بيىل ەلىمىزدەگى 12 مىڭ كوپبالالى وتباسىلار مەملەكەتتەن جەڭىلدىكپەن ءۇي الىپ, قونىستويىن تويلايدى. سەيسەنبى كۇنى سەناتورلار «تۇرعىن ءۇي قاتىناستارى ماسەلەلەرى بويىنشا» زاڭ جوباسىنا ەنگىزىلگەن تۇزەتۋلەردى ماقۇلدادى. وزگەرگەن زاڭ بويىنشا جىلدار بويى باسپانا كەزەگىندە تۇرعان 6 مىڭ وتباسى جالعا بەرىلەتىن پاتەرلەرگە يە بولادى. ولار اي سايىن ءار شارشى مەترىنە 115 تەڭگە تولەپ تۇراتىن, ساتىپ الۋ قۇقى بەرىلمەگەن باسپاناعا كوشەدى. تاعى دا 6 مىڭ وتباسى «قازاقستان تۇرعىن ءۇي قۇرىلىس جيناق بانكىنەن» جىلدىق 2 پايىزدىق مولشەرلەمەمەن ارزان نەسيە الىپ, ارمان بولعان باسپاناسىنا قول جەتكىزەدى.
يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى قايىربەك وسكەنباەۆ تۇسىندىرگەندەي, زاڭ ارقىلى ەنگىزىلگەن «جالعا بەرىلەتىن باسپانا» دەگەن ۇعىم قوعامداعى تۇرمىسى تومەن توپتاردىڭ وكىلدەرىنە ارنالعان, ساتىپ الۋ قۇقىعى جوق, جالعا بەرىلەتىن تۇراقتى كوممۋنالدىق قور قۇرۋعا مۇمكىندىك بەرەدى. ول 2019 جىلدىڭ باسىنداعى ەسەپ بويىنشا قازاقستاندا 28126 كوپبالالى وتباسىلار ءۇيدىڭ كەزەگىندە تۇرعانىن حابارلادى. «كوپبالالى وتباسىلاردىڭ باسپانا ماسەلەسىن تەزىرەك شەشۋ ءۇشىن جىل سايىن «نۇرلى جەر» باعدارلاماسى شەڭبەرىندە 50 ملرد تەڭگە ءبولۋدى قاراستىرىپ وتىرمىز. جىل سايىن 6 مىڭ وتباسى جالعا بەرىلەتىن پاتەرلەرگە يە بولادى. 2025 جىلعا دەيىن 40 مىڭ وتباسىن قامتاماسىز ەتەمىز. جەتى جىلدا بۇل ماقساتقا جالپى كولەمى 350 ملرد تەڭگە جۇمسالادى» دەپ مالىمدەدى ق.وسكەنباەۆ.
قۇزىرلى مينيسترلىكتىڭ وكىلى كوپبالالى وتباسىلار ءوز باسپاناسىن ساتىپ العانشا جالعا بەرىلەتىن پاتەرلەردە تۇرا بەرەتىنىن ايتادى. اتالعان ءپاتەرلەر وسى جازدا بەرىلە باستايدى. باسپانانى سالۋ جانە دايىن ۇيلەردى ءبولۋ ماسەلەسىن جەرگىلىكتى اكىمدىكتەر رەتتەپ وتىرادى. سەناتورلار ەنگىزگەن تۇزەتۋلەر جۇمىسى بار جاستارعا دا باسپانالى بولۋعا جول اشادى. ايتپاقشى, جۇمىس ىستەيتىن جاستاردىڭ جەڭىلدىكپەن ءۇي الۋى ءۇشىن قانداي كريتەريلەر بەلگىلەنەتىنىن اقپارات جانە قوعامدىق دامۋ مينيسترلىگى دايىندايدى. ەلباسىنىڭ تاپسىرماسىمەن 2019-2021 جىلدار ارالىعىندا نۇر-سۇلتان, الماتى جانە شىمكەنت قالالارىندا جاستارعا جالعا بەرىلەتىن 1 مىڭ پاتەر سالىنادى. سەنات دەپۋتاتتارى ماقۇلداعان زاڭ جوباسى مەملەكەت باسشىسىنىڭ قول قويۋىنا جىبەرىلدى.
