستى ءرولدى سومداعان جاس اكتەر مامبەت قوجاليەۆتىڭ ونەرىنە ايرىقشا ءتانتى بولدى.
ەڭسەلى ەسكەرتكىش – ەلدىكتىڭ بەلگىسى
مەرەكەلىك شارالاردىڭ ءمان-ماڭىزى تولە بيگە ارنالىپ قويىلعان ەسكەرتكىشتىڭ اشىلۋ سالتاناتىمەن دە ارتا تۇسكەندەي. تاراز شاھارىنداعى تۇپ-تۋرا تولە بي داڭعىلىنىڭ بويىنا قويىلعان ەسكەرتكىش الىستان كوز تارتادى.
سالتاناتتى ساتتە جامبىل وبلىسىنىڭ اكىمى قانات بوزىمباەۆ قۇتتىقتاۋ ءسوز سويلەدى. «بۇگىنگى سالتانات – بىرلىگى مەن بەرەكەسى بار ەلدىڭ جارقىن ءساتى. ەگەمەندى ەل عانا ەڭسەسىن تۇزەيدى. تاۋەلسىز ەل عانا ءوز پەرزەنتتەرىنىڭ قادىرىنە جەتە الادى. ەلباسىمىز «رۋحى بيىك ەل عانا ۇلى مۇراتتارعا جەتە الادى» دەگەن ەدى. ءبىزدىڭ مەملەكەتىمىزدىڭ مەرەيلى بولۋى وسى قۇندىلىقتاردى قاستەرلەۋدەن باستالادى. حالىق جۇرەگىنەن ورىن العان, ەلگە تۇتقا بولعان قايراتكەرلەردىڭ ەسىمدەرىن ماڭگى ەستە قالدىرۋ – وسكەن ەلدىكتىڭ بەلگىسى. كۇللى قازاق كەڭىستىگىندە ەرەكشە قۇرمەتكە يە بولعان تولە بي بابامىزعا تاراز قالاسىنىڭ تورىنەن ەسكەرتكىش ورناتۋ – ەلدىكتىڭ ناقتى كورىنىسى دەپ بىلەمىز. بۇل – جالپى حالىقتىڭ اق نيەتىنىڭ كورىنىسى. ەسىمى مەن ءىسى ءوزىنىڭ تۋعان ەلىمەن بىرگە جاساسىپ كەلە جاتقان تولە بابامىزدىڭ ەڭسەلى ەسكەرتكىشى قۇتتى بولسىن!» دەدى ءوڭىر باسشىسى ءوز سوزىندە. كەلەسى كەزەكتە رەسپۋبليكالىق «تولە بي» قوعامدىق قورىنىڭ پرەزيدەنتى ءمۇسىلىم دايىربەكوۆ جۇرەكجاردى لەبىزىن جەتكىزدى.
تىلەكتەر تاسقىنىنان سوڭ ەڭسەلى ەسكەرتكىش سالتاناتتى تۇردە اشىلدى. قولىنا اساتاياق ۇستاعان بابا توڭىرەككە ويلى جانارىمەن قاراپ تۇر. تۇعىرىمەن قوسا ەسەپتەگەندە بيىكتىگى ون ءبىر مەتردى قۇرايتىن ەسكەرتكىش قولادان قۇيىلعان. ءبىز اڭگىمەگە تارتقان ەسكەرتكىش اۆتورلارىنىڭ ءبىرى امانات نازارقۇل مونۋمەنتالدى ساۋلەت تۋىندىسىنىڭ ءۇش اي ۋاقىت ىشىندە دايىندالعانىن جانە ونىڭ بارلىق شىعىنى ەلۋ ميلليون تەڭگەگە باعالانعانىن تىلگە تيەك ەتتى. جەرگىلىكتى بيلىك ەسكەرتكىشتىڭ قۇر ءوزىن ورناتىپ قويماي, ونىڭ جان-جاعىن اباتتاندىرۋعا دا نازار اۋدارعان. سۋبۇرقاقتار ورناتىلىپ, ورىندىقتار قويىلعان. شاعىن باق بوي كوتەرىپ, جان-جاعى تەگىس اسفالتتالىپتى. بۇرىندارى ەلەۋسىز كورىنەتىن قالانىڭ بۇل بولىگى وسىلايشا ەندى كوپشىلىك ءبىر مەزگىل تىنىعىپ, بابا رۋحىنا تاعزىم ەتەتىن كيەلى ورىنعا اينالارى ءسوزسىز.
«قارلىعاش»-جىرلار قالىقتاپ
تاعلىمدى تويدىڭ اياسىندا «تولە ءبيدىڭ قاسيەتتەرى مەن وسيەتتەرى» اتتى رەسپۋبليكالىق جىر ءمۇشايراسىن وتكىزۋ دە قاراستىرىلعان بولاتىن. وتكەن جۇمادا شارانىڭ قورىتىندىسى شىعارىلدى. جىر بايگەسىنە بارلىعى الپىس ءۇش اقىننان 126 ولەڭ ءتۇسىپتى. شىن مىقتىنى انىقتاۋ قۇرامىندا قازاق ەنتسيكلوپەدياسىنىڭ ديرەكتورى باۋىرجان جاقىپ (توراعا), مەملەكەتتىك سىيلىقتىڭ لاۋرەاتى كۇلاش احمەتوۆا, قازاقستان جازۋشىلار وداعى توراعاسىنىڭ ءبىرىنشى ورىنباسارى عالىم جايلىباي, «قازاق ادەبيەتى» گازەتىنىڭ باس رەداكتورى جۇماباي شاشتايۇلى, «جامبىل» جۋرنالىنىڭ باس رەداكتورى نەسىپبەك ءداۋتايۇلى, سەمەيلىك اقىن تىنىشتىقبەك ابدىكاكىموۆ جانە تارازدىق شىرىن ماماسەرىكوۆا بار قازىلار القاسى ءۇشىن وڭاي سوقپاعانى داۋسىز.
«بالاساعۇن» ورتالىق كونتسەرت زالىندا وتكەن ماراپاتتاۋ راسىمىندە جابىق جىر ءمۇشايراسىنىڭ باس جۇلدەسىن «قارلىعاش», «ءبىر قىز تۋرالى اڭىز» اتتى ولەڭدەرى ءۇشىن بەلگىلى اقىن مارالتاي رايىمبەكۇلى يەلەندى. جالپى داۋىس بەرۋدە الپىس ۇپاي جيناعان جەڭىمپازعا ءبىر ميلليون تەڭگە كولەمىندە قارجىلاي سىيلىق تابىس ەتىلدى. ءبىرىنشى ورىندى دا تارازدان شىققان جاس اقىن ەرلان ءجۇنىس قانجىعاعا بايلادى. «ۋاقىت ديىرمەنى: دالا ارى» اتتى تاريحي-فيلوسوفيالىق داستاننىڭ اۆتورىنا 500 مىڭ تەڭگە بۇيىردى. ەكىنشى ورىندى «تولە ءبيدىڭ ايتقانى», «جان قازاعىم» ولەڭدەرى ءۇشىن مەملەكەتتىك سىيلىقتىڭ يەگەرى, اقىن يرانبەك ورازباەۆ ەنشىلەسە, ءۇشىنشى تۇعىرعا «بيگە ارزۋ» تولعاۋىنىڭ اۆتورى, اتىراۋلىق اقىن قىز ءاليا داۋلەتباەۆا كوتەرىلدى. سونىمەن قاتار «تولە بي حاقىندا» اتتى ولەڭدەر توپتاماسى ءۇشىن حالىقارالىق «الاش» ادەبي سىيلىعىنىڭ يەگەرى, شەشەنستان مەملەكەتتىك سىيلىعىنىڭ لاۋرەاتى رافاەل نيازبەك 100 مىڭ تەڭگە كولەمىندەگى ارناۋلى جۇلدەگە يە بولدى.
بەدەلى بيىك باسقوسۋ
ءدال وسى كۇنى «بالاساعۇن» ورتالىق كونتسەرت زالىندا «تولە بي جانە ونىڭ ۇلاعاتتى مۇرالارى» اتتى رەسپۋبليكالىق عىلىمي-تاجىريبەلىك كونفەرەنتسيا ءوز جۇمىسىن باستادى. بەدەلى بيىك باسقوسۋعا حالىق جازۋشىسى شەرحان مۇرتازا, مەملەكەت جانە قوعام قايراتكەرى ومىربەك بايگەلدى, عالىمدار ءۋاليحان قاليجان, ورازالى سابدەنوۆ باستاعان ەسىمدەرى ەلگە بەلگىلى ساياساتتانۋشىلار, اقىن-جازۋشىلار, ونەر مايتالماندارى مەن زيالى قاۋىم قاتىستى.
كونفەرەنتسيا بارىسىندا مادەنيەت جانە اقپارات ءمينيسترى مۇحتار قۇل-مۇحاممەد مەملەكەت باسشىسى نۇرسۇلتان نازارباەۆتىڭ مەرەيتويلىق قۇتتىقتاۋ حاتىن وقىپ بەردى. وندا بىلاي دەپ جازىلعان: «بۇگىنگى كۇن – قازاق مادەنيەتى مەن تاريحىنداعى ەستە قالار كۇن. ۇلتىمىزدىڭ ۇلى پەرزەنتى, حالقىمىزدىڭ قاسيەتتى ءسوزىن ەل بىرلىگى مەن جەر تۇتاستىعىنا ارناعان تاريحي تۇلعا تولە بي الىبەكۇلىنىڭ ەڭسەلى ەسكەرتكىشى ەجەلگى تاراز جەرىندە بوي كوتەردى.
تاۋەلسىزدىكتىڭ العاشقى ارايىندا ورداباسىدا وتكەن القالى جيىندا جۇرتىمىزدىڭ ايگىلى ءۇش ءبيى – تولە ءبيدىڭ, قازىبەك ءبيدىڭ, ايتەكە ءبيدىڭ رۋحتارى ەندىگى جەردە حالقىمىزدىڭ بىرلىگى مەن ىنتىماعىنىڭ نۇرلى نىسانىنا اينالىپ, بۇگىنگى ۇرپاقتىڭ ۇلى تۇلعالارعا دەگەن قۇرمەتى ارتا تۇسەتىنى ايتىلعان ەدى.
تولە بي – قازاق جەرىنە تىگىلگەن جات كوزدىڭ سۇعىنا, جاۋ ەلدىڭ باسقىنشى ارەكەتىنە قارسى كۇرەستە سۇڭعىلا سوزىمەن, سەرتكە ساي ىسىمەن, ساردارلىق ستراتەگياسىمەن ەرەكشە كورىنگەن تۇلعا. ەلدىڭ نامىسى مەن ەلدىگىن وياتقان, جىگەرىن جانىپ, ەڭسەسىن تىكتەگەن قايراتكەر. رۋحاني كوسەمدىك پەن تابيعي شەشەندىكتى تەڭ ۇستاعان ابىز. قازاق جەرىنىڭ تۇتاستىعى مەن ەل بىرلىگىن قاشاندا قازىق قىلىپ ۇستاعان بابامىز كەيىنگى ۇرپاعىنا ۇلى وسيەتتى امانات ەتىپ كەتتى. تولە بي وسيەتتەرى بۇگىنگى تاڭدا دا تاۋەلسىز ەلىمىزدىڭ رۋحاني ءوسىپ-وركەندەۋىنە, جاستاردىڭ بويىنا وتانسۇيگىشتىك قاسيەتتەردى سىڭىرۋگە ولشەۋسىز ۇلەس قوسىپ كەلەدى. سوندىقتان, وسىنداي ۇلى تۇلعاعا ەسكەرتكىش قويۋ ارقىلى ءبىز وتكەن تاريحىمىزدى قاستەرلەپ, بۇگىنىمىزدى بەدەرلەپ, ەرتەڭىمىزدى باياندى ەتۋگە جول اشامىز. ۇلتتىق تاريحىمىزدىڭ جاڭا بەتتەرىن جازۋ ۇستىندە, وتكەنىمىزدىڭ ونەگەسىن زەردەلەۋدە ءبىز بابالار اماناتىنا ادالدىق پەن بەرىكتىكتىڭ ۇلگىسىن كورسەتەمىز.
تۇگەل ءسوزدىڭ بيىگى بولعان تولە ءبيدىڭ قاسيەتتەرى مەن وسيەتتەرى الەمدىك وركەنيەتتە وزىندىك ورنىن تاپقان قازاق جۇرتىنىڭ تىرەگى مەن تىلەگى بولىپ ماڭگىلىك قالا بەرەدى. بارشاڭىزدى بابا رۋحى قولداي ءجۇرسىن!»
كەلەسى كەزەكتە ءسوز العان وبلىس باسشىسى ق.بوزىمباەۆ تولە بي مۇرالارىنىڭ ومىرشەڭدىگى مەن ونىڭ وسكەلەڭ ۇرپاقتى تاربيەلەۋدەگى رولىنە ايرىقشا توقتالدى.
ماڭىزدى جيىندى جۇرگىزگەن قازاقستان جازۋشىلار وداعى باسقارماسىنىڭ توراعاسى, سەناتور نۇرلان ورازالين بابا تويىنىڭ تاراز جەرىندە عانا ەمەس, وڭتۇستىك جانە ورتالىق قازاقستان وڭىرلەرىندە, سونىمەن قاتار كورشىلەس وزبەكستاندا دا كەڭىنەن اتالىپ جاتقاندىعىن ايتىپ ءوتتى. ءدۇبىرى الىسقا كەتكەن ايتۋلى شاراعا وراي پارلامەنت سەناتىنىڭ توراعاسى قاسىمجومارت توقاەۆتىڭ, جوعارعى سوتتىڭ توراعاسى قايرات ءماميدىڭ اتىنان ارنايى قۇتتىقتاۋ حاتتار كەلىپ تۇسكەنىن جەتكىزدى.
كونفەرەنتسيا بارىسىندا جاسالعان باياندامالار تولە بي بابامىزدىڭ ەل باسقارۋداعى ەرەن ەڭبەگىن, بىتىمگەرلىك بولمىسىن, ساياسي كورەگەندىگىن, قاراشانىڭ قاسىنان تابىلاتىن قاراپايىمدىلىعىن, ازاتتىق جولىنداعى ايبىندى ەرلىگىن ارقاۋ ەتتى. مىسالى, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كافەدرا مەڭگەرۋشىسى, پروفەسسور مامبەت قويگەلدى تولە بي الىبەكۇلىنىڭ قوعامدىق-ساياسي قىزمەتىنە, اسىرەسە, رەسەيمەن جاقسى قارىم-قاتىناستا بولۋ كەرەكتىگىن تۇسىنگەن قايراتكەرلەر جانىنان تابىلعاندىعىنا جانە ونىڭ دۇرىس ساياسات بولعاندىعىنا توقتالدى. م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, فيلولوگيا عىلىمىنىڭ دوكتورى, ۇلتتىق عىلىم اكادەمياسىنىڭ كوررەسپوندەنت-مۇشەسى ءۋاليحان قاليجان تولە ءبيدىڭ بالا سابالاقتى تاربيەلەپ شىعارۋداعى ۇستازدىق ۇلاعاتى, تىعىرىقتان جول تابا بىلەتىن كورەگەندىگى, «جەتى جارعىنى» جازۋعا اتسالىسقانداعى تۋرالى كەڭىنەن ءسوز قوزعادى. ءال فارابي اتىنداعى قازاق ۇلتتىق ۋنيۆەرسيتەتى اباي ينستيتۋتىنىڭ ديرەكتورى, فيلولوگيا عىلىمىنىڭ دوكتورى, پروفەسسور جانعارا دادەباەۆ بابانىڭ ءومىربايانى تۋرالى وي تولعاسا, تاريح عىلىمىنىڭ دوكتورى, پروفەسسور كلارا حافيزوۆا داناگوي ابىزدىڭ ديپلوماتيالىق العىرلىعىن قاۋزادى.
باسقوسۋدا بايانداما جاساعان كورنەكتى عالىمدار تولە ءبيدىڭ ءومىرى مەن قىزمەتىنەن مول ماعلۇماتتار ۇسىندى, تىڭ دەرەكتەرمەن ءبولىستى. ءتىپتى, تولە ءبيدىڭ تۋعانىنا 355 جىل تولۋى مۇمكىن دەگەن تۇجىرىمدار دا ايتىلدى. ءبىر سوزبەن ايتقاندا, بابانىڭ جان-جاقتى قىرىن اشىپ كورسەتۋگە باعىتتالعان دۇنيەلەر تۇعىرى بيىك تۇلعانىڭ ايبىنىن اسىرىپ, ابىرويىن اسقاقتاتتى. ءدۇيىم جۇرت تولە بي الەمىن تەرەڭىرەك تاني ءتۇستى.
اۋەزدى ءان…
الامان بايگە…
مازمۇنعا باي شارالار تىزبەگى مۇنان ارى ورتالىق ستاديوندا سالتاناتتى مەرەكەمەن جالعاستى. بۇل كۇنى مۇندا ينە شانشار ورىن بولعان جوق. كوپشىلىك دەگبىرسىزدەنە كۇتكەن توي-دۋمان دا باستالىپ كەتتى. جۇرتشىلىقتىڭ نازارى قازاق دالاسىنداعى جوڭعار شاپقىنشىلىعىن سۋرەتتەيتىن تەاترلاندىرىلعان قويىلىمدا بولدى. وندا ەل باسىنا كۇن تۋعان الماعايىپ زامانداعى ابىلاي حاننىڭ ەرلىگى, تولە ءبيدىڭ تورەلىگى باستى ارقاۋ رەتىندە ورىلگەن. بالا سابالاقتىڭ جوڭعار باتىرىمەن جەكپە-جەككە شىعىپ, قارسىلاسىن اتىمەن قوسا اۋدارا قۇلاتاتىن كورىنىس جيىلعانداردى تىپتەن ارقالاندىرىپ جىبەردى. جامبىلدىق جاستاردىڭ وسىناۋ كۇردەلى ەپيزودتاردى ءساتتى سومداپ شىققانىنا ءسۇيسىنىپ قالدىق. كەيىن بىلگەنىمىزدەي, قويىلىمعا تاراز قالاسىنداعى جوعارى جانە ارناۋلى ورتا وقۋ ورىندارىنىڭ شاكىرتتەرى مەن مەكتەپ وقۋشىلارى, شاھارمەن ىرگەلەس جاتقان جامبىل, بايزاق اۋداندارىنىڭ مادەنيەت قىزمەتكەرلەرى, وبلىستىق دراما تەاترىنىڭ ارتىستەرى باستاعان ءۇش مىڭعا جۋىق ادام قاتىسىپتى.
قازاق ەسترادا جۇلدىزدارىنىڭ قاتىسۋىمەن وتكەن گالا-كونتسەرتتىڭ دە اسەرى بولەك بولدى. ەسىمى ەلىمىزگە كەڭىنەن تانىس ايتىسكەر اقىن امانجول التاەۆ قازاقتىڭ قارا دومبىراسىمەن بابا رۋحىنا ارناپ جىر نوسەرىن توگىلتتى. بەلگىلى انشىلەر باعدات سامەدينوۆا, مارجان اراپباەۆا, «الاشۇلى», «قوڭىر», «ەركە» توپتارى پاتريوتتىق رۋحتاعى اۋەزدى اندەردى شىرقاپ, قۇلاق قۇرىشىن قاندىردى. دۋماندى كەش حالىقارالىق بايقاۋلاردىڭ لاۋرەاتى بولات ەسىمحانوۆتىڭ ورىنداۋىنداعى ەسكەندىر حاسانعاليەۆتىڭ «اتامەكەن» انىمەن شارىقتاۋ شەگىنە جەتتى.
ال, كەلەسى كۇنى, دالىرەك ايتساق, سەنبىدە باۋىرجان مومىشۇلى اتىنداعى اتشاباردا شاباندوز جىگىتتەر ۇلتتىق ات سپورتى ويىندارىنىڭ كورىگىن قىزدىردى.
ءتۇيىن
مىنە, كونە دە جاڭا تاراز جەرىندە ءۇش كۇنگە سوزىلعان تولە بي الىبەكۇلىنىڭ 350 جىلدىق تويى ءوز مارەسىنە جەتتى. «حالقىڭا ءادىل, جاۋىڭا قاتال, دوسىڭا ادال بول» دەپ وسيەت قالدىرىپ قانا قويماي, ۇلاعاتتى ۇستانىمىنان اينىماعان داناگوي ابىزدىڭ ونەگىلى ءومىرى مەن ماۋەلى مۇراسى – وسكەلەڭ ۇرپاقتىڭ باعا جەتپەس بايلىعى, بولاشاققا باستايتىن باستى باعدارى. سان عاسىر وتسە دە ومىرشەڭ دۇنيەلەر ءوز قۇندىلىعىن جويمايدى. كەرىسىنشە, ۋاقىت تىنىسىمەن تۇرلەنىپ, ۇلتىمىزدىڭ يگىلىگىنە قىزمەت ەتە بەرەتىن بولادى. ءبىز تورقالى تويدان وسىنداي وي ءتۇيىپ قايتتىق.
تۇرسىنبەك سۇلتانبەك, قازاقستان جۋرناليستەر
وداعىنىڭ مۇشەسى.
سۋرەتتەردى تۇسىرگەن
اقادىل رىسماحان
