قازان ايى – تۇماۋدىڭ ءورشيتىن كەزەڭى. وسىعان بايلانىستى الدىن الا پروفيلاكتيكالىق شارالار ۇيىمداستىرىلۋدا. بۇل تۋرالى مەملەكەتتىك سانيتارلىق-ەپيدەميولوگيالىق قاداعالاۋ كوميتەتىنىڭ استانا قالاسى بويىنشا دەپارتامەنتىنىڭ ديرەكتورى سارحات بەيسەنوۆامەن تىلدەسكەن ەدىك.
– سارحات ساعىنتايقىزى, استانا قالاسى بويىنشا ءجىتى رەسپيراتورلىق ۆيرۋستى ينفەكتسيامەن اۋىرعانداردىڭ جالپى سانى قانشا؟
–استانا قالاسىندا اعىمداعى جىلدىڭ 27 قىركۇيەگى مەن 12 قازان ارالىعىندا ءجىتى رەسپيراتورلىق ۆيرۋستى ينفەكتسياسىمەن اۋىرعان 3784 وقيعا تىركەلدى. 100 مىڭ تۇرعىنعا شاققانداعى قارقىندى كورسەتكىشى 512,9 قۇرادى. وتكەن جىلدىڭ وسى ۋاقىتىمەن سالىستىرعاندا, سىرقاتتانۋ 1,2 ەسەگە تومەندەگەنى بايقالادى. تۇماۋ اۋرۋىمەن تىركەلگەندەر جوق.
جالپى, قوعامدىق جانە جەكە تازالىقتى ساقتاۋمەن بىرگە تۇماۋدىڭ الدىن الۋ شارالارى وتكىزىلۋدە. تۇماۋدىڭ الدىن الۋ بويىنشا بارلىق جۇمىستار استانا قالاسى دەنساۋلىق ساقتاۋ باسقارماسى جانە دەپارتامەنتپەن بەكىتىلگەن ىس-شارالار جوسپارىنا سايكەس جۇرگىزىلۋدە.
– ءوزىڭىز باسقاراتىن مەكەمەدە قاداعالاۋ جۇمىستارى قالاي جۇرگىزىلەدى؟
– مەملەكەتتىك سانيتارلىق-ەپيدەميولوگيالىق قاداعالاۋ دەپارتامەنتىندە كۇن سايىن تۇماۋ جانە جرۆي تارالۋىنا مونيتورينگ جۇرگىزىلەدى. جۇقتىرۋدى انىقتاۋ, وعان ۋاقتىلى ەم قابىلداۋ ۇشىن بالاباقشا, مەكتەپ, جوعارى وقۋ ورىندارى, ورتا ءبىلىم بەرۋ مەكەمەلەرىندە اۋرۋدىڭ تىركەلۋىنە باسا نازار بولىنەدى. جاڭا زاماناۋي دياگنوستيكالىق ادىستەرىمەن تۇماۋعا زەرتحانالىق زەرتتەۋ جۇرگىزەمىز. تۇماۋ جانە باسقا دا جرۆي-ءدىڭ اسقىنعان تۇرلەرىمەن اۋىرعانداردى اۋرۋحاناعا جاتقىزۋ ۇشىن قولدانىستاعى اۋرۋحانالاردى قايتا باعدارلاۋ جوسپارى دايىندالدى.
– قانداي ءدارى-دارمەك ۇسىناسىزدار؟
– ناۋقاستاردى ەمدەۋ ءۇشىن قالانىڭ دەنساۋلىق مەكەمەلەرىندە ۆيرۋسقا قارسى تاميفليۋ جانە رەلەنزا دارىلەرىنىڭ قورى بار. سونىمەن قاتار الداعى ۋاقىتتا ينگاۆيرين دارىسىن ساتىپ الۋ جوسپارلانۋدا.
– تۇماۋعا قارسى يممۋنيتەتتەۋ جۇمىستارى اقىلى ما؟
– قازان ايىنان باستاپ حالىقتى اقىلى نەگىزدە ماۋسىمدىق تۇماۋعا قارسى يممۋنيتەتتەۋ جۇمىستارى باستالدى. ەلوردادا 15 ەگۋ پۋنكتەرى جۇمىس ىستەيدى. ونىڭ ىشىندە №1, 2, 3, 4, 5, 6, 7, 8 قالالىق ەمحانالارى جانە «Open Clinik», «ينتەرتيچ», «مەدلاين», «مەديكەر», «فارماكوم» كفك جشس, «ينتەرتيچ استانا مەديتسينالىق اسسيستانس», «مەديكال اسسيستانس گرۋپپ» جشس مەديتسينالىق ورتالىقتارىنىڭ بازاسى بار. مەكەمەلەر مەن كاسىپورىندارعا بارىپ ۆاكتسيناتسيا جۇمىستارىن جۇرگىزەتىن ەگۋ بريگادالارى قۇرىلدى.
– شارا بارىسىندا قانشا ادام الدىن الا ەگىلدى؟
– بۇگىنگى كۇنى تۇماۋعا قارسى 9040 ادام ەگىلدى, ونىڭ ىشىندە 2811 بالا, 6229 ەرەسەك ادام بار.
– سونىمەن, بۇل ماۋسىمدا قانشا دوزا ۆاكتسينا ساتىپ الىندى؟
– «قاۋىپ-قاتەر توبىنداعى» تۇلعالاردى تۇماۋعا قارسى يممۋنداۋ ماقساتىندا جەرگىلىكتى بيۋدجەتتىڭ ەسەبىنەن 5 120 000 تەڭگە بولىندى. تۇماۋعا قارسى 7438 دوزا ۆاكتسينا (ۆاكسيگريپپ) ساتىپ الىندى. اقىلى نەگىزدە جانە جۇمىس بەرۋشىلەردىڭ قاراجاتى ەسەبىنەن 66 000 دوزا مولشەرىندە ساتىپ الۋ قاجەتتىگى تۋىنداۋ مۇمكىن.
گۇلميرا ايماعانبەت
