رەداكتسيامىزعا سىرقات قىزىنىڭ ەمىنە كومەك سۇراعان جالعىزباستى انا انار مولداحمەتوۆادان حات كەلىپ ءتۇستى. دارىگەرلەردىڭ ايتۋىنشا, بەس جاسار ءمادينانى تسەرەبەرالدى سال اۋرۋىنان ساۋىقتىرۋعا ءالى دە مۇمكىندىك بار. الايدا, اناردىڭ قولى قىسقالىق ەتىپ, اقپارات قۇرالدارى ارقىلى جاناشىر جانداردان كومەك سۇراپ وتىرعان جايى بار. قامىققان جاننىڭ جانايقاي حاتىن سول كۇيىنشە بەرىپ وتىرمىز:
«…قىزىم تسەرەبەرالدى سال اۋرۋىنا شالدىققان, ياعني, استاتيكالىق فورماداعى اتونيكا, پسيحيكالىق-سويلەۋ قابىلەتىنىڭ جەتىلۋىندە كەشىگۋشىلىك بار. ارينە, ول ەمدەلەدى, بىراق ۇزاق ۋاقىت پەن قىرۋار قارجىنى قاجەت ەتەدى ەكەن. بالاپانىم ءدارىسىز وتىرا المايدى, ۇنەمى ەم-دومعا اقشا كەرەك, بالا وسكەن سايىن ونىڭ دا باعاسى بىرتىندەپ ۇلعايىپ كەلەدى. قىزىم كوڭىلدى, زەرەك, بالالارمەن ويناعاندى جاقسى كورەدى. الايدا, قوزعالىس جاعىنان مۇمكىندىگى شەكتەۋلى, ورنىنان تايانىپ تۇرعانىمىن, اياعىن تەڭ باسىپ جۇرە المايدى. سونىمەن قاتار, ءتىلى كۇرمەلىپ, سويلەۋگە قينالادى. دارىگەرلەردىڭ بايقاۋىنشا, بالاعا قازىرگى جاعدايىندا تۇراقتى ءارى ۇزاق مەرزىمدى ەم-شارا جۇرگىزسە, ءوزىن-ءوزى الىپ جۇرەتىندەي, ءتىلى شىعاتىنداي حالگە كەلۋى مۇمكىن. بىراق, ەمدەۋ كەشىككەن سايىن, دەنساۋلىعىن قالپىنا كەلتىرۋ دە كۇردەلەنە بەرەتىنى انىق.
مەن بۇرىن مەملەكەتتىك قىزمەتتە بولعانمىن, ول جەردە ۋاقىتىڭمەن ساناسپايدى, تاۋلىك بويى جۇمىستان بوساماي قالاتىن كەزدەر جيىلەپ كەتتى. باسىمداعى قيىندىققا قاراماي, «ەشقانداي سىرقاتىڭا, وتباسىلىق جاعدايىڭا بايلانىستى سۇرانۋ بولماسىن نەمەسە جۇمىستان كەتىڭىز» دەگەن قاتاڭ تالاپ قويعاننان كەيىن جۇمىستان شىعۋعا تۋرا كەلدى. ەڭ الدىمەن – انامىن عوي, بالامنىڭ دەنساۋلىعىن ءبىرىنشى كەزەككە قويدىم.
جۇبايىممەن اجىراسقانىمىزعا ءتورت جىلداي ءوتتى, اۋرۋ بالامىزبەن ەكەۋمىز جالدامالى پاتەردە ولمەستىڭ كۇيىن كەشۋدەمىز. اكەسى ايىنا 9000 تەڭگە كولەمىندە اليمەنت تولەيدى, وعان قوسا مەملەكەتتەن 42000 مىڭ تەڭگە جاردەماقى الامىن. باس-اياعى 51000 تەڭگە ايلىق تابىسىمىز قايدان جەتسىن, 25000 تەڭگەسىن پاتەر يەسىنە ساناپ بەرەمىز. بىرنەشە مارتە جۇمىسقا تۇرماقشى بوپ تالاپتانىپ كوردىم, بىراق الا قويايىن دەگەن ەشكىم بولمادى.
جان باعۋ ءۇشىن ەرلى-زايىپتى بولعان كەزدە العان زاتتارىمىزدى, ءتىپتى, بالانىڭ ويىنشىعىنا دەيىن ساتىپ ءبىتىردىم. بىرنەشە مارتە رەسپۋبليكالىق اۋرۋحانالاردا ەم الدىق, دەگەنمەن ناتيجەسى كوڭىل كونشىتپەيدى. تاعى بىرنەشە كلينيكا ءوز قىزمەتتەرىن ۇسىنۋدا. اتتەڭ, قىزىمدى الىپ, قۇستاي ۇشىپ بارۋعا تاعى دا قارجىنىڭ قاتتىعى قولبايلاۋ بوپ تۇر.
بالام ءومىر-باقي مۇگەدەك بوپ قالۋى مۇمكىن ەكەنىن ويلاسام, تاماعىما وكسىك تىعىلادى. بار ءۇمىتىم سىزدەردە, پەيىلى كەڭ, جۇرەگى جۇمساق جاندار! قولدارىڭىزدان كەلگەنشە كومەك كورسەتۋلەرىڭىزدى سۇرايمىن. «تامشىدان تەڭىز قۇرالادى» دەيدى عوي, بىرىكسەك, پەرىشتەدەي قىزدىڭ باسقا سالعان اۋىرتپالىقتان ايىرىلىپ, پاكيزات كۇلكىسىن, شادىمان شاتتىعىن كورۋگە جازار ەدى. ءبىر-بىرىمىزگە باۋىرمال, جالعىزىن مۇڭايتپاعان, جارلىسىن جانىنا العان حالىق ەدىك قوي. مەنى باسىمداعى قايعىعا جۇتقىزباي, جۇرت بولىپ جۇمىلۋلارىڭىزدى قالايمىن!»
انار مولداحمەتوۆا
ۇيالى تەل: 8-701-933-55-59
ءۇي تەل: 8 (7172)-38-59-74
رەكۆيزيتتەرى:
مولداحمەتوۆا انارا ماراتوۆنا
اعىمداعى شوت: KZ23998BTB0000199589
جسن: 090613650857
كبە: 19
بيك: TSESKZKA
«تسەسنابانك» اق استانالىق فيليالى
