ايتپايىن-اق دەپ ەدىم!باستى اقپارات

الا قويدى بولە قىرىقپا

نەمەسە شەتتەن كەلگەن دەپ شەتكە تەپپەيىك

جاقىندا جاڭاوزەندىك مۇ­نايشىلار ەلورداعا كەلىپ, مينيسترلىك الدىنا تۇنەپ, ءوز تالابىن قويىپ قايتقانى جۇرتقا ءمالىم. قازىر قۇزىرلى ورگاندار مەن نارازىلىق بىلدىرۋشىلەر اراسىندا ­ديالوگ ءجۇرىپ جاتىر. ارينە, ەل بولعان سوڭ حالىقتىڭ بيلىككە ءوز تالابىن قويىپ, جۇمىس تالاپ ەتكەنى قاتە ەمەس شىعار. بىراق بۇگىنگى ايتپاعىمىز ول ەمەس. اڭگىمە قازىر وسى نارازىلىقتىڭ سوڭى تاعى دا شەتەلدەن كوشىپ كەلگەن وتانداستارىمىزدى كىنالاۋعا قاراي اۋىسىپ بارا جاتقانى جايىندا.

جالپى قازاقستاندا شەتەلدەن كەلگەن اعايىندى قارالاۋ, ورىنسىز جەردەن كىنا تاعۋ ۇدايى بەلەڭ الىپ كەلەدى. ماسەلەن, 2011 جىلعى جاڭاوزەن وقيعاسىنان كەيىن الدەكىمدەر پرەزيدەنتكە «كوتەرىلىس جاساعانداردىڭ كوبى ورالماندار ەكەن» دەگەن وتىرىك اقپارات بەرىپ, كوشتى توقتاتۋعا ۇرىنعان ەدى, سول ءبىر اۋىز ءسوزدىڭ كەسىرىنەن شەتەلدەن كەلگەن قانداستارعا 5 جىلدان كەيىن ازاماتتىق بەرۋ سىندى قازاقستاننىڭ تاۋەلسىزدىك تۋرالى دەكلاراتسيا­سىنا, قر كونستيتۋتسياسىنا جانە حالىقارالىق زاڭدارعا قايشى زاڭ دا شىققان بولاتىن.

قاڭتار وقيعاسىنان كەيىن «الماتىدا كوتەرىلىسكە شىققانداردىڭ اراسىندا شەتەلدەن كەلگەن اعايىن­دار كوپ ەكەن» دەگەن قاڭقۋ ءسوز تاعى شىقتى. ونى اناۋ-مىناۋ ەمەس, ەلىمىزگە بەلگىلى زاڭگەردىڭ اۋزىمەن ايتقىزسا, بۇل جولى اتاعى دا, سىيلىعى دا كوپ جازۋشى الىستان كەلگەن اعايىنعا اۋىز سالىپتى.

«سىرتتان كەلگەندەردە «مەملەكەت مىندەتتى» دەگەن كوزقاراس بايقالىپ قالىپ جاتادى. ياعني اتاجۇرتىنا ورالعاندارعا «مەملەكەت ماتەريالدىق كومەك كورسەتۋى كەرەك, جۇمىس تاۋىپ بەرۋى قاجەت» دەيتىندەر دە تابىلادى. ايتسە دە نارىقتىڭ قاتاڭ زاڭى «الما ءپىس, اۋزىما ءتۇستى» قولدامايتىنىن ۇمىتپاعانىمىز ءجون. ارناۋلى ورتا, جوعارى ءبىلىمى بولماسا دا, جوعارى جالاقى تولەۋدى تالاپ ەتەتىنىن دە ءجيى ەستىپ قالامىز. ولاردىڭ نەگىزسىز تالابى كەيدە جەرگىلىكتى حالىقتىڭ ويىن وزگەرتىپ, بيلىك پەن بۇقارانىڭ اراسىنا جىك سالاتىنداي» دەپ جازىپتى جازۋشى, قازاقستاننىڭ ەڭبەك سىڭىرگەن قايراتكەرى الىبەك اسقاروۆ.

باسقانىكى باسقا, ءدال ەلدىڭ ءسوزىن سويلەيدى دەگەن الىبەك اعادان مۇنداي ءسوز كۇتپەپ ەدىك, «شەتەلدەن كەلگەندەردىڭ جوعارى ءبىلىمى جوق» دەپ كەكەتە سويلەگەنى ازداي, «ولار حالىق پەن بيلىكتىڭ اراسىنا وت جاعادى» دەگەن سوزىمەن «الا قويدى بولە قىرقاتىن» الاسا ويىن اڭعارتىپ قالدى. ەڭبەك سىڭىرگەن قايراتكەردىڭ بۇل پاستىگىنە ءبىز ۇيالدىق…

وسىنداي جات پيعىلداردىڭ كە­سىرىنەن ءبىز قازىر قازاق كوشىن توقتاتۋعا اينالدىق. شىن مانىندە, ەلىمىزدە قازاقتىڭ سانى كوبەيمەي, قازاقتىڭ ۇلەس سالماعى ارتپاي, ءبىزدىڭ مىنا مەملەكەتتى ۇستاپ تۇرۋىمىز قيىنعا سوعادى. ويتكەنى قازاقتىڭ جەرىنە كوز الارتىپ وتىرعاندار از ەمەس. سوندىقتان قازاقستاننىڭ تاۋەلسىزدىگىن باياندى ەتەمىز دەسەك, مەملەكەت قۇرۋشى تۇلعالىق ۇلت – قازاقتىڭ سانىن كوبەيتۋ باستى نازاردا تۇرۋى كەرەك. قازاقتاردىڭ بولاشاعى قازاقستاندا بولسا, قازاقستاننىڭ بولاشاعى قازاقتىڭ سانى مەن ساناسىنا قاتىستى. «شەتەلدەن كەلگەندەر ماسىل بولدى» دەيتىن جەتەسىز پىكىردىڭ جەتەگىندە كەتكەندەردىڭ سوزىنە سەنىپ, كوپكە توپىراق شاشپاعان ءجون. اتامىز قازاق «الا قويدى بولە قىرىققان جۇنگە جارىمايدى» دەپ تەككە ايتپاعان!

تاعىدا

ۇقساس جاڭالىقتار

پىكىر ۇستەۋ

Back to top button