اقوردادا مەملەكەت باسشىسى نۇرسۇلتان نازارباەۆتىڭ قاتىسۋىمەن بارلىق دەڭگەيدەگى اكىمدەردىڭ كەڭەيتىلگەن ءماجىلىسى ءوتتى.
بۇل وبلىس, قالا, اۋدان تىزگىنىن ۇستاعان شەندىلەرگە اكىم بولۋدىڭ باستى مۇراتى – حالقىنا جاقىن بولۋ ەكەندىگىن تاعى ءبىر ەستەرىنە تۇسىرگەن جيىن بولدى.
«سىزدەردىڭ جەتىستىكتەرىڭىز بەن تابىستارىڭىزعا ەشقانداي داۋىم جوق. بىراق, سولاي ەكەن دەپ, توقمەيىلسىپ كەتۋگە تاعى بولمايدى. ويتكەنى, ءبىزدىڭ موينىمىزعا ەلدىڭ ءال-اۋقاتى مەن تاعدىرىنا بايلانىستى ۇلكەن جاۋاپكەرشىلىك جۇكتەلگەن» دەدى پرەزيدەنت ءسوز باسىندا.
الايدا, اكىمقارالاردىڭ اراسىندا ارقالاعان جاۋاپكەرشىلىگىنە ءاتۇستى قارايتىندار از ەمەس سياقتى.
مەملەكەت باسشىسىنىڭ سايتىنا كەلىپ تۇسكەن حاتتاردىڭ دەنى شەنەۋنىكتەردىڭ شارۋانى شەشۋگە كەلگەندە سوزبۇيدالىققا, ەنجارلىققا سالىنۋىنا قاتىستى جازىلادى ەكەن.
جەڭ ۇشىنان جالعاساتىن «كوماندالىق اۋىسۋ» ءتاجىريبەسىن پرەزيدەنت بۇل جولى دا قاتاڭ سىنعا الدى. «بىزدە مينيستر, اكىم وزگەرسە, ارتىنشا ساپىرىلىسقان اۋىسۋلار باستالادى.
دۇنيەجۇزىندە مۇنداي ءتارتىپ جوق» دەدى ول.
اۋدان جانە قالا اكىمدەرىنىڭ مەملەكەتتىك ورگانداردا جۇمىس ءوتىلىنىڭ بولۋىن, مانساپ جولىندا ساتىلاپ كوتەرىلۋ كەرەكتىگىن باسا ايتتى. سونىمەن قاتار, مينيسترلەر مەن اكىمدەر كادرلىق ماسەلەلەرمەن, ورتالىقتان الىناتىن قارجىنى بولۋمەن ەمەس, سالالىق ساياسات پەن ءوڭىردى دامىتۋ ماسەلەلەرىمەن اينالىسۋى كەرەكتىگىن تاپسىردى.
ءبىلىم, دەنساۋلىق سالالارىنداعى قاعازباستىلىقتىڭ تىم شەكتەن شىعىپ بارا جاتقاندىعىنا توقتالدى.
ماسەلەن, ءبىلىم جانە عىلىم مينيسترلىگىنىڭ ءبىر دەپارتامەنتىنە وزگە وڭىرلەر ەسەپ-قيساپتىڭ 300 ءتۇرىن وتكىزەدى ەكەن. ال, مۇعالىمدەر اتالعان قۇجاتتاردى دايىنداۋعا ءبىر جارىم, ەكى اي ۋاقىتتارىن سارپ ەتەدى. سالا ءمينيسترى باقىتجان جۇماعۇلوۆ «جيىرما جىلدان بەرى قالىپتاسىپ قالعان قاعازباستىلىق قوي» دەگەن ءۋاجبەن وڭاي قۇتىلعىسى كەلگەن. الايدا, مەملەكەت باسشىسى: «ەگەر ۇستاز ۋاقىتىنىڭ ۇشتەن ءبىرىن قاعاز تولتىرۋعا جۇمسايتىن بولسا, وندا بالانى كىم وقىتادى؟ قاعازباستىلىقتان ارىلىپ, ەلەكتروندى ۇكىمەتكە كوشۋدى قولعا الۋ قاجەت» دەگەن ناقتى تاپسىرما بەردى.
سونداي-اق, كەي وڭىرلەردىڭ جەرگىلىكتى مەرەكەلەر مەن مەرەيتويلاردى رەتسىز اتاپ ءوتىپ, قارجىنى ىسىراپ ەتەتىندىگىن سىن تەزىنە الدى.
جيىندا قالعىپ وتىرعان ءبىردى-ەكىلى اكىم بولماسا, قاتىسۋشىلاردىڭ دەنى مەملەكەت باسشىسىمەن بولعان بۇل كەزدەسۋدەن الداعى ۋاقىتتا حالىق يگىلىگى ءۇشىن اتقارۋعا ءتيىس شارۋالارىنىڭ باعىت-باعدارىن انىقتاپ شىققانداي بولدى.
شىنار دوسان
